Aliharch Huceryjeŭ raskazaŭ, jak rasčaravaŭsia ŭ Zachadzie: Paśla 2022 hoda ja nibyta źniaŭ šory ź siabie
Rasijski aliharch Michaił Huceryjeŭ raskazaŭ, jak vajna i sankcyi źmianili jaho śvietapohlad, nazvaŭ hałoŭnyja prablemy Rasii, patłumačyŭ, čamu nielha zabaraniać zamiežnych ahientaŭ i što treba zrabić, kab skončyłasia vajna.
Miljarder Michaił Huceryjeŭ daŭ vialikaje intervju jutub-kanału Forbes. Pryvodzim samaje cikavaje.
«Paśla 2022 hoda ja źniaŭ nibyta šory ź siabie»
U intervju Huceryjeŭ śćviardžaje, što paśla 24 lutaha 2022 hoda bolšuju častku svajho času pravodzić u Maskvie, tolki zredku vyjazdžajučy za miažu, «kudy jość mahčymaść vyjechać».
Aliharch adznačaje, što paśla pačatku poŭnamaštabnaj interviencyi Rasii va Ukrainu (u intervju heta nazyvajecca «paśla 24 lutaha 2022 hoda») jaho žyćcio stała inšym.
«Mnohija rečy, mnohija ŭčynki maje, moj śvietapohlad źmianiŭsia. Maje ŭčynki stali inšymi. Majo staŭleńnie stała inšaje da Zachadu, dapuścim. I ŭvohule da biznesu stała inšym — stratehija nie na raźvićcio, a stratehija na ŭtrymańnie. Partniorstva, uzajemaadnosiny z partniorami. Mnohija ludzi prajavili siabie ŭ ekstremalnaj situacyi — u pieršuju čarhu zachodnija partniory — ahidna».
Huceryjeŭ tłumačyć, što jon pačynaŭ svoj biznes u čas pierabudovy, byŭ prychilnikam zachodniaj kultury, zachodniaj ekanamičnaj madeli, demakratyi. Ale ciapier jon tak nie ličyć:
«Dla nas zachodniaja kultura była ŭzoram. Dla mianie byŭ uzor sudovaj sistemy, uzor vybarnaści, uzor kiravańnia.
Paśla 2022 hoda ja nibyta źniaŭ šory ź siabie. Ja ŭbačyŭ, što sudovaja sistema ahidnaja, što zusim vidavočnyja rečy, uziatyja ź niejkaha sajtu treciaha hatunku, padajecca sudami jak praŭda, choć usio heta niapraŭda. Usio, što napisana tam u zaklučeńni pa sankcyjach suprać mianie — heta ŭsio niapraŭda.
I nie tolki ŭ dačynieńni da mianie, heta maleńki epizod. Uvohule. Tamu ja pierahledzieŭ svoj pohlad na hetyja kaštoŭnaści».
Krytykujučy Zachad, miljarder zaŭvažaje: «Ja nie kažu, što našy lepšyja ci tam lepšyja». Na prośbu prakamientavać źmieny ŭ rasijskaj palitycy jon adkazaŭ «Ja žyvu tam, dzie žyvu. Biez kamientaryjaŭ».
«Ciapier ja pavinien jechać na ciahniku ci na mašynie, tamu što jany adsočvajuć»
Jak viadoma, Michaił Huceryjeŭ 21 červienia 2021 hoda trapiŭ pad sankcyi Jeŭrasajuza suprać Biełarusi. Rada ES patłumačyła svoj krok tym, što aliharch — daŭni siabar Łukašenki i dziakujučy hetamu maje ŭpłyŭ na palityčnyja elity Biełarusi.
«Nijakich adnosin maje sankcyi nie majuć da Łukašenki. Sankcyi zrobleny suprać Biełarusi, biełaruskaha narodu. Jakija adnosiny ja maju da Łukašenki? Ja budavaŭ, ja inviestar. Adnym z asnoŭnych inviestaraŭ Biełarusi byŭ u toj momant», — adznačaje Huceryjeŭ.
Na praciahu apošnich hadoŭ biznesmien sudzicca za admienu sankcyj. Ale jon ličyć, što dabicca spraviadlivaha rašeńnia niemahčyma, treba čakać palityčnaha rašeńnia siońniašniaj prablemy.
Uviadzieńnie sankcyj suprać siabie aliharch nazyvaje palityčnaj akcyjaj, jakaja «prevaliruje nad sudovaj zachodniaj sistemaj».
«Ad hetaha mianie i patresła. Ja ličyŭ, što ich sudovaja sistema zaŭsiody adździelena [ad ułady]. Jany ŭvieś čas krytykavali Rasiju — što naša sudovaja sistema schilnaja da cisku ŭłady, što jana razam z uładaj, što ŭ ich jana niezaležnaja. Heta niapraŭda. Ichniaja sudovaja sistema taksama zaležnaja. Jak i ŭ nas, na žal», — zaŭvažaje aliharch.
