Ułady Francyi vyrašyli častkova apłačvać ramont staroha adzieńnia i abutku. Čamu i navošta
Ułady Francyi z kastryčnika ŭvodziać sistemu źnižak, jakija zaachvočvajuć ludziej nieści panošany abutak i vopratku ramantavać zamiest taho, kab vykidvać staroje i kuplać novaje. Ale ci pahodziacca na heta francuzskija modniki i modnicy i jak heta pačynańnie adabjecca na luksavych brendach?
Pa słovach pradstaŭnicy Ministerstva ekałohii i ŭstojlivaha raźvićcia Francyi Bieranže Kujar, kožny hod na zvałkach krainy apynajucca 700 tysiač ton adzieńnia i abutku, jak piša Bi-bi-si.
Kab pakončyć z hetaj marnatraŭnaj i škodnaj dla navakolnaha asiarodździa praktykaj, a zaadno padtrymać siektar ramontu abutku i adzieńnia i stvaryć novyja pracoŭnyja miescy, ułady raspracavali śpiecyjalnuju prahramu zaachvočvańniaŭ ahulnym koštam 154 młn jeŭra, raźličanuju na piać hadoŭ.
Majsterni, jakija dałučylisia da hetaj prahramy pa ramoncie abutku i adzieńnia, zmohuć prapanoŭvać klijentam źnižki, naprykład, 7 jeŭra za novy abcas abo 10-25 jeŭra za novuju padšeŭku dla spadnicy ci pinžaka.
Pa słovach Kujar, urad maje namier takim čynam zmahacca z praźmiernaściami industryi «chutkaj mody», u jakoj rečy časta nadziavajuć ličanuju kolkaść razoŭ, i zaachvočvać prychilnikaŭ «ścipłaj mody», hatovych ramantavać i łatać svajo adzieńnie i abutak.
Jak zajaŭlaje hrupa Refashion, jakoj było daručana raspracavać novuju zaachvočvalnuju schiemu, tolki ŭ minułym hodzie ŭ Francyi ŭ razdrobny prodaž pastupiła 3,3 młrd pradmietaŭ adzieńnia, abutku i roznych tkanin dla doma, što šmatkroć pieravyšaje realnyja patreby nasielnictva.
Biznes ustryvožyŭsia
Daloka nie ŭsie ŭ Francyi pierakananyja ŭ metazhodnaści i karyści novaj inicyjatyvy «adramantuj-zacyruj».
Biznes aścierahajecca, što heta moža niehatyŭna adbicca na hetak važnaj halinie lohkaj pramysłovaści krainy, a pradstaŭnik francuzskich pravych Eryk Paže nahadvaje pra ŭradavy doŭh u 3 tryljony jeŭra i prapanuje nie vykidvać na viecier i biez taho nievialikija hramadskija srodki.
Paskal Maran ź Fiederacyi vysokaj mody, pret-a-parte, kuciurje i tvorcaŭ mody zakłapočany tym, jak novaja inicyjatyva ŭładaŭ moža adbicca na luksavych brendach, jakimi tak znakamitaja Francyja.
«Šaŭkovaja arhanza (tonkaja prazrystaja tkanina) nie pavinna ličycca mienš daŭhaviečnaj, čym arhanza z paliesteru, zychodziačy z adnoj tolki fizičnaj tryvałaści», — paskardziŭsia jon u intervju haziecie Le Monde.
Jašče i markiroŭka…
Jašče adnym novaŭviadzieńniem francuzskich uładaŭ u baraćbie za daŭhaviečnaść pradmietaŭ adzieńnia i abutku stanuć novyja praviły markiroŭki, jakija ŭvodziacca z pačatku 2024 hoda i pavinny ŭklučać apisańnie ŭździejańnia na navakolnaje asiarodździe pry vytvorčaści kožnaj kankretnaj rečy.
Vytvorcam pryjdziecca zhadvać, kolki vady i chimikataŭ było vydatkavana pry vyrabie toj ci inšaj rečy, ci ŭtrymlivaje jana mikrapłastyk, jaki moža pratačycca ŭ navakolnaje asiarodździe, i ci byŭ u pracesie vytvorčaści vykarystany pierapracavany tekstyl.
Industryja mody ŭ Francyi, u jakoj zaniatyja mnohija tysiačy pracoŭnych ruk, ličycca adnym z najbujniejšych siektaraŭ ekanomiki, abarot jakoha ŭ minułym hodzie skłaŭ kala 66 młrd jeŭra.
Kraina zajmaje čaćviortaje miesca ŭ Jeŭropie pa eksparcie pradmietaŭ vysokaj mody, ale sami francuzy ŭ 2020 hodzie tracili na adzieńnie ŭ siarednim 430 jeŭra ŭ hod — mienš, čym u siarednim pa Jeŭropie.
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary