«Bolš za pałovu majho ofisa vykarystoŭvała hetuju vizu prosta dla padarožžaŭ». Što dumajuć ajcišniki pra zakryćcio prahramy Poland.Business Harbour

Daniła (25 hadoŭ): «U našaj kampanii ničoha nie buduć rabić: usie, chto chacieŭ, užo pierajechali»

«U mianie jość dziejnaja viza PBH, užo druhaja. U kampanii ŭsie, chto chacieŭ, užo taksama pierajechali. Chto nie chacieŭ, atrymali pieršuju PBH, i jana prosta skončyłasia. Druhuju vizu ŭžo ŭsio adno tak prosta nie adkryvajuć: patrebnyja paćvierdžańnie z pracy i vypłata padatkaŭ.

Dumaju, u nas pakul ničoha nie buduć rabić, tamu što niama asablivaj nieabchodnaści ŭ takich vizach. Napeŭna, kali budzie treba, ludzi buduć rabić prostyja pracoŭnyja. Mnie kazali, što taksama adkryjuć takuju, kali ja raptam atrymaju admovu ŭ PBH.

U hetym vypadku vizu PBH zrabić našmat praściej. Pa joj možna pracavać jak IP, a voś z pracoŭnaj ludziej treba abaviazkova afarmlać u štat. Dyj mienš pytańniaŭ na miažy ź pieršym typam viz: pa pracoŭnych treba bolš paćvierdžańniaŭ, naprykład, damova i inšyja papiery.

Admiena PBH niepryjemna ŭskładniaje praces rełakiejtu, ale nie vyklučaje jaho. Kampanijam stanie ciažej pieravozić novych supracoŭnikaŭ. Adnak, nakolki mnie viadoma, ciapier davoli redka biaruć na pracu niepasredna ŭ Biełarusi i pieravoziać. Na hety momant u Polščy šmat ruskamoŭnych. Našmat zručniej adrazu na miescy ŭładkoŭvać užo lehalizavanych ludziej.

Ciapier ja ŭžo padaŭsia na polski DNŽ, tamu na mnie hetaja navina nijak nie adabjecca».

Maša (22 hady): «Pałova majho ofisa adkryła hetyja vizy i ŭvieś čas jeździć tudy-siudy ŭ padarožžy»

«Ja radaja, što paśpieła adkryć svaju vizu. Ja chutka źbirajusia pierajazdžać u Polšču, tamu jana mnie vielmi patrebnaja. Maja viza zakančvajecca ŭ kastryčniku. Da žniŭnia ja pavinna pryniać rašeńnie, ci budu zastavacca ŭ Polščy, ci ruchacca dalej i pastupać u jeŭrapiejski ŭniviersitet.

Da siońniašniaha dnia, kali b ja vyrašyła zastavacca ŭ Polščy, u mianie było b dva varyjanty: padavacca na paŭtornuju PBH albo ŭžo na DNŽ. Viadoma, PBH kudy bolš prostaje i hnutkaje, ale takoj opcyi, na žal, bolš niama. Tamu, kali ja prymu rašeńnie zastacca ŭ Varšavie, budu padavacca na DNŽ.

Choć dla mianie admiena takoha typu vizy nie vielmi pryjemnaja navina, ja mahu zrazumieć, čamu palaki tak zrabili. Bolš za pałovu supracoŭnikaŭ majho ofisa atrymali svaje vizy PBH. Tolki 5% ź ich nasamreč pierajechali ŭ Polšču, astatnija katalisia pa ŭsioj Jeŭropie na jaje padstavie. Viadoma, polskim uładam heta nie budzie padabacca».

Alaksiej (32 hady): «Pracoŭnuju vizu dakładna nie budu rabić — dumaju, potym mohuć uźniknuć prablemy ź viartańniem u Biełaruś»

«Ja doŭha adkładaŭ pierajezd, tamu ciapier usio jašče znachodžusia ź siamjoj u Biełarusi. Niadaŭna atrymaŭ admovu ŭ vizie PBH i padaŭsia na apielacyju. Kali mnie znoŭ admoviać, to ŭ Polšču ja dakładna nie pajedu.

Mianie biantežać vysokija ryzyki, jakija źjaŭlajucca pa zvyčajnaj pracoŭnaj vizie, i prablemy ź lehalizacyjaj. Dumaju, što potym u mianie jašče mohuć uźniknuć składanaści z vyjezdam za miežy Polščy. Zdajecca, što ajcišniku, jaki pryjazdžaje z Polščy ŭ Biełaruś, całkam mohuć zładzić viasiołaje žyćcio na roŭnym miescy. Tamu faktyčna ja rablusia zakładnikam situacyi i nievyjaznym z Polščy.

Pry čarhovaj admovie ja budu źjazdžać u Hruziju i tam hladzieć, ci źmienicca palityka Polščy i ci źjavicca novy typ viz.

Što tyčycca admovy ŭ majoj vizie PBH, to, pa čutkach, ich davali absalutna vypadkovym čynam navat biez razhladu dakumientaŭ. Pašancavała trapić u pakiet — uchvalili, nie pašancavała — admova.

