Abrazajecie sad? Nie śpiašajciesia vykidać halinki drevaŭ i kustoŭ. Jany mohuć dapamahčy pry roznych chvarobach
Lekavyja ŭłaścivaści halinak viarby, ślivy, hrušy, maliny, parečki.
Viarba: kara jak lekavy srodak
Halinki hetaha dreva masava zrazajucca napiaredadni carkoŭnaha śviata. Ale mała chto viedaje, što ich možna vykarystoŭvać i ŭ lekavych metach.
Viarba źmiaščaje salicylin, jaki pieratvarajecca ŭ salicyłavuju kisłatu. Jak viadoma, hetaja kisłata — asnova aśpirynu. Ale nie ŭsie ludzi mohuć jaho prymać z-za alerhičnych reakcyj ci straŭnikavaha kryvacioku. Vydatnym zamieńnikam u takim vypadku źjaŭlajecca kara viarby. Dla hetaha viasnoju zrazajuć maładyja adrostki daŭžynioju 15—20 sm, vysušvajuć i zdymajuć karu, jakuju potym zavarvajuć. Svaje lekavyja ŭłaścivaści kara zachoŭvaje da 10 hadoŭ.
Vodny nastoj kary ŭžyvajecca dla panižeńnia tempieratury, pry baraćbie z hlistami, u jakaści srodku dla abiazbolvańnia i supakajeńnia. Jon maje viažučyja i antysieptyčnyja ŭłaścivaści i sadziejničaje zažyŭleńniu ran.
Advar z kary dapamoža pry roznym krovaciačeńni, parušeńni stravavańnia, zapaleńniach kišečnika i straŭnika, panosach, reŭmatyźmie, padahry i hałaŭnym boli na niervovaj hlebie.
Kali ŭ vas paciejuć nohi i majuć niepryjemny pach, to rekamiendujecca rabić vannački z advaru kary viarby. Advaram pałoščuć horła pry zapaleńniach rota i horła. A paraškom kary prysypajuć rany dla spynieńnia kryvacioku. Dla spynieńnia kryvacioku z nosa parašok rekamiendujuć uciahnuć u nozdry.
Halinki parečak jak lekavy srodak
Nie śpiašajciesia vykidvać i abrezanyja halinki parečki. Advar z čornaj parečki dobra dapamahaje pry zachvorvańniach vierchnich dychalnych šlachoŭ, dyjarei, małakroŭi, niervovym źniasileńni, cystycie, bolach hałavy i zachvorvańniach nyrak.
Advar z halinak čornaj parečki dapamahaje zmahacca ź biassońniem i hałaŭnym bolem, lečyć hastryt z panižanaj kisłotnaściu. A voś kali kisłotnaść pavyšanaja, dy jašče i piakotka, to lepš zrabić advar z čyrvonaj ci biełaj parečki. Advar z halinak čyrvonaj parečki dapamoža pry reŭmatyźmie, močakamiennaj chvarobie i kamianiach u žoŭcievym puzyry.
Advary z halinak i pupyšak parečki vykarystoŭvajuć pry dyjatezie, zachvorvańniach vačej i dermatytach.
Dziakujučy bahatamu składu vitaminaŭ i chimičnych rečyvaŭ, advar z parečki dobra čyścić sasudy, palapšaje abmien rečyvaŭ i pavyšaje achoŭnyja ŭłaścivaści arhanizma.
Malińnik i jaho lekavyja ŭłaścivaści
Pažyłyja ludzi mohuć zhadać, jak daŭniej ich paili advaram z malińniku, jaki brali prosta z aharoda. Malińnik vałodaje adcharkvalnymi, bakterycydnymi i supraćzapalenčymi ŭłaścivaściami. Jon efiektyŭna spraŭlajecca z kašlem, nasmarkam, branchitam, anhinaj, łarynhitam, trachieitam i farynhitam.
