«Dali padpisać papieru, što pry pieršaj mahčymaści źjaŭlusia ŭ minskaje RUUS». Biełaruskaha ajcišnika nie vypuskajuć z Armienii, bo jaho abjavili ŭ vyšuk u Biełarusi
Biełaruski ajcišnik Siarhiej (imia źmienienaje) kala hoda žyvie ŭ Hruzii. Nie tak daŭno jon pajechaŭ u Armieniju, kab zrabić vizaran. Ale na armianskaj miažy ajcišnika zatrymali i ciapier nie vypuskajuć z krainy. Vyjaviłasia, što jon abvieščany ŭ vyšuk u Biełarusi. Svaju historyju mužčyna raskazaŭ Dev.by.
Siarhiej — raspracoŭščyk u praduktovaj kampanii. U 2020 hodzie paśla vybaraŭ jon pravioŭ dvoje sutak na Akreścina. U kancy 2021 hoda ŭ jaho kvatery prajšoŭ pieratrus. Tady Siarhieja vazili na dopyt u HUBAZiK, ale paśla adpuścili.
Uletku minułaha hoda supracoŭniki HUBAZiK znoŭ źviazalisia z ajcišnikam i zaprasili «na hutarku». Ale jon da ich nie pajšoŭ i praź niekatory čas palacieŭ u Tbilisi.
Ciapier ža, kab pierazapuścić termin lehalnaha znachodžańnia ŭ Hruzii, vyrašyŭ pajechać u Armieniju. Alternatyŭny varyjant, Turcyja, «darahi i niazručny», a z Tbilisi da Jerevana chodziać maršrutki. Uviečary taho ž dnia ajcišnik źbiraŭsia viarnucca nazad.
«Hruzinskuju miažu prajšoŭ narmalna. Na armianskaj miažy pačalisia prablemy. Spačatku doŭha vyvučali moj pašpart, fatahrafavali, niešta abmiarkoŭvali. Potym adviali ŭ niejki pakoj, dzie ja prasiadzieŭ kala hadziny. Paźniej pryjechaŭ supracoŭnik palicyi, i mianie pavieźli ŭ pastarunak u Najembieran (nievialiki horad pobač ź miažoj).
Pa darozie supracoŭnik palicyi raskazaŭ, što ja znachodžusia ŭ vyšuku ŭ Biełarusi. Ja tak zrazumieŭ, što ŭ krain JEAES jość ahulnaja baza [asob, jakija vyšukvajucca], i kali kahości ŭ Biełarusi abviaščajuć u vyšuk, hetaja infarmacyja dastupnaja i palicyi Armienii. Tamu mianie byli abaviazanyja zatrymać.
Ja nie viedaju, kali na mianie była zaviedzienaja kryminalnaja sprava ŭ Biełarusi. Padazravaŭ, što mahu być u vyšuku, ale nie viedaŭ, što heta moža niejak paŭpłyvać na moj vizit u Armieniju.
Užo ŭ palicejskim učastku mnie dali padpisać papieru, što ja viedaju pra znachodžańnie ŭ vyšuku ŭ Biełarusi i pry pieršaj mahčymaści źjaŭlusia ŭ minskaje RUUS. Hetuju papieru sfatahrafavali i adpravili ŭ Biełaruś.
Pry mnie supracoŭnik armianskaj palicyi razmaŭlaŭ, jak ja zrazumieŭ, z supracoŭnikam MUS u Biełarusi. Ja nie čuŭ, pra što kankretna jany havaryli, ale
ŭ niejki momant supracoŭnik armianskaj palicyi skazaŭ: «Nie, nie majem na heta paŭnamoctvaŭ». Vykažu zdahadku, što ź biełaruskaha boku chacieli, kab mianie ci to zatrymali, ci to ekstradavali».
U palicejskim učastku Siarhiej pravioŭ kala čatyroch hadzin. Pavodle jaho, cisku z boku palicejskich nie było.
«U vyniku mianie adpuścili, ale papiaredzili, što ja nie zmahu pakinuć terytoryju Armienii, pakul znachodžusia ŭ vyšuku ŭ Biełarusi. Prapanavali vyrašyć pytańnie vyklučeńnia z bazy asob, jakija vyšukvajucca, u biełaruskaj ambasadzie.
«Ciapier ja ŭ Jerevanie. Znajomyja dapamahli na čas vyrašyć pytańnie z žyllom. Ja na suviazi z pravaabaroncami.
Siabar znajšoŭ biełaruskaha advakata, jaki žyvie ŭ Hruzii i budzie dapamahać dystancyjna. Napeŭna, budziem źviartacca ŭ MUS Armienii, kab znajści sposaby pakinuć terytoryju krainy.
Hrošaj pakul chapaje. Kampaniju ŭžo papiaredziŭ, što trapiŭ u takuju situacyju, ale zmahu pracavać addalena», — havoryć biełarus.
Heta ŭžo nie pieršy vypadak zatrymańnia biełarusaŭ u Armienii. U pačatku studzienia hetaha hoda pres-słužba palicyi Armienii paviedamiła pra zatrymańnie ŭ aeraporcie Jerevana hramadzianina Biełarusi na zapyt palicyi Luksiemburha. U krasaviku taksama ŭ aeraporcie armianskaja palicyja zatrymała jašče adnaho biełarusa Jaŭhiena Hucałava, jaki prylacieŭ u Jerevan z Turcyi i na toj momant znachodziŭsia ŭ vyšuku ŭ Biełarusi. Jaŭhien zmoh źjechać z Armienii tolki praz paŭtara miesiaca.
Kamientary