Najlepšy ŭ śviecie servis, vielmi pryhoža i ŭsiudy supiersmačna. Nievidavočny kirunak dla zimovaha adpačynku

Jak zrabić vizu ŭ Japoniju

Biełarusam u Japoniju patrebnaja viza. Dobraja navina — jana darmovaja, robicca biez prablemaŭ. Dla vizy treba dakazać, što ŭ vas jość hrošy na rachunku (raźlik kala 100 jeŭra/noč) i pakazać broni hatelaŭ i transpartu. Darečy, miedyčnaja strachoŭka niepatrebnaja.

Pieršy raz vam jaje daduć na try miesiacy pad daty vandroŭki (mohuć być niaznačnyja adchileńni). Admovy ŭ vizie nie budzie, ale budziecie danosić dakumienty, jakija paćviardžajuć vaš maršrut — broni hatelaŭ, kvitki na ciahniki i samalot. Moža zaniać šmat času.

Nie rekamienduju padavacca ŭ ambasadzie Japonii ŭ Biełarusi. Supracoŭniki tam (pryčym biełarusy) vialikija biurakraty, prosta žach. Paprasili raśpisać kankretny štodzionny (!) płan majoj vandroŭki. Taksama padavaŭsia na japonskuju vizu ŭ ambasadzie ŭ Bierlinie i Niderłandach, i ŭ hetych ambasadach nie patrabavali. 

Japonija vielmi adroźnivałasia ad taho, što ja bačyŭ da hetaha. Pierš za ŭsio, mianie ŭraziła rekłama tualetaŭ adrazu ŭ aeraporcie. Ja takoha da hetaha času nie bačyŭ u inšych krainach.

Pa-druhoje, mianie vielmi ździvili ciahniki ŭ takijskim mietro, jakija jeździać pa maršrutach, a nie pa vietkach, tamu nie zaŭsiody zrazumieła, kudy na ich dajedzieš.

Pavialičyć

Ad zaśniežanaha harnałyžnaha kurortu da trapičnych plažaŭ

Padčas svaich vizitaŭ u Japoniju ja abjeździŭ ledź nie ŭsiu krainu. Ale čaściej za ŭsio byvaŭ u horadzie Sapara na poŭnačy krainy, niedaloka ad Kurylskich astravoŭ. Ludzi z toj častki Japonii mocna adroźnivajucca ad astatniaj krainy. Ich prodki ŭ asnoŭnym źbiehli ad palityčnaha ci inšaha pieraśledu, tamu nie lubiać raspaviadać pra svajo siamiejnaje dreva, čym adroźnivajucca ad inšych japoncaŭ, jakija vielmi dobra viedajuć hienieałohiju na 500 hadoŭ ci bolej. 

Heta samaja chałodnaja častka Japonii. Vielmi pryhožaja pryroda, hory, śnieh. Tudy lubiać pryjazdžać amierykancy i aŭstralijcy — adnolkavy časavy pojas dla apošnich. Adjedzieš 30 chvilin na aŭtobusie ad Sapara, i ŭžo možaš katacca na hornych łyžach. A pobač znachodzicca nievialički haradok Niseko, papularny harnałyžny kurort. U mianie takoje ŭražańnie, što tam fryłansieraŭ bolš, čym zvyčajnych žycharoŭ.

Pavialičyć

Japonija — nievialikaja kraina, ale vielmi vyciahnutaja. Na samym poŭdni tam jość archipiełah Riuku, a samy vialiki vostraŭ Akinava. Ja mierkavaŭ pajechać tudy pahrecca, ale ŭzimku tam siezon daždžoŭ. Tamu niahledziačy na ciopłuju vadu ja zdoleŭ papłavać tolki adzin raz. 

Akinava — heta radzima fiłasofii «ikihaj» — vučeńnia pra pačućcio prynaležnaści, razumieńnie svajho miesca ŭ žyćci. Mahčyma, tamu tamašnija žychary vielmi rassłablenyja. Aproč hetaha tam vielmi pryhožaja pryroda. Papularnaje miesca dla adpačynku nie tolki siarod japoncaŭ, ale i ludziej ź Jeŭropy, ZŠA, Aŭstralii.

Nievysokija ceny (asabliva dla takoj raźvitoj krainy)

Ceny ŭ Japonii vas pryjemna ździviać. Zaraz jena mocna ŭpała, tamu šmat jeŭrapiejcaŭ i amierykancaŭ pryjazdžajuć u Japoniju na adpačynak. Naprykład, da pandemii hatel u Tokia kaštavaŭ 60 jeŭra. Stolki ž kaštavaŭ hatel u Bierlinie. Zaraz hatel u Bierlinie kaštuje 120 jeŭra, a ŭ Tokia — 90 jeŭra. U inšych vialikich haradach možna źniać dobry trochzorkavy hatel sa śniadankam za 40 jeŭra/noč. 

Ježa ŭ Japonii ŭ kramach daražejšaja za Bierlin, ale kaviarni i restaracyi na 30% tańniej. Naprykład, ramen možna nabyć za 4 jeŭra. Takija ceny pa ŭsioj Japonii, Moža tolki ŭ Tokija trochi daražej. I smačna budzie ŭ 99% miescaŭ, navat samych tannych. Dy jakaść ježy i servisu značna lepšyja za jeŭrapiejskija krainy.

Japoncy vielmi lubiać pajeści, heta adna z hałoŭnych metaŭ i asałodaŭ ichniaha žyćcia. Naprykład, jak u mnohich inšych azijackich krainach, tut całkam narmalna zdymać kvateru biez kuchni i prosta jeści štodnia nie doma. 

