«Ustaloŭvajecca videanazirańnie». Kubrakoŭ raspavioŭ, jak MUS rychtujecca da novych vybaraŭ
Kiraŭnik siłavoha viedamstva Ivan Kubrakoŭ u efiry STB zajaviŭ, što ŭ 2020 hodzie siemji i dzieci supracoŭnikaŭ zaznali vializny cisk. Ciapier ža jaho padnačalenyja hatovyja abaranić svaje siemji i kiraŭnikoŭ dziaržstruktur, jakija buduć vykonvać «peŭnyja zadačy», źviazanyja z palityčnymi kampanijami 2024 i 2025 hadoŭ. U hety čas płanujecca praviadzieńnie vybaraŭ u miascovyja Saviety deputataŭ, Pałatu pradstaŭnikoŭ, a taksama prezidenckaja kampanija.
Kubrakoŭ zapeŭniŭ, što situacyja 2020 hoda nie paŭtorycca, bo zrobleny peŭnyja vysnovy.
«My pracujem pa ŭsioj krainie, pracujem na prafiłaktyku. Ustanaŭlivajecca videanazirańnie, viadziecca manitorynh hramadskaj biaśpieki. Pracujuć nie tolki supracoŭniki ŭnutranych spraŭ niepasredna na vulicy, ale my jašče praz srodki videanazirańnia kantralujem abstanoŭku i apieratyŭna starajemsia ŭpłyvać na tuju situacyju, jakaja składvajecca na vulicy», — raskazaŭ jon.
Siłavik śćviardžaje, što ŭ 2020 hodzie byŭ «vielmi vialiki cisk na siemji, na dziaciej supracoŭnikaŭ», naprykład, na nastaŭnikaŭ, jakich, jak vynikała ź jaho słoŭ, dajmali žurnalisty.
«My zrabili peŭnyja vysnovy i hatovyja abaranić našyja siemji, hatovyja abaranić kiraŭnikoŭ dziaržstruktur, jakija buduć vykonvać peŭnyja zadačy, — nastojvaje jon. — Siońnia supracoŭniki [orhanaŭ] unutranych spraŭ hatovyja harantavać biaśpieku našym hramadzianam u čas lubych, u tym liku i palityčnych, mierapryjemstvaŭ, jakija buduć prachodzić u našaj krainie».
Kamientary