Zachodnija čynoŭniki adkazali, što budzie ź Biełaruśsiu ŭ vypadku zaklučeńnia miru pamiž Ukrainaj i Rasijaj
Žurnalist vydańnia «Lusterka» byŭ na sustrečy ministraŭ abarony NATA ŭ Bruseli, kudy pryjechaŭ prezident Ukrainy Uładzimir Zialenski z «płanam pieramohi», i ŭ kułuarach forumu raspytaŭ niekatorych vysokapastaŭlenych zachodnich vajennych čynoŭnikaŭ, ci staić u ich pry abmierkavańni pierśpiektyŭ rasijska-ŭkrainskaha zamireńnia na paradku dnia Biełaruś.
Supracoŭnica amierykanskaha Minabarony imaviernaść padpisańnia mirnaj damovy nazvała «hipatetyčnym scenaram, jaki maje patrebu ŭ prapracoŭcy». Asnoŭny fokus uvahi Złučanych Štataŭ, pa jaje słovach, u hety momant zasiarodžany na padtrymcy Ukrainy.
«Ciapier naša ŭvaha zasiarodžanaja na tym, kab pierakanacca, što Ukraina moža być paśpiachovaj jak na poli boju, tak i za stałom pieramovaŭ, kali sprava dojdzie da hetaha», — dadała čynoŭnica.
Jana nie stała kankretyzavać vierahodnyja scenary raźvićcia adnosin ZŠA ź Biełaruśsiu ŭ vypadku zakančeńnia kanfliktu va Ukrainie.
«Ja nie mahu pradkazać budučyniu, — skazała jana. — Prosta ciapier heta nie toje, na čym my skancentravanyja. My skancentravanyja na Ukrainie. Kali nastupić tryvały mir i vajna zavieršycca, to nastanie momant, kali raźvićcio adnosin ź Biełaruśsiu budzie tym, nad čym nam daviadziecca pracavać. Ale na hety momant my pra heta nie dumajem».
Vysokapastaŭleny čynoŭnik NATA ŭ razmovie z «Lusterkam» taksama padkreśliŭ, što ŭ Aljansie ličać nizkaj vierahodnaść zaklučeńnia miru pamiž Rasijaj i Ukrainaj u najbližejšy čas. Łukašenku jon paraiŭ zadumacca pra nastupstvy padtrymki Pucina:
«My viedajem, što Biełaruś naŭrad ci budzie niepasredna ŭdzielničać u hetym kanflikcie, ale Łukašenka praciahnie kazać toje, što jamu treba, i rabić toje, što patrabujecca dla zachavańnia padtrymki Maskvy. Adnak Łukašenka pavinien razumieć uvieś ciažar sankcyj i inšych zachadaŭ, jakija sajuźniki ŭžyvajuć da Rasii, i ŭśviedamlać, što ŭsio heta budzie adnolkava ŭžytaje da Biełarusi, kali jana navažycca ŭdzielničać u kanflikcie i nakiravać svaje vojski dla praviadzieńnia nastupalnych apieracyj».
Kamientary
Biełarus, kamu ? vam ? a hrošy na heta daścio ?
to-ta ja dumaju - čaho heta śvieta bolš nie kalasić pa śviecie