U mižnarodnuju prahramu X kinafiestyvalu «Paŭnočnaje źziańnie» ŭvajšli 15 filmaŭ z krain Skandynavii i Bałtyi. Pahladzieć ich možna budzie anłajn i afłajn z 4 pa 21 listapada. Dakumientalny bajavik, padletkavaja drama, kunh-fu kamiedyja, almanach pra kachańnie… Raskazvajem padrabiaźniej pra hetyja stužki.
«Pieśni Ziamli»
2023, Narviehija
Kali: 4, 9 listapada — online z 00:00 da 23:59. 4 listapada, 18:30, Vilnius, k/t Skalvija — kvitki na pakaz užo dastupnyja.
Miedytatyŭny narviežski dok nievierahodnaj pryhažości adkryje kinafest i začaruje ŭsich amataraŭ National Geographic. U hetuju vizualnuju vandroŭku hladač adpraŭlajecca razam z režysiorkaj Marhret Olin i jaje 84-hadovym baćkam Jorhienam. Fjordy, ledniki i vadaspady stanoviacca fonam dla razvažańniaŭ ab našych adnosinach z pryrodaj, suviaziach pamiž baćkami i dziećmi i pryhažości žyćcia, a taksama dla apoviedaŭ Jorhiena pra 55-hadovy šlub z žonkaj Mahnchild, ich ahulnyja radaści i fiłasofskaje čakańnie śmierci. Film byŭ naminavany na premiju «Oskar-2024» ad Narviehii, dy jašče i spradziusavali jaho režysior Vim Vienders, a taksama aktrysa i zorka filmaŭ Inhmara Bierhmana Liŭ Ulman.
«Mara Hierhany»
2024, Finlandyja, Bałharyja
Kali: 5 listapada — online z 00:00 da 23:59.
Non-fikšn drama pra žyćcio aŭtsajdara ad režysiora Tanisłava Chrystova. Hiery — staršakłaśnica z maleńkaha bałharskaha horada Vraca, jakaja žyvie ŭ dziciačym domie i ŭžo z małych hadoŭ daviedałasia, što takoje samotnaść i žyćcio biez baćkoŭ. Jana maryć stać sacyjalnym piedahoham, kab dapamahać inšym dzieciam, jakija, jak i jana, apynulisia na ŭskrajku hramadstva. Ale pierad tym, jak adčynić dźviery ŭ novaje žyćcio, Hiery treba zdać vypusknyja ekzamieny i pieraasensavać składanyja ŭspaminy ab chatnim hvałcie i raspadzie siamji.
«H — Hatsunda ŭ 21 dziei»
2024, Šviecyja, Danija
Kali: 6 listapada — online z 00:00 da 23:59.
Viartańnie ŭ rodny horad nie dla ŭsich źjaŭlajecca natchnialnym momantam. Dla kahości, jak dla režysiora i hałoŭnaha hieroja stužki Łorana Baci, viartańnie da karanioŭ, heta pajezdka ŭ samaje niebiaśpiečnaje miesca Šviecyi, horad Hatsunda. Tam narkotyki, hvałt i vuličnyja bandy — zvykłaja źjava. Film ujaŭlaje saboj asabisty, niefiltravany pohlad Baci na prablemu žorstkaści bandaŭ u šviedskich pryharadach, jakaja zvyčajna schavana ad starońnich vačej za šyrmaj skandynaŭskaha dabrabytu. Balučy partret rodnaha miesca, jaki stvaraŭsia ciaham piaci hadoŭ.
«Žyćcio i inšyja prablemy»
2024, Danija, Šviecyja, Vialikabrytanija
Kali: 7 listapada — online z 00:00 da 23:59.
Navukova-fiłasofskaje razvažańnie pra sutnaść byćcia. Stužka pačynajecca z zabojstva dackaj žyrafy Maryusa ŭ kapienhahienskim zaaparku, hučnaha incydentu, jaki 10 hadoŭ tamu abmiarkoŭvaŭ uvieś śviet. Režysior Maks Kiestnier začaravany pytańniem, što robić čałavieka nastolki ŭsiemahutnym, što jon moža vyrašać losy žyvioł. Dakumientalist pravodzić nas praź iraničnaje daśledavańnie, u jakim jon razam navukoŭcami šukaje adkazy na samyja hłybokija ekzistencyjalnyja pytańni.
«5 1⁄2 historyj kachańnia ŭ adnoj vilniuskaj kvatery»
2023, Litva, Irłandyja, Łatvija
Kali: 8 listapada — online z 00:00 da 23:59.
Vuajerystyčny almanach pra kachańnie i rasčaravańni ŭ adnoj kvatery. Roznyja pa źmieście, ale adnolkava miełanchaličnyja historyi pra ramantyčnyja niaŭdačy i razburalnyja straści abjadnoŭvaje miesca dziejańnia — kvatera ŭ centry Vilni, jakaja zdajecca praz Airbnb. U filmie jana niby asobny, maŭklivy piersanaž, što padhladvaje za ŭsimi, pasudzina, jakaja litaralna traščyć ad vylitych u jaje čałaviečych rasčaravańniaŭ, jakija ŭ kancy kožnaj z navieł sprabuje ścierci stomlenaja prybiralščyca Jołanta.