Pavialičyć

Japoncy vielmi lubiać pajeści

U kožnaj prefiektury (rehijonach) krainy svaja ježa sa svaimi asablivaściami. Šmat chto naviedvaje Japoniju, tolki kab pajeździć pa roznych haradach dy pakaštavać łakalnyja rameny. 

Japonskaja kuchnia — heta nie tolki sušy. Choć zaznaču, što ich šmat jaduć. Ale tolki nihiry (samyja prostyja sušy — tolki nory i ryba). Usie hetyja rołły a-la «Fiładelfija» — nie pra sapraŭdnuju Japoniju, ale zaraz i jany stanoviacca papularnymi. Hałoŭnaje ŭ miascovych sušy — heta smačnaja i śviežaja ryba, i jaje musić być šmat. 

Akramia sušy jašče lubiać ramen, kare (rys ź miasam i padliŭkaj, vielmi smačna!). Papularnaja i aryhinalnaja indyjskaja kuchnia, jakuju robiać sapraŭdnyja vychadcy ź Indyi. Jość i sup-kare. Papularna tempura (niešta nakštałt klaru), asabliva harodnina ŭ tempury. Jašče ja lublu tonkacu — vielmi padobna da šnicela.

Kali kazać pra napoi, to tut jość bolš za 10 vidaŭ koka-koły. Jość navat sa smakam sakury! Mnie padabajecca napoj karpis. Ciažka apisać, što heta dakładna, najbolš mocna hety napoj nahadvaje sodu z małakom. Z ałkaholnych napojaŭ šmat pjuć sake dy vino sa ślivy. Jość i harełka z bulby, mocnaja, pad 50%.

Stereatypy pra japoncaŭ 

Mnie ciažka abahulniać japoncaŭ. Kožny čałaviek maje svoj charaktar i asablivaści. Tamu mnie ciažka vykazvacca za ŭvieś narod. 

Ale dakładna skažu, što japoncy amal uvohule nie razmaŭlajuć pa-anhielsku. Kali pačynaješ ź imi razmaŭlać, to mnohija prosta ŭciakajuć. Adzinaje miesca, dzie z hetym amal niama prablemaŭ — Tokia. Šmat žycharoŭ vyvučyli movu padčas padrychtoŭki da apošniaj Alimpijady. 

Jašče jość stereatyp, što japoncy nie pakazvajuć svaje emocyi. Heta častkova praŭda. Ale, naprykład, u Akinavie zusim inakš — miascovyja vielmi rassłablenyja i adkrytyja. Taksama častkova praŭdaj źjaŭlajecca stereatyp pra pracavitaść japoncaŭ. Mahčyma, tamu ich składana sustreć za miažoj. Japoncy vandrujuć tolki kali vučacca va ŭniviersitecie abo ŭžo na piensii. Tut nie pryniata brać adpačynak. 

Pavialičyć

Kudy varta pajechać u Japonii, kali vy tam upieršyniu:

Voś moj asabisty top-5: 

• Staraja stalica Japonii Kijota, horad sa šmatlikimi starymi chramami i aŭtentyčnaj kulturaj.
  
  
• Sintaiscki chram kala Chirasimy.
  
  
• Kaniešnie ž, stalica krainy Tokia, samy vialiki horad na płaniecie, dzie žyvie bolš za 40 młn čałaviek.
  
  
• Kavałak Isłandyi ŭ Japonii, što zaviecca Onsen — miesca z haračymi krynicami.
  
  
• Nara — jašče adna staraja stalica Japonii, ludzi tam vielmi lubiać aleniaŭ. Jany źjaŭlajucca sakralnymi žyviołami i vymahajuć ježu ŭ turystaŭ. Kali nie dasi ježu, to buduć ciahnuć i badacca. 

U Japonii vielmi pryhožaja pryroda i dobraja infrastruktura, tamu kraina vas dakładna ździvić. Pa krainie zručna vandravać. U Japonii jość mahčymaść nabyć prajaznuju kartku, jakaja pracuje na ŭsich ciahnikach i amal usich aŭtobusach unutry krainy — Japanese Rail Pass. 

Pavialičyć

Čamu varta jechać u Japoniju 

• Najlepšy servis u śviecie. Paŭsiul cudoŭnaje absłuhoŭvańnie. Ź cikavostak: u Japonii nie pryniata davać čajavyja. Kali pakidaješ niekalki maniet, to ludzi pabiahuć za taboj, kab viarnuć. Ličać, što zaŭsiody musić być dobry servis i nie treba dadatkova płacić. 
  
  
• Vielmi pryhožaja i inšaja ad Jeŭropy pryroda. 
  
  
• Ludzi, jakija vielmi adroźnivajucca ad jeŭrapiejcaŭ. Japoncy pabudavali mocnuju, vybitnuju, samabytnuju kulturu. 
  
  
• Usia Japonija vielmi mocna nasyčanaja historyjaj. Tut narmalna, kali niekatoryja firmy isnujuć niekalki stahodździaŭ. 
  
  
• Ježa! Paŭsiul supiersmačna. 

Padsumoŭvajučy, mahu skazać, što Japonija — vielmi raznastajnaja i cikavaja kraina, vielmi svojeasablivaja. I dziakujučy svajoj hieahrafii, i dziakujučy historyi. Tamu siudy varta pryjazdžać, kab adkryć niešta novaje. Tak, ź Jeŭropy lacieć doŭha i doraha. Ale padarožža siudy — varta taho. 

• 30
• 0
• 3
• 3
• 1
• 5
• 9
• 0