«My pracujem, kab biełarusy nie zastalisia biez pašpartoŭ» — Cichanoŭskaja
Ukaz Łukašenki robić prajekt pašparta novaj Biełarusi jašče bolš aktualnym — tak prakamientavaŭ novy łukašenkaŭski ŭkaz namieśnik kiraŭnicy Abjadnanaha pierachodnaha kabinieta Valer Kavaleŭski.
Na sajcie Łukašenki źjaviŭsia ŭkaz №278, jaki pazbavić biełarusaŭ mahčymaści atrymlivać i abmieńvać pašparty Respubliki Biełaruś pa-za miežami krainy, a taksama abmiažuje inšyja pravy biełarusaŭ.
«Siońnia režym Łukašenki admoviŭ biełarusam u konsulskaj dapamozie. Tym samym dziaržava samaŭchiliłasia ź jašče adnoj śfiery žyćcia, dzie pavinna kłapacicca ab hramadzianach», — tak prakamientavała novy ŭkaz Cichanoŭskaja.
Jana paabiacała pravieści kansultacyi ź Jeŭrakamisijaj, a taksama padniać hetaje pytańnie pierad Jeŭraparłamientam i padčas Hienasamblei AAN.
Cichanoŭskaja zaklikała biełarusaŭ nie panikavać i nie rabić nieabdumanych učynkaŭ — viartacca na radzimu, kali tam pahražaje pieraśled.
«Bo ni adzin dakumient u śviecie nie varty čałaviečaj svabody. Hałoŭnaje — pakłapaciciesia pra siabie i svaju biaśpieku. Bo ludzi — heta hałoŭnaja kaštoŭnaść Biełarusi», — adznačyła Cichanoŭskaja.
Namieśnik kiraŭnicy Kabinieta Valer Kavaleŭski vykazaŭ pazicyju Abjadnanaha pierachodnaha kabinieta Biełarusi ŭ suviazi z padpisańniem ukaza.
«Heta jašče adzin represiŭny miechanizm z boku režymu Łukašenki, jaki robić prajekt nacyjanalnaha pašparta novaj Biełarusi jašče bolš aktualnym dla ŭsich biełarusaŭ.
Vidavočna, što złačynny režym admaŭlajecca vykonvać svaje bazavyja abaviazki pierad hramadzianami Biełarusi, pieraŭtvarajučy zvyčajnyja dziaržaŭnyja funkcyi ŭ elemient cisku i represij. Heta čarhovy krok u pošuku «vorahaŭ», parušeńnie fundamientalnych pravoŭ hramadzian i ludziej, što jašče raz demanstruje ŭsim antynarodnuju sutnaść režymu ŭzurpatara.
Kroki antynarodnaha, niezakonnaha režymu Łukašenki paćviardžajuć, što stvareńnie nacyjanalnaha pašparta — abhruntavanaje i aktualnaje dziejańnie, krynica jakoha nie palityčny «chajp», a ŭžo siońnia žyćciovaja nieabchodnaść dziasiatkaŭ tysiač hramadzian Biełarusi, i ŭ pierśpiektyvie — pry takoj palitycy režymu — značna bolšaj kolkaści hramadzian», — napisaŭ jon.
Cichanoŭskaja abmierkavała z premjer-ministram Bałharyi prajekt «pašparta novaj Biełarusi»
«Patelefanavali ź Biełarusi i skazali anulavać». Biełarusy raskazali, jak mianiali i praciahvali dziejańnie biełaruskaha pašparta ŭ Polščy
U Polščy moža žyć bolš za 300 tysiač biełarusaŭ. Heta praktyčna nasielnictva Mahilova
Šmatdzietnaja maci Volha Załatar vyjšła na svabodu, całkam adbyŭšy čatyrochhadovy termin6
Kamientary