«Pramień»
2023, Danija
Kali: 8 listapada, 19:00, Varšava, k/t 'Kinoteka' — kvitki na pakaz užo dastupnyja. 10 listapada — online z 00:00 da 23:59.
Dynamičny dakumientalny film, jaki raspaviadaje pra mała viadomy za miežami Danii, ale hučny art-skandał vakoł instalacyi mastački Ele-Mi Ejdrup Chansen «Skulptura miru». Jana ŭjaŭlała saboj łazierny pramień daŭžynioj 532 kiłamietry, jaki złučaŭ 6000 isnujučych vajennych bunkieraŭ, pabudavanych dackimi rabočymi dla nacystaŭ. Prajekt imknuŭsia padkreślić tryvožnuju dvaistaść u kalektyŭnaj pamiaci, hetkuju histaryčnuju amnieziju. Razadraŭšy takim čynam histaryčnyja rany, mastačka stała achviaraj seksisckaha palavańnia na viedźmaŭ z boku vieteranaŭ, ŚMI i ŭładaŭ, što amal zrujnavała jaje karjeru na nastupnyja 20 hadoŭ.
«Lod, jaki nas jašče trymaje»
2023, Estonija, Finlandyja, Litva, Čechija
Kali: 11 listapada — online z 00:00 da 23:59.
Iraničnaja i miełanchaličnaja bajka pra niastrymny bieh času i mietafaryčny lod, jaki apošnim časam zanadta tonki, kab utrymać nas usich razam. U žycharoŭ paŭnočnaha ŭźbiarežža Estonii jość šmatviakovaja tradycyja, jakaja ŭźnikała ź nieabchodnaści zekanomić dziesiatki kiłamietraŭ darohi pamiž haradami Chaapsału i Noarootsi. Jaje sens u tym, što treba prajechać niekalki kiłamietraŭ pa zamierzłaj vadzie praz Bałtyjskaje mora. Z časam hetaja ledzianaja daroha nabyła asablivaje kulturnaje značeńnie: na joj pravodziacca etna-fiestyvali i spabornictvy pa drah-rejsinhu. Šlach adkryvajecca kožny hod, ale daroha — jak pryvid, bo nichto nie viedaje dakładna, dzie i kali jana źjavicca. Kab stvaryć hety film dakumientalist-ekśpierymientatar Arka Ok na praciahu vaśmi hadoŭ naziraŭ za miascovymi karystalnikami darohi.
«Balomania»
2024, Danija, Ispanija
Kali: 12 listapada — online z 00:00 da 23:59.
Dakumientalny bajavik pra pošuki svabody samavyjaŭleńnia na prykładzie historyi tajemnaj subkultury brazilskich stvaralnikaŭ pavietranych šaroŭ. Surovyja, tatuiravanyja łacinaamierykanskija mužčyny mohuć hadami sklejvać listy papiery i marnavać dziasiatki tysiač dalaraŭ, kab pabudavać pavietrany šar pamieram z šmatpaviarchovik, jaki zatym uźniasiecca ŭ nieba, rasfarboŭvajučy jaho jarkimi kolerami i partretami Tupaka, Piele ci Roki Balboa. Miž tym niezvyčajnaje chobi ŭ Brazilii stroha karajecca zakonam — za zapuski pavietranych šaroŭ možna atrymać da šaści hadoŭ turmy. Tamu nieadjemnaja častka kultury «bałuejru» — heta pastajannyja hulni ŭ katy-myšy z palicyjaj.
«Soviet Barbara: Historyja Rahnara Kjartansana ŭ Maskvie»
2023, Isłandyja
Kali: 13 listapada — online z 00:00 da 23:59.
U śviecie mastactva mnostva nievidavočnych idej. Voś, naprykład, isłandski mietamadernist Rahnar Kjartansan vyrašyŭ: a čamu b nie pastavić 100 pieršych sieryj amierykanskaj mylnaj opiery «Santa-Barbara» ŭ vyhladzie teatralnaj pastanoŭki? A čamu b heta nie zrabić za 100 dzion dy jašče i ŭ Maskvie ź miascovymi akciorami? Prydumana — amal zroblena. «Amal», tamu što nadychodzić luty 2022 hoda, i ŭ aŭtara pierfomansu ŭźnikajuć etyčnyja dylemy datyčna dalejšaj realizacyi. Režysior Hiojkur Ulfarsan u svaim filmie fiksuje, jak art-pierfomans pieratvarajecca ŭ palityčny tryler.
«Braty Andersan»
2024, Šviecyja
Kali: 14, 18 listapada — online z 00:00 da 23:59.