4 studzienia, naprykład, padavaŭsia chłopiec z hodam vopytu, i jamu ŭchvalili vizu. 5-ha čysła padavaŭsia ja z profilnaj adukacyjaj, 14 hadami stažu i vysokaj pazicyjaj — admova.

Kali kazać pra ŭpłyŭ zakryćcia Poland.Business Harbour na IT-siektar, to, mnie zdajecca, budzie nastupny vynik (albo niešta adno z hetaha, albo kambinacyja):

• Ludzi pačnuć atrymlivać pracoŭnyja vizy i pracavać praź inkubatary. Heta składany varyjant, tamu vialikija kampanii naŭrad ci zachočuć z takim pracavać.
• Masavy pierajezd ajcišnikaŭ u Hruziju, Kazachstan i inšyja krainy ŭschodniaha rehijonu.
• Ajcišny rynak pracy ŭ RB niasłaba ŭskałychniecca dempinham zarobkaŭ i vysokaj kankurencyjaj. Upeŭnieny, što ofisy Playtika i Apalon nie apošnija, chto zakryjecca ŭ Biełarusi. Na hetym fonie, dumaju, budzie baraćba za najaŭnyja vakansii — kali tolki kampanii z Rasii nie adkryjuć vahon prapanoŭ. Tady ŭžo pryjdziecca vybirać pamiž kašalkom i pryncypami.

Nadziei na starych niama. Najom daŭno zamarožany (ci amal). Prajektaŭ, hatovych pracavać ź Biełaruśsiu, zastałosia vielmi mała. Jość vierahodnaść, što miascovyja kampanii aktyvizujucca i buduć prapanoŭvać supracoŭnikam pracavać praz VPN. Niekatoryja kampanii ŭžo tak robiać».

Dzina (32 hady): «Dumaju, heta nie poŭnaja zabarona na emihracyju dla IT»

«Na mianie admiena prahramy nijak nie ŭpłyvaje. Dy i ŭ cełym ja dumaju, što heta skaračeńnie mahčymaściaŭ dla manieŭru, ale nie poŭnaja zabarona na emihracyju dla IT.

Prahrama była vielmi dobraj mahčymaściu dla pierajezdu. Chto razumieŭ, toj užo joj skarystaŭsia — usio ž taki Poland.Business Harbour dziejničała cełych try hady. Pry hetym išoŭ pastajanny praces uzmacnieńnia strohaści vydačy viz. Było ŭražańnie, što admiena prahramy — pytańnie času. Prosta nastupiła heta raniej, čym my dumali.

Ź inšaha boku, ja b dzialiła ludziej na tych, chto nie pierajechaŭ, ale chacieŭ by (dla ich pole mahčymaściaŭ stała vuziejšaje, ale zastałosia), i tych chto, užo emihravaŭ i čakaŭ DNŽ u «doŭhich vajavodstvach» nakštałt Urocłava.

Viedaju, što niekatoryja ludzi z druhoj katehoryi na hety čas rabili sabie vizy PBH. Mnie ich škada, tamu što, niahledziačy na lehalnaść znachodžańnia ŭ Polščy, jany buduć vymušanyja siadzieć u krainie biez prava vyjezdu ź jaje da vyniku razhladu DNŽ.

U teoryi možna sprabavać na hety čas rabić pracoŭnuju vizu, ale mnie zdajecca, što heta na paradak składaniej. Z treciaha boku, zakryvajecca šlach dla tych, chto ŭžo ŭ Polščy i chacieŭ «pieraskočyć» z kantraktu na IP (šlach byŭ składany, ale jon byŭ — praz admovu ad DNŽ pa pracy i atrymańnie novaj vizy PBH). Ciapier dla hetaha pryjdziecca čakać polskaha PMŽ.

U cełym, heta ŭsio niepryjemna, ale nie fatalna. Hałoŭnaje, chočacca pažadać tym, chto nie vielmi daŭno pryjechaŭ pa PBH i jašče nie padavaŭsia na DNŽ, dobra padumać nad lehalizacyjaj (praź IP ci pracu, kab potym nie škadavać pra vybar).

Jašče ja b parazvažała nad miescam žycharstva. Kali praca nie pryviazanaja da horada, to ja ščyra nie razumieju, čamu ludzi jeduć u toj ža Urocłaŭ. Tam terminy čakańnia DNŽ kala 1-2 hadoŭ».

Hiena (35 hadoŭ): «U lubym vypadku zastajecca varyjant z pracoŭnaj vizaj»

«Dumaju, heta całkam łahičny chod palakaŭ. Buduć ciarpieć tolki tyja, chto jeździŭ u Polšču na zakupy. Kankretna dla mianie asabliva ničoha nie źmienicca.

Ja try miesiacy čakaŭ zapisu na atrymańnie hetaj vizy, ale mianie tak i nie dadali ŭ śpisy: miarkujučy pa ŭsim, z-za čarhi. Samomu daty niemahčyma było złavić, a praz pasiarednikaŭ ja taksama nie adzin taki. U kožnym vypadku dastupnaja pracoŭnaja viza, jakuju možna zrabić z dapamohaj inkubatara».

• 6
• 0
• 6
• 4
• 2
• 5
• 10
• 0