Fiederacyja amierykanskich navukoŭcaŭ nie znajšła paćviardžeńniaŭ zavozu jadziernaj zbroi ŭ Biełaruś

Na zdymkach navukoŭcy vyjavili budaŭnictva padvojnaj aharodžy pierymietru biaśpieki vakoł vajskovaha składa la Asipovičaŭ, jaki patencyjna moža być miescam zachoŭvańnia jadziernaj zbroi. Uźviadzieńnie dadatkovaj aharodžy pačałosia nieŭzabavie paśla naviedvańnia abjekta vysokapastaŭlenym aficeram rasijskaha Minabarony na pradmiet patencyjnaj madernizacyi dla zachoŭvańnia jadziernaj zbroi. Pra heta havorycca ŭ spravazdačy sa spasyłkaj na niejki zakryty dakład CRU ad kanca lutaha.

Aŭtary spravazdačy adznačajuć, što ŭ Asipovickim rajonie dysłakujucca puskavyja ŭstanoŭki dvajnoha pryznačeńnia «Iskander», jakija Rasija pastaviła Biełarusi ŭ 2022 hodzie. Cikava, što hety vajskovy skład zbroi znachodzicca prykładna za 25 kiłamietraŭ na paŭdniovy ŭschod ad zakinutaj vajskovaj bazy, jakuju, pavodle The New York Times, mohuć vykarystać dla raźmiaščeńnia bajcoŭ PVK «Vahnier».

Adnak heta nie aznačaje nijakaj suviazi pamiž hrupaj «Vahnier» i rasijskimi jadziernymi siłami ŭ Biełarusi, jakija buduć znachodzicca pad kantrolem 12-ha Hałoŭnaha ŭpraŭleńnia Minabarony Rasii, jak adznačajecca ŭ spravazdačy.

Jaje aŭtary padkreślivajuć, što jany nie mohuć adnaznačna vyznačyć, što skład pad Asipovičami pryznačany ci budzie ŭ budučyni skarystany dla zachoŭvańnia rasijskaj jadziernaj zbroi ŭ Biełarusi. Im nie ŭdałosia vyjavić nijakich vizualnych śviedčańniaŭ budaŭnictva tam adpaviednaj infrastruktury.

Jak adznačyli navukoŭcy, pierymietr biaśpieki na składzie ŭ Asipovičach maje 2 aharodžy, u toj čas jak na rasijskich abjektach zachoŭvańnia jadziernych abjektaŭ zvyčajna 3-4 linii aharodžy. Unutry aharodžy taksama nie vidać bunkiera, što ličycca jašče adnoj typovaj prykmietaj rasijskich schoviščaŭ jadziernaj zbroi.

Aproč fizičnaj abarony, dla jadziernaj zbroi patrabujucca schoviščy z rehulavanym klimatam, jak adznačajuć navukoŭcy. Nie vidać i abjektaŭ, dzie možna było b raźmiaścić asabovy skład rasijskaha 12-ha Hałoŭnaha ŭpraŭleńnia Minabarony RF (jano adkazvaje za jadzierna-techničnaje zabieśpiačeńnie i biaśpieku).

Akramia taho, skład znachodzicca pobač ź miescam zachoŭvańnia zvyčajnych vybuchovych rečyvaŭ. Było b vielmi dziŭna, kali b zvyčajnyja i jadziernyja bojehałoŭki zachoŭvalisia ŭ miežach adnaho i taho ž pierymietra, jak havorycca ŭ spravazdačy.

Pavodle navukoŭcaŭ, bolšaść rasijskich bazaŭ, dzie raźmieščanyja «Iskandery», majuć šyrokija dapamožnyja abjekty i miescy dla zachoŭvańnia rakiet. Pad Asipovičami ničoha takoha niama.

Mahčyma, biełaruskija vajskoŭcy vykarystoŭvajuć inšyja standarty zachoŭvańnia i patencyjna mohuć vykarystoŭvać zasypanyja ziamloj bunkiery, jak adznačajecca ŭ spravazdačy.

Aŭtary dakłada taksama vyvučyli spadarožnikavyja zdymki inšych vajskovych abjektaŭ u miescach, zhadanych u roznych spravazdačach (u pryvatnaści, aeradromy pad Lidaj i Baranavičami), ale nie znajšli vizualnych dokazaŭ, jakija pierakanaŭča pakazvajuć na najaŭnaść dziejnaha abjekta jadziernaj zbroi na terytoryi Biełarusi.

Pavodle ich, niama prykmietaŭ madernizacyi, nieabchodnaj dla razhortvańnia jadziernaj zbroi pad Lidaj. Na samych apošnich zdymkach možna zaŭvažyć budaŭnictva dadatkovaha pierymietra biaśpieki vakoł składa bojeprypasaŭ. Jak i ŭ vypadku z madernizacyjaj składa pad Asipovičami, druhi pierymietr biaśpieki nie abaviazkova praduhledžvaje raźmiaščeńnie jadziernaj zbroi, heta moža być prosta palapšeńnie najaŭnaj infrastruktury biaśpieki.

Byli taksama niekatoryja zdahadki, što avijabaza Baranavičy, abstalavanaja bolš sučasnymi źniščalnikami Su-30SM, moža być patencyjnym miescam raźmiaščeńnia jadziernaj zbroi. Ale i tam prykmietaŭ madernizacyi, nieabchodnaj dla hetaha, navukoŭcy pakul nie vyjavili.

• 3
• 0
• 1
• 1
• 0
• 0
• 1
• 0