Polskija pieravozčyki płanujuć zabłakavać adziny šlach dastaŭki hruzaŭ ź Biełarusi ŭ Polšču
Polskija pieravozčyki i fiermiery padali ŭ administracyju Terespalskaj hminy zajaŭku na praviadzieńnie akcyi pratestu na aŭtadarozie numar 68 u rajonie Karoščyna, stała viadoma vydańniu Most. Heta faktyčna adzinaja mahistral, pa jakoj ciapier iduć hruzavyja pieravozki ź Biełarusi ŭ Polšču.
Ciaham miesiaca ŭdzielniki akcyi płanujuć prapuskać pa klučavoj trasie pa adnym hruzaviku ŭ hadzinu. Dla biełaruskich transpartnych kampanij i polskich kampanij ź biełaruskim kapitałam heta moža aznačać straty ŭ sotni miljonaŭ jeŭra. Jany ŭžo rychtujuć pietycyju na adras polskich uładaŭ z patrabavańniem nie dapuścić błakavańnia darohi.
Ciapier na polska-biełaruskaj miažy dziejničaje ŭsiaho adzin punkt propusku dla hruzavoha transpartu — «Kukuryki — Kazłovičy». Ad jaho aŭtamabili iduć pa 68-j trasie. Pratestoŭcy majuć namier pierakryć jaje pierad ujezdam u aŭtamabilny terminał.
Takim čynam, pabudavać maršrut u abjezd budzie praktyčna niemahčyma, ličać pieravozčyki: pobač prachodziać darohi, abmiežavanyja dla prajezdu aŭtatranspartu ahulnaj vahoj zvyš 20 ton.
U zajaŭcy, nakiravanaj arhanizatarami akcyi ŭ Terespalskuju ŭpravu (kopija dakumienta jość u redakcyi Most), adznačajecca, što pratestoŭcy majuć namier vyvieści na darohu 10 siedłavych ciahačoŭ i 10 adzinak sielskahaspadarčaj techniki. Čakanaja kolkaść udzielnikaŭ zajaŭlenaja vielmi abciakalna — ad 10 čałaviek da dźviuch tysiač. Pratest pavinien pačacca a 8-j ranicy 26 lutaha i praciahnucca da 31 sakavika ŭklučna.
U Polščy ŭzhadnieńnie akcyj maje paviedamlalny pryncyp, ale jany nie pavinny parušać zakanadaŭstva, u tym liku zabaronienaje poŭnaje błakavańnie daroh. Hety momant arhanizatary akcyi pastaralisia abyści:
u zajaŭcy paznačana, što ŭdzielniki buduć prapuskać hruzaviki pa raskładzie, z častatoj adna mašyna ŭ hadzinu ŭ kožny bok. Abmiežavańni nie buduć raspaŭsiudžvacca na transpart, jaki pieravozić žyvych žyvioł, a taksama na prajezd supracoŭnikaŭ pamiežnaj i śpiecyjalnych słužbaŭ.
Čaho chočuć udzielniki akcyi
Takimi dziejańniami inicyjatary akcyi sprabujuć damahčysia raźviazańnia prablem pieravozčykaŭ i fiermieraŭ.
Pa-pieršaje, jany patrabujuć viarnucca da sistemy vydačy dazvołaŭ na ŭjezd u Polšču dla hruzavoha transpartu na ŭkrainskich i małdaŭskich numarach.
Pa-druhoje, pratestoŭcy damahajucca zabarony na rehistracyju ŭ Polščy transpartnych kampanij z ukrainskim, biełaruskim i rasijskim kapitałam. Na dumku arhanizataraŭ akcyi, hety biznes akazvaje niehatyŭny ŭpłyŭ na stan polskich pieravozčykaŭ.
Paśla zabarony na ŭjezd u ES dla biełaruskich i rasijskich pieravozčykaŭ mnohija transpartnyja kampanii ź Biełarusi stali zdrabniać biźnies, rehistrujučy daččynyja pradpryjemstvy ŭ Polščy. Faktyčna heta davała mahčymaść adnamu i tamu ž pieravozčyku vieźci hruz na biełaruskaj fury da transpartna-łahistyčnaha centra na polskaj miažy, a ad TŁC i pa terytoryi Jeŭropy — užo na polskaj fury. Mabyć, tamu adnoj z metaŭ akcyi zajaŭlena źviartańnie ŭvahi polskich uładaŭ na nieefiektyŭnaść sankcyj, nakładzienych na Rasiju i Biełaruś.
Pa-treciaje, pratestoŭcy patrabujuć abmiežavać uvoz zbožža i płodaaharodninnaj pradukcyi z Ukrainy, a taksama adterminavać uviadzieńnie mier jeŭrapiejskaj ahrapalityki.
«My taksama chočam pracavać, i nam taksama jeści treba»
Błakavańnie 68-j darohi budzie pahibielnym dla biełaruskich pieravozčykaŭ. Pradstaŭniki haliny raskazali Most, što ŭžo padrychtavali pietycyju ŭ Terespalskuju ŭpravu z patrabavańniem zabiaśpiečyć prajezd pa trasie ŭ adpaviednaści z praviłami darožnaha ruchu.
«Idzie havorka nie pra miljony, a pra dziasiatki i sotni miljonaŭ jeŭra strataŭ. Toje, što jany zajaŭlajuć, — heta jak minimum prypynieńnie dziejnaści transpartnych kampanij, handlovych kampanij», — aceńvaje mahčymy ŭpłyŭ na halinu pradstaŭnik adnoj z arhanizacyj-pieravozčykaŭ.
Jon havoryć, što biełarusy nie buduć patrabavać zabarony akcyi, ale chočuć harantavać mahčymaść prajezdu pa trasie.
«Mohuć na ŭzbočynie [pratestavać], mohuć [adnu] pałasu pierakryć. Heta ich prava. My na jaho nijakim čynam nie ŭpłyvajem. Ale my taksama chočam pracavać, i nam taksama jeści treba. Pierakryćcio transpartnych vuzłoŭ — heta ŭžo pierabor», — havoryć surazmoŭca, adznačajučy, što realnaja meta pratestoŭcaŭ — «vyciaśnieńnie transpartnych kampanij z zamiežnym kapitałam».
Pry hetym krynica pazityŭna aceńvaje pierśpiektyvy paŭpłyvać na ŭłady Terespala, kab prajezd pa trasie ŭsio ž taki byŭ zabiaśpiečany. Pa-pieršaje, jon spasyłajecca na praviły darožnaha ruchu, jakija zabaraniajuć błakavańnie. Pa-druhoje, źviartaje ŭvahu, što bolš za miesiac prastoju ŭdaryć nie tolki pa biełaruskich pieravozčykach, ale i pa polskich miascovych biudžetach.
«Heta zakranie biudžety haradoŭ Terespal i Biała-Padlaska i pobač źmieščanych haradoŭ», — miarkuje surazmoŭca.
Čytajcie taksama:
«Pucin, naviadzi paradak». Polski fiermier pryjechaŭ pratestavać na miažu z takoj prośbaj
Polskija fiermiery pierakryli miažu z Ukrainaj i nie prapuskajuć navat pasažyraŭ
Łatvija zabaraniła ŭvoz sielhaspradukcyi ź Biełarusi i Rasii
Pamiatajecie pravakatara i danosčyka Jaŭhiena Kakojta? Jon ciapier taksama palitviazień12
Kamientary