Akramia hetaha advar — dobry srodak prafiłaktyki aterasklerozu, hipiertanii, infarktu i insultu, bo pašyraje i ŭmacoŭvaje ścienki sasudaŭ, čyścić ich ad lišku chalesterynu, vyvodzić taksiny, narmalizuje zhusalnaść kryvi.
Dobra dapamoža advar z malińniku pry piakotcy i rasstrojstvie žyvata.
U narodzie raźmiakłyja kavałački zavaranaha malińniku žavali i prykładali da vysypańnia hierpiesu.
Adnak nielha pić advar, kali jość močakamiennaja chvaroba, padahra, zachvorvańni stravavalnaha traktu, parušeńni funkcyi nyrak i prablemy sa ščytapadobnaj załozaj.
Advar z halinak ihrušy
Karysnym budzie advar i z halinak hrušy. Ale ŭ adroźnieńnie ad malińniku, jaki pjuć adrazu paśla pryhatavańnia, patrabujecca, kab advar z halinak hrušy paśla 15 chvilin kipiačeńnia noč adstajaŭsia. Paśla jaho pracedžvajuć, padahravajuć i pjuć jak srodak prafiłaktyki prastudnych chvarob pa tracinie šklanki za paŭhadziny da ježy. Taksama jon dapamahaje pry lačeńni cukrovaha dyjabietu i jaho prafiłaktycy (kurs zajmaje ad miesiaca da šaści).
Kali pić taki advar rehularna na praciahu šaści miesiacaŭ, to možna praciahnuć maładość arhanizma, bo jon ačyščaje kroŭ, źnižaje zapaleńnie ŭ sustavach, dapamahaje zmahacca z asteachandrozam, palapšaje stravavańnie, narmalizuje arteryjalny cisk.
Jaho rekamiendujecca pić pry vysokaj tempieratury i infiekcyjach straŭnikava-kišačnaha traktu, pry padahry, kašli, uduššy, suchotach.
Asabliva karysny — advar z halinak dzički. Jon umacoŭvaje imunnuju sistemu, efiektyŭny pry kamianiach u mačavym puzyry i zachvorvańniach nyrak.
Śliva
Advar z halinak ślivy — dobry srodak dla dezynfiekcyi, tamu vykarystoŭvajecca dla hajeńnia ran, mocnych apiokaŭ, jazvaŭ. Ciopłym advaram namočvajuć tkaninu i nakładajuć na chvoraje miesca. Zatym zabintoŭvajuć i pakidajuć na 5—6 hadzin. Tak paŭtarajuć štodnia da poŭnaha zahojvańnia.
Pryjom advaru jak napoju palapšaje pracu straŭnika, pazbaŭlaje ad rasstrojstva žyvata i narmalizuje stuł. Jon dapamoža pazbavicca ad taksinaŭ i jość dobrym mačahonnym srodkam.
Advar z halinak ślivy — dobry srodak i pry zachvorvańniach repradukcyjnaj sistemy: jon pamianšaje boli pry miesiačnych, narmalizuje mienstrualny cykł, dapamahaje pry intensiŭnych vydzialeńniach.
Zvyčajna advar rekamiendujuć prymać rankam i viečaram kursami pa dva tydni ź pierapynkam na 2—3 tydni.
Źviartajem vašu ŭvahu, što pierad pačatkam lačeńnia narodnymi srodkami nieabchodna paraicca z doktaram.
Čytajcie jašče:
Čaramša — skarbnica vitaminaŭ. Voś što ź jaje možna hatavać i jak vyroščvać
Droždžy dapamohuć pavysić uradžajnaść i zachavać uradžaj
Jak pravilna abrazać hartenziju. I čym jana moža być karysnaja, akramia charastva
«Vialiki absalutna čałaviek». Kola Łukašenka raskazaŭ, što dla jaho baćka i ŭ čym jahonaja apazicyjnaść32
Kamientary