Niešta nie sychodzicca: Kitaj moža chłusić śvietu pra svoj realny vajskovy biudžet
Daśledčyki z Amierykanskaha instytuta pradprymalnictva (AEI) sumiesna z vyviedkaj ZŠA padličyli realny vajskovy biudžet Kitaja, a zatym paraŭnali jaho z aficyjnym. Roźnica vyjšła kałasalnaja.
Pavodle acenak i padlikaŭ Amierykanskaha instytuta pradprymalnictva (AEI) i raźviedki ZŠA, Kitaj uvodzić śviet u zman i zanižaje svoj vajskovy biudžet bolš čym u try razy.
U realnaści jon moža nie sastupać amierykanskamu i składać jak minimum 711 miljardaŭ dalaraŭ (710,6).
Hetaja ličba adnosicca da biudžetu Kitaja za 2022 hod (kitajskija ŭłady nazyvali tady zusim inšuju ličbu — 229 miljardaŭ), što moža śviedčyć pra jašče bolšyja vydatki na abaronu ŭ 2023-24 hadach, adznačaje AEI.
Dla paraŭnańnia, aficyjny abaronny biudžet ZŠA ŭ 2022 hodzie składaŭ 742 miljardy dalaraŭ. Uličvajučy novyja padliki AEI i amierykanskaj raźviedki, ZŠA i Kitaj iduć amal naha ŭ nahu ŭ płanie vajskovaha patencyjału i daloka zzadu pakidajuć za saboj usie astatnija krainy (asabliva Rasiju, jakaja taksama ličyć siabie vajskovaj zvyšdziaržavaj).
Što ŭvachodzić u 710,6 miljardaŭ kitajskich abaronnych vydatkaŭ? Ekśpierty AEI zajaŭlajuć, što vajskovy biudžet krainy raźmierkavany nastupnym čynam.
- $293 młrd — asabovy skład armii Kitaja.
- $120 młrd — navučańnie i absłuhoŭvańnie kitajskich sałdat.
- $135,2 młrd — materyjalnaje abstalavańnie Uzbrojenych sił.
- $116,2 młrd — kaśmičnaja prahrama, ratacyja i demabilizacyja, bierahavaja achova, vajskovaja palicyja, impart uzbrajeńniaŭ i budaŭnictva štučnych vyspaŭ.
- 45,8 młrd — navukova-daśledčyja i dośledna-kanstruktarskija raboty.
Daśledčyki AEI taksama źviartajuć uvahu na toj fakt, što ZŠA vymušanyja nakiroŭvać značnuju častku abaronnaha biudžetu dla absłuhoŭvańnia svajoj hłabalnaj sietki vajskovych baz i padtrymki sajuźnikaŭ, a Kitaj u svaju čarhu kancentruje svoj vielizarny biudžet tolki na rehijanalnym daminavańni.
Heta moža stać dla ZŠA surjoznym vyklikam u vypadku kitajskaha ŭvarvańnia na Tajvań i inšych patencyjnych kanfliktaŭ u Azii.
Jak vyhladaje 46-hadovy juryst Juraś Ziankovič praz try z pałovaj hady źniavoleńnia ŭ biełaruskaj turmie13
Kamientary