Rasija dabivajecca, kab Abchazija dazvoliła masavaje pierasialeńnie tudy rasijan. Dla hetaha spyniła vypłatu zarobkaŭ abchazam

Pra spynieńnie Rasijaj z 1 vieraśnia sacyjalnych vypłat miedykam, nastaŭnikam i rabotnikam siłavych struktur Abchazii na pres-kanfierencyi 3 vieraśnia raskazaŭ ministr zamiežnych spraŭ hetaj samaabvieščanaj dziaržavy Siarhiej Šamba.

Akramia hetaha, pastaŭki rasijskaj elektraenierhii ciapier buduć adbyvacca pa kamiercyjnych cenach. Pa jaho słovach, heta adbyłosia z-za nievykanańnia Abchazijaj abaviazacielstvaŭ pierad Rasijaj.

Rasija subsiduje Biełaruś šlacham pastavak hazu i nafty pa zanižanych cenach. Tady jak subsidyi Abchazii mieli voś takuju, inšuju formu. Ale što stała pryčynaj, čaho dabivajecca Rasija? 

«Vidavočna, što za apošni čas nazapasiłasia šmat niezadavolenaści ŭ našych sajuźnikaŭ. Uzajemaadnosiny značna źmianilisia. Heta nie toje, što było napačatku», — adznačyŭ Siarhiej Šamba.

Za niekalki dzion dla hetaha ŭ sacyjalnych sietkach źjaviłasia kopija pratakoła sustrečy kiraŭnika Abchazii Asłana Bžanii z namieśnikam kiraŭnika Administracyi prezidenta Rasii Dźmitryjem Kozakam ad 19 žniŭnia. U im jakraz i zhadvajucca hetyja miery ŭździejańnia na Abchaziju.

Zhodna z kopijaj, dla taho, kab vypłaty adnavilisia, Abchazija pavinna ratyfikavać dvuchbakovaje pahadnieńnie ab pryznańni i vykanańni sudovych i arbitražnych rašeńniaŭ pa ekanamičnych spravach; zabiaśpiečyć ustupleńnie ŭ siłu pahadnieńnia, jakoje dazvalaje rasijskim jurydyčnym asobam realizoŭvać u Abchazii inviestycyjnyja prajekty, a taksama źniać abmiežavańni z rasijskich inviestaraŭ na rynku kamiercyjnaj nieruchomaści.

Akramia hetaha, adzin z punktaŭ praduhledžvaje składańnie śpisaŭ dla nastupnaha pazbaŭleńnia rasijskaha hramadzianstva abchazskich deputataŭ, jakija dziejničajuć «na škodu intaresam Rasijskaj Fiederacyi i raźvićciu rasijska-abchazskich adnosin».

Šamba nie paćvierdziŭ sapraŭdnaść dakumientaŭ, ale pryznaŭ, što pytańni i pretenzii, jakija ŭ im paznačanyja, sapraŭdy nie adzin raz abmiarkoŭvalisia.

Raniej u Abchazii šyroki hramadski rezanans vyklikała vyniesienaja 15 lipienia prapanova deputataŭ parłamienta pryniać tak zvany zakonaprajekt ab apartamientach («Ab mierach pa pavyšeńni ŭzroŭniu sacyjalna-ekanamičnaha raźvićcia Ačamčyrskaha, Tkvarčelskaha i Halskaha rajonaŭ Respubliki Abchazija»). Sutnaść zakonaprajekta ŭ tym, kab na praciahu dziesiaci hadoŭ pabudavać va ŭschodniaj častcy Abchazii da 30 tys. kvater i damoŭ.

U šerahu nasielenych punktaŭ prajšli mitynhi suprać zakonaprajekta, a 25 lipienia stała viadoma, što jon adklikany z parłamienta.

Žychary Abchazii bajacca, što realizacyja inicyjatyvy, u vyniku jakoj 30 tysiač rasijan atrymali b mahčymaść nabyć nieruchomaść u Abchazii, nasielnictva jakoj składaje ŭ najlepšym vypadku krychu bolš za 200 tysiač čałaviek, parušyła b demahrafičny bałans u krainie.

U intervju RBK ministr zamiežnych spraŭ Rasii Siarhiej Łaŭroŭ nazvaŭ prypynieńnie Rasijaj sacyjalnych vypłat vykanańniem damoŭlenaściaŭ, a nie abvastreńniem. Łaŭroŭ zajaviŭ, što pakiet damoŭlenaściaŭ byŭ uchvaleny ŭradami abiedźviuch dziaržaŭ i sankcyjanavany ich kiraŭnikami.

Jak budzie dalej raźvivacca kanflikt, nieviadoma. Niekatoryja ekśpierty zaklikajuć da bolš uzvažanaj palityki Rasii adnosna Abchazii.

Tak, viadučy navukovy supracoŭnik Centra jeŭraatłantyčnaj biaśpieki Instytuta mižnarodnych daśledavańniaŭ rasijskaj dypłamatyčnaj škoły MHIMO Siarhiej Markiedonaŭ u svaim telehram-kanale adznačyŭ, što «inšych partnioraŭ u hetaj častcy archivažnaha i archipatrebnaha siniaha Čornaha mora ŭ nas niama, treba ŭmacoŭvać kaapieracyju, a nie stvarać z čystaha lista prablemy, kab potym ich vyrašać. Pažadana razumiejučy peŭnyja realii ŭ hetaj respublicy, nie padobnaj da siaredniestatystyčnaha subjekta RF».

• 0
• 0
• 42
• 5
• 0
• 0
• 3
• 0