Biełaruskim błohieram zakručvajuć hajki — źmianili praviły publikacyi rekłamy ŭ sacsietkach. Padrabiaznaści
12 lipienia nabyŭ moc novy zakon ab rekłamie, jaki abaviazvaje luboha, chto publikuje rekłamu, zarehistravacca ŭ śpiecyjalnym rejestry. Pry hetym pad zakon moža trapić ledź nie kožny, chto maje akaŭnt u sacyjalnych sietkach.
![](http://d3kcf2pe5t7rrb.cloudfront.net/img/w840d4webp1/photos/z_2024_07/mycollages-7-ql3fp.jpg.webp)
Parušalnikam moža stać kožny, chto maje akaŭnt u sacsietkach
Zhodna z novym zakonam «Ab rekłamie», jaki dziejničaje z 12 lipienia 2024 hoda, raźmiaščać rekłamu na internet-sajtach i ŭ sacyjalnych sietkach mohuć tolki tyja arhanizacyi, IP i fizičnyja asoby, jakija ŭniesienyja ŭ dziaržaŭny rejestr raspaŭsiudžvalnikaŭ rekłamy.
Akazvać pasłuhi pa raźmiaščeńni rekłamy ŭ internecie jurydyčnymi asobami i IP, nie ŭklučanym u rejestr raspaŭsiudžvalnikaŭ rekłamy, zabaraniajecca. Takaja dziejnaść budzie ličycca niezakonnaj.
Za raźmiaščeńnie rekłamy biez rehistracyi ŭ rejestry praduhledžany štraf:
- dla fizičnych asob — ad 20 da 50 bazavych vieličyń;
- dla IP — ad 20 da 200 bazavych vieličyń;
- dla jurydyčnaj asoby — da 500 bazavych vieličyń.
Aproč štrafaŭ, pa artykule mohuć kanfiskavać da 100% sumy dachodu, atrymanaha ŭ vyniku takoj dziejnaści.
Štraf za adznaki i reposty?
Z tłumačeńniaŭ, jakija daje Ministerstva antymanapolnaha rehulavańnia i handlu, vynikaje, što parušyć zakon «Ab rekłamie» vielmi prosta — dastatkova mieć akaŭnt u sacyjalnych sietkach.
Tak, naprykład, kab ahlad niejkaj ustanovy ad błohiera nie paličyli za rekłamu, aŭtaru kantentu nieabchodna vykanać šerah patrabavańniaŭ.
Pa-pieršaje, taki materyjał musić być vypuščany pa inicyjatyvie błohiera. Pa-druhoje, publikacyi musiać adpaviadać asnoŭnaj tematycy błohiera. To-bok, kali fudbłohier vyrašyć zrabić ahlad parka atrakcyjonaŭ, a nie čarhovaha kafe, to da jaho mohuć uźniknuć pytańni.
I samaje hałoŭnaje — u materyjale pavinna adsutničać kantaktnaja infarmacyja (adras, numar telefonu, spasyłka na sajt abo akaŭnty ŭ sacyjalnych sietkach).
![](http://d3kcf2pe5t7rrb.cloudfront.net/img/w732d4webp1/photos/stock/img_5445-j6znd.jpg.webp)
U inšych vypadkach ahlad budzie ličycca rekłamaj, a značyć, pavinna być składzienaja damova na akazańnie pasłuh.
Jak apynucca ŭ rejestry?
Zajaŭniku nieabchodna padać apaviaščeńnie ŭ Ministerstva antymanapolnaha rehulavańnia i handlu.
Dla hetaha nieabchodna spampavać i zapoŭnić apaviaščeńnie ab uklučeńni źviestak u rejestr. Apaviaščeńnie treba padać u MARH u papiarovym vyhladzie. Jaho pavinny razhledzieć ciaham 5 pracoŭnych dzion.
Źviestki pra rekłamaraspaŭsiudžvalnikaŭ možna znajści pa spasyłcy.
Navošta heta ŭładam?
Vyhladaje, što novy zakon «Ab rekłamie» dazvalaje, jak toj kazaŭ, zabić adnym strełam dvuch zajcaŭ.
Pryraŭniaŭšy amal lubyja zhadki pra miescy, tavary abo pasłuhi ŭ sacyjalnych sietkach da rekłamy, zakanatvorcy faktyčna pazbavili błohieraŭ chitrykaŭ, kab uchilacca ad apłaty padatkaŭ.
Ciapier niemahčyma zrabić paŭnavartasna ahlad, jaki nie budzie ličycca rekłamaj, tamu błohieram, kab nie atrymać štraf, daviadziecca rabić usio pa zakonie.
Heta značyć, što dziaržava atrymaje bolš hrošaj u vyhladzie padatkaŭ. Pryčym nie tolki ad błohiera, ale i ad rekłamadaŭcy. Bo ŭ Biełarusi z 1 studzienia 2023 dziejničaje zbor pamieram 20%, jaki musić płacić rekłamadaŭca, kali raźmiaščaje rekłamu nie ŭ dziaržaŭnych miedyja.
Ź inšaha boku, dziaržava atrymlivaje jašče bolšy instrumient cisku na błohieraŭ, bo kožny budzie razumieć, što praz raspłyŭčataść farmulovak pryciahnuć da adkaznaści za parušeńnie zakona «Ab rekłamie» budzie prosta.
Kamientary