Siońnia pačynaje pracu słužba «Adno akno», jakuju zapuścili demsiły
Nad stvareńniem hetaj płatformy, jakaja praduhledžvaje kansultavańnie i dapamohu pa roznych sacyjalnych prablemach, pracavała pradstaŭnictva pa sacyjalnaj palitycy Abjadnanaha pierachodnaha kabinieta. Pradstaŭnica Kabinieta Volha Harbunova padkreślivaje, što pakul heta piłotnaja viersija i baza danych, jakaja dapamoža ludziam vyrašać svaje prablemy, budzie pašyracca.
«Słužba «Adno akno» — praciah idei marafonu salidarnaści «Nam nie ŭsio adno!».
Pavodle Volhi Harbunovaj, pradstaŭnictva pa sacyjalnaj palitycy Kabinieta šmat razvažała nad tym, jakija jašče instrumienty možna stvaryć, kab być karysnymi.
«Da nas idzie vialikaja kolkaść zapytaŭ roznaj tematyki, jak ad ludziej ź Biełarusi, tak i ad tych, chto znachodzicca ŭ zamiežžy. Ludzi roznyja, i zapyty roznyja — heta i chatni hvałt, i biespracoŭje, i navat bytavy ałkahalizm. Ludzi časta nie ŭjaŭlajuć, kudy možna z hetym źviarnucca, adčuvajuć siabie adzinokimi ŭ svajoj prablemie. Kansultavać indyvidualna ŭ takich vypadkach — vielmi składanaja zadača, bo heta moža paralizavać našu pracu, kali my ciesna zojmiemsia pryvatnaj prablemaj. Tamu my prydumali taki instrumient jak słužba «Adno akno», jakaja ŭjaŭlaje saboj bazu danych arhanizacyj, što akazvajuć kansultacyjnuju i praktyčnuju dapamohu pa roznych prablemach», — kaža Volha Harbunova.
Ciapier u bazie — 231 arhanizacyja, ale stvaralniki płatformy zaklikajuć da supracoŭnictva, kab jana pašyrałasia. Kali ŭ bazie nie znojdziecca supołak abo fondaŭ, jakija zmohuć dapamahčy ŭ niejkich kankretnych pytańniach, udzielniki prajekta buduć prapanoŭvać inšyja padychody da prablemy.
Volha Harbunova padkreślivaje, što pakul hety prajekt ruskamoŭny, bo hałoŭnaja meta — achapić jak maha bolš šyroki śpiektr roznych katehoryj biełarusaŭ i biełarusak jak u rodnaj krainie, tak i za miažoj. U pierśpiektyvie płanujecca pierakład bazy danych i ŭsich materyjałaŭ sajta płatformy na biełaruskuju movu, a kamunikavać z udzielnikami prajekta možna i pa-rusku, i pa biełarusku.
Jak heta pracuje?
«My raspracavali sajt, dzie sabrali infarmacyju pra roznyja struktury, hatovyja akazvać dapamohu. Znoŭ-taki, pakul heta naš piłotny prajekt, my pačali z błoka infarmacyi (53 materyjały), jakaja pieradusim moža być karysnaj dla palitźniavolenych i ich siemjaŭ. Ale heta zusim nie aznačaje, što inšyja katehoryi ludziej zastanucca pa-za ŭvahaj. My prosim źviartacca ŭsich i pastarajemsia dapamahčy kožnamu. Paźniej na sajcie źjaviacca materyjały i ŭ dapamohu tym, chto byŭ źniavoleny i ŭžo vyzvaliŭsia, i tym, chto byŭ vymušany pakinuć Biełaruś», — kaža vałanciorka prajekta Nasta Bazar.
Źviarnucca ŭ «Adno akno» možna taksama praz Instagram, Telegram i Viber. Jość taksama koł-centr, dzie na suviazi štodnia znachodziacca try žančyny-apieratarki. Jany prajšli admysłovaje navučańnie, aryjentujucca ŭ najaŭnaj bazie i hatovyja dapamahčy maksimalna chutka.
Darečy, prajekt «Adno akno» moža dapamahčy nie tolki pryvatnym asobam, ale i arhanizacyjam, da jakich časta źviartajucca ludzi sa svaimi sacyjalnymi prablemami.
Volha Harbunova ličyć, što pieršasnaja zadača hetaha instrumienta — padtrymka ŭ pošuku nieabchodnaj infarmacyi.
Jašče adna zadača — heta praanalizavać zapyty, i što asabliva istotna — niepasredna ź Biełarusi. Zvaroty ludziej śviedčać pra najaŭnaść prablem. Stvaralniki słužby «Adno akno» padkreślivajuć, što pryniali ŭsie zachady, kab ananimizavać tych, chto źviartajecca, tamu źviartacca tudy biaśpiečna.
«Damokłaŭ Mieč». Kanał «Biełorusskij siłovik» nastolki prarasijski, što mnohija mierkavali, što heta rasijanie jaho viaduć. Nie, za im staić supierahient Łukašenki25
Kamientary