Volha Karač sklikała pres-kanfierencyju — paraŭnała siabie ź Mierkiel, Bialackim i zajaviła, što biełaruski režym chacieŭ jaje zabić
Dniami Volha Karač zajaviła, što jaje padazrajuć u pahrozie nacyjanalnaj biaśpiecy Litvy i ŭ supracy z rasijskimi śpiecsłužbami. Kab usio patłumačyć, palityk arhanizavała ŭ Vilni pres-kanfierencyju, ale pakinuła bolš pytańniaŭ, čym adkazaŭ.
Napačatku mierapryjemstva Karač spytała ŭ zale, chto tut ahient KDB ci FSB.
Razam z Volhaj da žurnalistaŭ vyjšaŭ advakat Rycis Saŭtkaŭskas. Na anhlijskaj movie Karač raskazała prysutnym, što jana pravaabaronca, padzialiłasia infarmacyjaj pra atrymanyja za pracu premii i pra «Naš dom» — pravaabarončuju arhanizacyju ŭ Vilni, jakuju jana ŭznačalvaje.
Potym pierajšła da taho, jak jaje bačać biełaruski i rasijski režymy. Paraŭnała siabie z Anhiełaj Mierkiel — maŭlaŭ, u 2021-m Łukašenka abvinavaciŭ «spačatku Mierkiel, potym mianie» ŭ padryvie vuzła suviazi rasijskaha VMF u Vilejcy. Karač adznačyła, što ŭ Biełarusi jana ŭklučanaja ŭ śpis terarystaŭ. Taksama zhadała, što pra jaje zhadvali Ryhor Azaronak i Ihar Tur.
Jak da Karač, na jaje dumku, stavicca Maskva? Tut aktyvistka paviedamiła, što prapahandystka Volha Skabiejeva niekali paraŭnoŭvała Karač ź Irmaj Hrezie. Heta nacysckaja vajennaja złačynca, adna z supracoŭnic łahiera Aśviencim.
Paźniej Karač prakamientavała dziejańni Departamienta dziaržaŭnaj biaśpieki Litvy — ustanovy, jakaja paličyła jaje pahrozaj nacyjanalnaj biaśpiecy.
«Ja całkam niazhodnaja z arhumientami Departamienta dziaržaŭnaj biaśpieki. U śniežni 2021 hoda ja 17 dzion praviała ŭ schoviščy, bo litoŭskija čynoŭniki mnie pieradali, što biełaruski režym choča mianie zabić. Dahetul nikoha vinavataha nie znajšli».
A potym Karač pierajšła na emocyi: «Departujcie mianie ŭ Biełaruś, kali łaska, pahladzicie, što budzie. Mianie niadaŭna naminavali na Nobieleŭskuju premiju (heta zrabiła małaviadomaja struktura ź niajasnymi afilacyjami — «NN»). Zhadajcie Alesia Bialackaha, jaho taksama na jaje naminavali, i Litva pieradała biełaruskamu režymu infarmacyju pra jaho rachunki, jon trapiŭ u turmu. Adčuvaju, što moj vypadak padobny».
«Ja vielmi złaja, ja nie adstuplu, nie pierastanu dakazvać svaje imia i reputacyju. Viedaju, što ja nie ahient i nikomu nie dasyłała infarmacyi. Toje, što adbyvajecca ŭ Litvie, niejmavierna», — praciahnuła Volha.
Ciapier Karač žyvie ŭ Litvie pa dazvole na žycharstva, jaki skančvajecca 9 vieraśnia. Karač raskazała, što ŭ Litvie jana žyvie ŭžo dziesiać hadoŭ, a hod tamu vyrašyła padavacca na ŭciakactva, bo pačała adčuvać siabie niebiaśpiečna ŭ Litvie.
Padčas pres-kanfierencyi ŭ Volhi cikavilisia pajezdkaj u Maskvu ŭ 2015 hodzie — jana patłumačyła, što była tam na kanfierencyi na zaprašeńnie Andreja Suzdalcava i jaho asistenta Dźmitryja Bałkunca.
Ci sustrakałasia Karač ź ludźmi z rasijskaj raźviedki? Jana nie admaŭlaje takoj mahčymaści: «Kožny dzień sustrakaju dvaccać-piaćdziasiat čałaviek i nie mahu harantavać, što nie sustrakałasia sa špijonami».
Volha adznačyła, što viasnoj jana atrymlivała papiaredžańni ad Departamienta dziaržbiaśpieki, ale źmiest tych razmoŭ paabiacała zachavać da suda. Jana taksama admoviłasia kamientavać, što dakładna napisana ŭ rašeńni mihracyi nakont jaje — maŭlaŭ, baicca akazać cisk na sud.
Adznačym, Departamient dziaržaŭnaj biaśpieki Litvy paviedamiŭ, što pryčyny, praź jakija Karač paličyli pahrozaj, nie tyja, što jana ahučvaje publična.
Pavodle advakata Karač, rašeńnie ab admovie joj va ŭciakactvie jašče nie nabyło siły, i aktyvistka budzie padavać apielacyju. Vyjazdžać ź Litvy jana nie źbirajecca: «Ja budu tut. U [Departamienta] mihracyi dva varyjanty — pakinuć mianie tut ci adasłać u Biełaruś. Mnie padabajecca Litva, ja tut žyvu dziesiać hadoŭ».
Kali ŭ Karač nie atrymajecca ŭ litoŭskich sudach, jana hatovaja pajści ŭ mižnarodnyja instancyi.
«Naša Niva» — bastyjon biełaruščyny
PADTRYMAĆ«Hrantasosy kupajucca va ŭzajemnym kryvaduššy». Capkała aplavaŭ marafon salidarnaści
Kamientary