Jon nie biarecca prahnazavać, kali sankcyi mohuć być admienieny, i zaŭvažaje:
«Saviecki Sajuz taksama 70 hadoŭ praktyčna byŭ pad sankcyjami. Potym heta ŭsio [razvaliłasia]. Heta značyć, [čakać možna] ad adnaho dnia da biaskoncaści. Ja nie čakaju lepšych časoŭ. Heta, pa-mojmu, ci ŭ Tałstoha, ci ŭ Dastajeŭskaha Ivan Ivanavič čakaŭ, nie braŭ drobnyja padnašeńni, čakaŭ lepšych časoŭ. A lepšyja časy ŭsio nie prychodzili. Tamu ja nie čakaju lepšych časoŭ».
Paźniej Huceryjeŭ adznačyŭ, što ŭ jaho ŭ Biełarusi nibyta ničoha niama: «Ja syšoŭ adtul. Raspradaŭ. Ja ŭsio addaŭ. Ničoha ŭ mianie niama ŭ Biełarusi». I paskardziŭsia:
«Da čaho dajšło. Jany adsočvajuć navat maje paloty. Jurysty pajšli ŭ sud, [tam im] havorać, a voś bačycie, jon užo paśla sankcyj dva razy byŭ u Biełarusi. Jaho samalot byŭ. Jany adsočvajuć navat maje paloty ŭ Biełaruś. Takoje adčuvańnie, što ja hałoŭny vinoŭnik usich prablem Biełarusi i Rasii. Ciapier ja pavinien jechać na ciahniku ci na mašynie, tamu što jany adsočvajuć».
«Ja liču, što Biełaruś ckujuć, usiu krainu. Voś jany [krainy Zachadu] i ckujuć. Ja zastajusia ź biełaruskim narodam zaŭsiody», — adznačaje aliharch.
«Kali my sami siabie zamkniom, to ŭ nas buduć vialikija prablemy ŭ budučyni»
Na pohlad Huceryjeva, nielha havaryć ab tym, što sankcyi suprać Rasii pryviaduć da jaje technałahičnaha adstavańnia.
«Kali krainu nie začyniać, jak Saviecki Sajuz, to ludzi zmohuć vyjazdžać, ludzi zmohuć kantaktavać, ludzi zmohuć bačyć, čuć. Ja dumaju, viadoma, budzie składaniej, ciažej, ale kali my sami siabie nie zakryjem, sami siabie nie zamkniom u škatułku, to ciažka [ŭjavić], kab my technałahična adstavali. (…)
Kali my zojmiemsia ašalełaj prapahandaj, što Zachad — heta drenna, što Zachad — heta ŭsie hiei, što Zachad — heta tam heta, i sami siabie zamkniom, u nas buduć vialikija prablemy ŭ budučyni».
Huceryjeŭ adznačaje, što nieabchodna metava adpraŭlać moładź vučycca na Zachad pa tych napramkach pramysłovaści, navuki, technałohij, u jakich maje nieabchodnaść Rasija.
«Jany navučacca, pryjeduć tut. Častka zastaniecca, ale asnoŭnaja častka pryjedzie», — zaŭvažaje aliharch i paźniej tłumačyć, što pavinna «moža być, schavanaja, ale dziaržaŭnaja prahrama».
Hałoŭnyja prablemy Rasii
U intervju Huceryjeŭ źviarnuŭ uvahu na ekanamičnyja prablemy Rasii. Siarod ich, akramia vialikaj inflacyi jon nazyvaje «ahramadny biurakratyzm», jaki tłumačyć stracham čynoŭnikaŭ uziać na siabie adkaznaść:
«Heta strach čynoŭnikaŭ. Jany hatovyja nanieści škodu krainie, ale kab im nie śsiekli hałavu. Jany hatovyja hadami nie padpisvać toje, što vidavočna treba padpisvać. Bajacca heta padpisvać, bo pryjdzie jaki-niebudź inšy, bolš hałoŭny čynoŭnik i skaža, što heta niapravilna».
Aliharch zaŭvažaje, što ciapier u Rasii vychodzić usio bolš zakonaŭ, nakiravanych na zabaronu, a nie na dazvoł, što pryvodzić da zakryćcia biznesu, źniščeńnia inicyjatyvy. U vyniku hramadstva pieratvarajecca ŭ šeruju masu, jak heta było pry Savieckim Sajuzie, kali dušyłasia ŭsia inicyjatyva.
