Pachod da hiniekołaha skončyŭsia skandałam — minčanka vajuje z pryvatnym miedcentram

Historyja pačałasia z žanočaha foruma (a dakładniej, mabilnaha dadatku momlife, dzie mamy z roznych haradoŭ i krain abmiarkoŭvajuć nadzionnyja prablemy). Žančyna ź nikam vrednaya_mama_mishutki (jaje zavuć Natalla) raspaviała, z čym sutyknułasia ŭ pryvatnym miedycynskim centry «MiedAvieniu», kudy pryjšła da hiniekołaha zrabić bijapsiju endamietryja: «Usio prajšło dobra, ale na resepšenie mnie ahučyli sumu ŭ 150 rubloŭ. Ja spytała, čamu tak šmat, mnie vydali ček i za bijapsiju, i za kansultacyju».

Pavialičyć

Klijentka aburyłasia, bo ličyć, što nijakaj kansultacyi nie było (na sajcie «MiedAvieniu» paznačana, što aśpiracyjnaja bijapsija z połaści matki kaštuje ad 65 rubloŭ). Administratarka paraiła vyśviatlać hetaje pytańnie napramuju z doktarkaj.

Žančyna śćviardžaje, što ŭ toj momant nie vielmi dobra siabie adčuvała, tamu vyrašyła abmierkavać situacyju na nastupnym pryjomie. Tym bolš heta byŭ nie pieršy jaje vizit da hetaj śpiecyjalistki, a čaćviorty.

Ale praź niekalki hadzin Natalla pabačyła, što toj samy hiniekołah abmiarkoŭvaje jaje vypadak u svaim błohu ŭ instahramie:

«U storys u hetaha lekara biez ukazańnia majho imia vychodzić cełaja historyja, jak abiasceńvajuć jaje pracu, jak jana dźmuła mnie ŭ adno miesca, a ja aburyłasia canoj. Što jana nie lekar dla ŭsich i kali kamuści štości nie padabajecca, to treba chadzić u palikliniku, i kamunikacyju sa mnoj jana spyniaje, analizy prosta potym mnie addaść na ruki i adpravić da inšaha doktara».

Paśla klijentka napisała doktarcy, kab razabracca ŭ situacyi, ale taja zabaniła Natallu. Paźniej doktarka paćvierdziła ŭ storys, što nie abaviazana razmaŭlać z pacyjentkami ŭ niepracoŭny čas, tamu napisała žančynie, što kamunikavać ź joj budzie tolki ŭ ścienach kliniki, a paśla zabłakavała jaje.

Druhaja hierainia kanfliktu — hiniekołah Alena Vajciachovič ź Minska, jakaja davoli aktyŭna viadzie błoh u instahramie i maje 39 tysiač padpisčykaŭ. U apisańni profilu paznačana: «Piaščotny doktar z žorstkimi pryncypami», «Spačatku ty budzieš mianie bajacca». Chutčej za ŭsio, užo paśla pačatku skandału źjaviŭsia jašče adzin punkt — «Pajdu ŭ sud z pacyjentam».

Pavialičyć

Doktarka zaŭvažaje, što kali raspaviadała historyju Natalli, to nie nazvała imia, uzrost pacyjentki, dyjahnaz. Tamu jana ličyć, što nie parušyła zakon ab abaronie piersanalnych danych. U adnym ź vielmi emacyjanalnych storys Alena napisała:

«Słuchajcie! Vy ŭsie bačycie, chto ja! U mianie jość błoh. U mianie jość niejkija abstraktnyja historyi časam. Nu dyk nie idzicie da mianie na pryjom, kali vam tak strašna, što ja budu parušać miedycynskuju tajamnicu, padstaŭlać siabie i raskazvać pra vas «carycu takuju adzinuju i niepaŭtornuju». Łuchta, prosta łuchta!».

Hiniekołah taksama ličyć, što paśla dopisu Natalli na forumie (na toj momant akaŭnt žančyny byŭ adkrytym i pabačyć dopis moh luby karystalnik) inšyja mamy pačali jaje ckavać u internecie — u kamientaryjach i asabistych paviedamleńniach joj pačali pisać niepryjemnyja rečy.

Niechta pisaŭ aburanyja paviedamleńni i na staroncy miedycynskaha centra ŭ instahramie. Ad miedycynskaha centra aficyjnaj reakcyi na kanflikt pakul nie było. Darečy, kamientary pad apošnim dopisam miedcentra, dzie ludzi vykazvali svajo staŭleńnie da kanfliktu, ciapier zakrytyja.

Pavialičyć

Byli i tyja, chto padtrymaŭ doktarku ŭ hetaj historyi.

Na piaty dzień kanfliktu, pa słovach Aleny, Natalla vykazała žadańnie sustrecca ŭ miedycynskim centry na razmovu. Ale kanstruktyŭnaha dyjałohu nie atrymałasia.

Doktarka raspaviała, što byłaja pacyjentka napisała na jaje skarhi ŭ roznyja orhany. Sama ž Alena sabrała kalekcyju skrynšotaŭ, ź jakimi płanuje źviartacca ŭ sud. Jana kaža i pra namier napisać zajavu ŭ milicyju za arhanizacyju ckavańnia ŭ internecie.

Tym časam abmierkavańnie historyi ŭ sacyjalnych sietkach aktyŭna praciahvajecca. Videa ŭ tyktoku na hetu temu nabirajuć sotni tysiač prahladaŭ.

• 14
• 0
• 4
• 59
• 2
• 10
• 27
• 0