Kranalnaja dakumientalnaja siamiejnaja drama pra čatyroch upartych bratoŭ: Roja, Čeła, Lejfa i Roni. Režysiorka-debiutantka Juchana Biernchardsan źjaŭlajecca dačkoj adnaho z bratoŭ, i pačynaje zdymać film z nadziejaj abjadnać ich chacia b dziela adnoj sustrečy, bo ŭžo minuła 10 hadoŭ, jak mužčyny nie bačylisia. Bieručy intervju i čarhujučy ich z archiŭnymi kadrami, Juchana stvaraje dalikatny i natchnialny partret siamji, členy jakoj pajšli zusim roznymi šlachami, niahledziačy na ahulnaje minułaje. I nie apošniuju rolu ŭ ich raźjadnańni syhraŭ ałkahol. Heta historyja pra spadčynu, mary i pra toje, jak ciažka byvaje adnavić pierarvanuju suviaź. Dadatkovaj matyvacyjaj da prahladu moža pasłužyć toj fakt, što adzin z bratoŭ — viadomy šviedski režysior Roj Andersan.
«Ekskursija»
2023, Bośnija i Hiercahavina, Charvatyja, Sierbija, Francyja, Narviehija, Katar
Kali: 15, 19 listapada — online z 00:00 da 23:59.
Emacyjna zaradžanaja padletkavaja drama ab sacyjalnych maskach i zadušlivym absurdzie patryjarchalnaha hramadstva. Pa siužecie: zvykłaja dla padletkaŭ hulnia «Praŭda ci dziejańnie» pryvodzić da, zdavałasia b, niavinnaj chłuśni, jakaja pieratvarajecca ŭ burny skandał i pahružaje hałoŭnuju hierainiu Iman u vyćvieražalnuju realnaść kansiervatyŭnaha baśnijskaha atačeńnia.
«Bananavaja łodka»
2024, Łatvija
Kali: 16 listapada — online z 00:00 da 23:59.
Pryhodnickaja trahikamiedyja, jakaja zdymałasia čatyry hady ŭ pryrodnych łakacyjach paŭnočnaha zachadu Łatvii. Stužka, zasnavanaja na asabistaj historyi režysiora Krystapsa Bryzie, apaviadaje pra 35-hadovaha Ralfa, jaki ŭ sprobie pasiabravać z synam-padletkam svajoj novaj kachanaj, adpraŭlajecca ź im u spłaŭ pa łatvijskich rekach. Adnak u hetym padarožžy šmat što idzie nie tak jak płanavałasia.
«Moj dziŭny nieznajomiec»
2024, Narviehija, Francyja, Šviecyja
Kali: 17 listapada — online z 00:00 da 23:59.
Jochana Piujukio ŭ svaim režysiorskim debiucie daśleduje kłasavyja adroźnieńni, aŭtsajdarstva i jaho hvałtoŭny patencyjał praź nietryvijalnuju suviaź pamiž dvuma ludźmi. 18-hadovaja adzinočka Eba padpracoŭvaje ŭ słužbie klininhu, pieryjadyčna pje vino, kradzie darahija drobiazi ŭ bahatych klijentaŭ, pry hetym maryć ab bolš vysokim sacyjalnym statusie. Kali adnojčy jana znachodzić na ziamli maładoha čałavieka, jaki ničoha nie pamiataje, to nazyvajecca jamu jaho dziaŭčynaj. Nu i što moža pajści nie tak?!
«Pałajučy raj»
2023, Šviecyja, Danija, Finlandyja, Italija
Kali: 20 listapada — online z 00:00 da 23:59.
Avanturnaja i elehičnaja oda siastrynstvu va ŭsich jaho prajavach. Try siastry žyvuć samastojna, pakinutyja sami sabie, kraduć pradukty i ŭryvajucca ŭ čužyja damy. Ale ich svabodnaje žyćcio pad pahrozaj, kali sacyjalnyja słužby paviedamlajuć pra vizit, i starejšaja Łaura šukaje, chto b syhraŭ rolu ich maci.
«Niabačny boj»
2023, Estonija, Łatvija, Hrecyja, Finlandyja
Kali: 21 listapada — online z 00:00 da 23:59.
Kičavaja chevi-mietał kunh-fu kamiedyja ŭ dekaracyjach savieckaha manastyra ad tryumfatara kinafiestyvalu «Listapad» Rajniera Sarnieta. Film must-see na dumku adnaho z prahramieraŭ «Paŭnočnaha źziańnia».
***
Druhi hod zapar «Paŭnočnaje źziańnie» pravodzić mižnarodny konkurs debiutnych filmaŭ. Sioleta ŭ im udzielničajuć siem stužak, jakija źniaty ŭ roznych farmatach — ad honza-dakumientalistyki da padletkavaj dramiedy. Bolšaść filmaŭ, pradstaŭlenych u konkursie, adznačany ŭznaharodami i naminacyjami na najbujniejšych fiestyvalach: Vieniecyjanski kinafiestyval, Łakarna, CPH:DOX, kinafiestyval u Hioteborhu. Ich budzie adhladać i aceńvać mižnarodnaje žury, u skład jakoha ŭvajšli Saša Kułak, Ilja Stenbierh, Marta Holba-Naŭman. Pa-za konkursam pradstaŭleny jašče vosiem karcin.
Kinafiestyval «Paŭnočnaje źziańnie» imkniecca pakazvać raznastajnaje kino. Padtrymać fiestyval možna danatam.
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»22
Kamientary