Kali zakončycca vajna
Huceryjeŭ ličyć, što nielha davodzić raźvićcio padziej da izalacyi, «lepš damovicca i znajści ŭzajemaprymalny varyjant sumiesnaha suisnavańnia roznych pohladaŭ na žyćcio». Jon adznačaje, što vieryć u dypłamatyju i toje, što mohuć źmianicca pohlady ŭ palityčnych lidaraŭ:
«Lubaja vajna skončycca miram. Zaŭsiody znojducca ludzi, pamianiajucca pohlady. Jany mohuć pamianiacca i ŭ našych lidaraŭ. Jany mohuć pamianiacca i ŭ zachodnich lidaraŭ. Jany mohuć pamianiacca i va ŭkrainskich lidaraŭ. Tak što, viadoma, usio roŭna kantakt [nieabchodny]. Ludzi ŭsio ž razumnyja. Ludzi nie žadajuć vajavać i pamirać. Ludzi chočuć stvarać, naradžać, vychoŭvać.
Čałaviek nastrojeny pazityŭna. Kožny čałaviek maryć i spadziajecca. Tamu, kaniečnie, da hetaha ŭsie pryjduć. Ale inšaja sprava, jak pryjści ź vializnymi stratami, z razburanaj ekanomikaj. Tamu ja spadziajusia, što chopić mudraści. (…) Treba sieści chacia b za adzin stoł. Heta ŭžo vialiki pačatak. Pakul my nie siadzim navat za adnym stałom».
«Kožny čałaviek svabodny»
U intervju Huceryjeŭ vykazaŭsia ŭ padtrymku Ały Puhačovaj, jakaja patrapiła pad škvał ckavańnia z boku rasijskaj prapahandy.
«Jana dla mianie zaŭsiody zastaniecca Ałaj Barysaŭnaj Puhačovaj, što b pra jaje ni kazali. Kali jana budzie mieć patrebu ŭ niejkaj padtrymcy (…), ja zaŭsiody joj praciahnu ruku. Zaŭsiody», — adznačyŭ aliharch i dadaŭ:
«Jana nie rabynia, jana maje prava źjechać, kudy jana choča. Kožny čałaviek volny. Jon moža havaryć, z kim jon choča. Vyznavać relihiju, jakuju jon choča. Źmianiać svaju relihiju, kali padabajecca. Mianiać svaju pałavuju, inšuju prynaležnaść, kali jamu heta padabajecca. Nie treba heta prapahandavać, ale, [kali] padabajecca tabie….»
Tych, chto źjechaŭ z Rasii, Huceryjeŭ nie ličyć zdradnikami, ale, na jaho pohlad, nielha publična krytykavać svaju radzimu:
«Vy možacie krytykavać čałavieka. Vy možacie krytykavać zakon. Vy možacie krytykavać napramak. Ale vy nie možacie krytykavać svaju krainu, u jakoj vy naradzilisia, vyraśli.
Vy možacie jaje krytykavać tolki pamiž nami dvuma. Siadzim my, ja rasijanin i vy. Nie pad kamieru my pačynajem havaryć: «Niešta ŭ nas niapravilna». Heta my tut havorym. Ale kali my heta ŭ publičnaj prastory. (…) Nie treba hetak».
Zamiežnyja ahienty i vorahi narodu
Huceryjeŭ krytykuje palityku, jakaja pravodzicca ŭ Rasii adnosna «zamiežnych ahientaŭ».
«Zabaraniać, nie puščać… My ŭžo heta bačyli. Heta pryviadzie da stahnacyi, heta pryviadzie da adtoku dumajučaha nasielnictva», — ličyć aliharch.
Nakont pohladu ab tym, što ciapier u Rasii viarnułasia savieckaja praktyka, kali ludziej ź inšymi pohladami vyciskali z krainy, rabili ź ich «vorahaŭ narodu», aliharch zaŭvažaje:
«Heta nie viarnułasia.(…) Jano viarnułasia tolki ŭ instahram hłahołami idyjotaŭ. Heta prosta razmova. Ułada tak nie robić, ułada nikoha nie honić».
Ab čym maryć aliharch
U kancy intervju Michaił Huceryjeŭ raskazaŭ pra svaje mary. Siarod ich — napisać «takuju pieśniu, kab jana zastałasia na stahodździ».
Akramia hetaha, «jość mara, što spynicca toje, što adbyvajecca, (…) kanflikt spynicca, usie razyducca, i pačniecca inšaje žyćcio, i ŭsio pojdzie tak, jak było raniej».
Aliharch taksama maryć dažyć da taho, kali jaho ŭnuk budzie atrymlivać dypłom, i «budavać, kali hrošy stanuć hrašyma, kali kurs budzie stabilny».
Viersija pra kantakty Huceryjeva i amierykancaŭ: jaho pasłaŭ Łukašenka
Michaił Huceryjeŭ paćvierdziŭ nacyjanalizacyju «Słaŭkalija» i skazaŭ pra «zavisańnie» svaich paŭmiljarda dalaraŭ
Chto taki Michaił Huceryjeŭ i čym jamu adhuknucca brytanskija sankcyi?
Jak rasijski biźniesmien Michaił Huceryjeŭ papaŭniaje biźnies biełaruskimi aktyvami
Kamientary