Čym karysnaja sparža, jak jaje vybrać i što ź jaje možna pryhatavać

Śviežaja sparža. Fota: Pixabay

U sparžy mała kałoryj, ale šmat klatčatki, folijevaj kisłaty, a taksama vitaminu D, jaki ŭdzielničaje ŭ pracesie zhortvańnia kryvi i padtrymlivaje zdaroŭje kostak. Plus vitaminy A, S, Je i hrupy V. A jašče sparža — heta krynica kaliju, miedzi, cynku, sielenu i fosfaru.

Hetaja harodnina dapamahaje padtrymlivać zdaroŭje sardečna-sasudzistaj sistemy, straŭnikava-kišačnaha traktu i ŭzbahačaje arhanizm antyaksidantami. Jana taksama stymuluje pracu nyrak.

Jak vybrać dobruju sparžu

Sparžu dobra kuplać u siezon — u traŭni—červieni, paźniej jaje ściabliny stanoviacca bolš suchimi i žorstkimi. Hałoŭny sakret dobraj sparžy — jana pavinna ŭtrymlivać šmat vady.

Vizualna heta vyjaŭlacca ŭ roŭnym smarahdavym kolery i pryhožych, nie suchich končykach, taktylna — u pruhkaści harodniny.

Vy možacie źviarnuć uvahu na toje miesca, dzie sparža była zamacavanaja humkaj: kali bačnyja ślady, značyć, parastki ŭžo stracili šmat vady i nie vielmi śviežyja.

Dobraja navina ŭ tym, što navat zaviałuju sparžu možna vyratavać. Prosta adarvicie kancy i pakładzicie harodninu ŭ posud z chałodnaj vadoj. Praz adnu-dźvie hadziny parastki adnoviać svaju pruhkaść.

Što pryhatavać sa sparžy

Asnoŭnaje praviła pry apracoŭcy śviežaj sparžy, jak i luboj śviežaj harodniny, — dla zachavańnia karysnych ułaścivaściaŭ jaje lepš termična apracoŭvać minimalnuju kolkaść času. Jość recepty, kali sparžu možna ŭžyvać zusim biez apracoŭki. Najlepšy varyjant — źlohku advaryć, možna pryhatavać na pary.

Kab zapiačy sparžu, duchoŭku treba razahreć prykładna da 200℃. Dalej harodninu treba prypravić nievialikaj kolkaściu aliŭkavaha aleju i śpiecyj i zapiakać chvilin 10-15. Možna absmažyć i na patelni — prykładna 15 chvilin na siarednim ahni.

Sparžu padajuć u jakaści harniru, asnoŭnaj stravy, dadajuć u sałaty (naprykład, sałata sa sparžaj, zielaninaj i pamidorami čery abo sałata sa sparžaj, arechami i syram fieta), taksama ź jaje atrymlivajecca smačny sup-piure.

Pavialičyć

Sparža i makarona. Fota: Karalina Hraboŭska / Pexels

Onet.pl prapanuje dva z mahčymych receptaŭ:

Pasta z kurycaj i sparžaj

• 2-3 file kurynaj hrudki,
• 1 pučok śviežaj zialonaj sparžy,
• 125 mł viarškoŭ 18%,
• 125 h luboj makarony,
• 1 stałovaja łyžka aliŭkavaha aleju.

Dla sousu piesta:

• 1 zubčyk časnaku,
• 10 h ciortaha parmiezanu,
• 70 mł aleju,
• 25 h śviežaha liścia baziliku,
• 2 stałovyja łyžki kiedravych arechaŭ,
• sol,
• pierac.

Jak hatavać:

1. Pačniom z pryhatavańnia sousu piesta. Staranna pramyjcie liście baziliku pad pratočnaj vadoj. Kiedravyja areški trochi absmažcie na suchoj patelni da załacistaha koleru. Źmiaścicie ŭsie inhredyjenty ŭ stupku i pieratrycie da adnastajnaści.
2. Kurynaje file ačyścicie, vymyjcie, absušycie papiarovym ručnikom i narežcie nievialikimi kubikami. Pasypcie sollu i piercam. Pierakładzicie ŭ misku i pastaŭcie ŭ prachałodnaje miesca.
3. Pastaŭcie makaronu varycca da stanu al dente ŭ źlohku padsolenaj vadzie. Pramyjcie sparžu i adrežcie žorstkija kancy. Narežcie ściabliny sparžy tonkimi łustačkami. Kińcie ich u vadu z makaronaj niedzie za 2 chviliny da zakančeńnia času jaje vareńnia. Źlicie vadu.
4. Nahrejcie alej u vialikaj patelni. Dadajcie narezanuju i prypraŭlenuju kurycu. Niadoŭha absmažcie z kožnaha boku, pakul miasa nie padrumianicca. Dadajcie asušanyja makarony sa sparžaj i sousam piesta. Źmiašajcie ŭsio.
5. Zapraŭcie stravu śmiatanaj, sollu i piercam — jak vam padabajecca. Padavajcie padahretaj.

Krem-sup ź zialonaj sparžy

• 2 pučki zialonaj sparžy,
• 1 cybulina,
• 2 zubki časnaku,
• 1 bulbina,
• 2 žmieni śviežaha baziliku,
• 1,5 litra aharodninnaha bulonu,
• 100 mł viarškoŭ,
• 1/2 hałoŭki syru kamambier,
• 4 stałovyja łyžki śmietankovaha masła,
• 1/2 čajnaj łyžki muskatnaha arechu,
• sol,
• pierac.

Jak hatavać:

1. Vymyjcie sparžu i adrežcie žorstkija, bolš śvietłyja kancy. Astatniaje narežcie nievialikimi kavałačkami.
2. Cybulu narežcie kubikami i absmažcie ŭ rondali z razahretym śmietankovym masłam, zatym dadajcie drobna narezanyja časnok i bulbu. Smažcie kala 5 chvilin.
3. Dadajcie sparžu (niekalki halinak adkładzicie).
4. Zapraŭcie ŭsie sollu, piercam i muskatnym arecham.
5. Zalicie źmieściva rondala bulonam i varycie jašče niekalki chvilin.
6. Dadajcie viarški, kamambier i bazilik i ŭźbicie sup ručnym błendaram da adnastajnaj masy.
7. Raźlicie krem sa sparžy pa talerkach, upryhožcie kožnuju niekalkimi halinkami sparžy abo liściem baziliku. Hatovy krem sa sparžy možna pasypać ciortym parmiezanam, mołatymi arechami ci smažanymi siemačkami. Taksama padyduć maleńkija chrumstkija tosty, što vielmi padabajucca dzieciam.

Vam taksama moža być cikava:

Formuła «idealnaj ježy». Jak z dapamohaj piersanalnaj dyjety možna papiaredzić ci navat vylečyć mnohija chraničnyja zachvorvańni

Try recepty makarony, jakija varta dadać u mieniu

Jak pryhatavać idealnuju brokali?

• 16
• 0
• 1
• 2
• 2