Zdajuć u arendu katedž zahinułaha chakieista Cypłakova ŭ Drazdach. Voś interjery FOTY
Na sajtach arendy nieruchomaści źjaviŭsia katedž lehiendy biełaruskaha chakieja Uładzimira Cypłakova. Pažyć u jaho šykoŭnym domie ŭ Drazdach moža luby achvotny, chto moža štomiesiac płacić bolš za 14 tysiač rubloŭ.
Nahadajem: Uładzimir Cypłakoŭ — uradženiec Rasii, jaki na momant raspadu SSSR hulaŭ u minskim «Dynama», tamu staŭ hramadzianinam Biełarusi. Jon staŭ pieršym biełarusam, jaki zamacavaŭsia ŭ NCHŁ, vystupaŭ za «Łos-Andželes» i «Bafała». Trojčy pryznavaŭsia najlepšym chakieistam Biełarusi. Paśla karjery sprabavaŭ siabie ŭ jakaści treniera, ale nie nadta siabie zarekamiendavaŭ na hetaj nivie.
Pra śmierć 50-hadovaha słavutaha chakieista Uładzimira Cypłakova stała viadoma ŭ śniežni 2019 hoda. Pa infarmacyi «Našaj Nivy», jon skončyŭ žyćcio samahubstvam. Adna z pryčyn — prafiesijnaja niezapatrabavanaść.
Siarod spadčyny Uładzimira Cypłakova byŭ i katedž na vulicy Pakroŭskaj u Drazdach, ułaśnicaj jakoha ciapier źjaŭlajecca jaho ŭdava. Jana šukaje arandatara na praciahły termin.
Płošča katedžu bolš za 430 kvadrataŭ, ź ich žyłaja — 180 kvadrataŭ. Na cokalnym paviersie znachodziacca saŭna, chatni kinateatr, pralnaja, kacielnia.
Na pieršym — haścioŭnia z kaminam, kuchnia-stałovaja, a taksama spalnia dla haściej.
Na druhim praduhledžana try spalni (uličvajučy majstar-spalniu z ułasnym sanvuzłom i harderobnaj), a taksama ahulny harderob i sanvuzieł. Dyzajn domu daloki ad ścipłaha: jość naściennyja freski i skulpturnyja bareljefy.
Miarkujučy pa fota ŭ abjavie, u katedžy nichto nie žyvie, bo mebla ŭ pakojach amal adsutničaje. Zastałasia jana tolki na kuchni.
Ale paznačana, što toje, što jość, było zroblena na zamovu — i heta ručnaja praca. Abiacajuć bytavuju techniku ad najlepšych impartnych vytvorcaŭ. Adznačajuć, što ŭ domie ŭstalavana sistema centralnaha pyłasosa. A ŭsiudy, dzie jość plitka, padłoha padahravajecca.
Bonusam da katedža idzie ŭčastak płoščaj 10 sotak. Kaniečnie, nad im papracavaŭ łandšaftny dyzajnier (adnak nielha skazać, što vynik uražvaje). Kab budučamu arandataru spałasia spakojna, viadziecca videanazirańnie. Kaštuje raskošnaje žyćcio pa susiedstvie ź biełaruskimi elitami roznych hadoŭ 4 tysiačy dalaraŭ u miesiac (ci pryblizna 14130 rubloŭ).
Jak ciapier vyhladaje palitźniavoleny Juraś Ziankovič. Jon nie ŭ robie, a ŭ cyvilnym kaściumie11
Kamientary