«Pierapałochali švačak i prybiralščyc». U Mahilovie milicyja pryjšła na ahledziny budynka pad novy licej MUS i naviała šumu
Śpiecyjalizavanyja licei MUS chočuć stvaryć u kožnym abłasnym centry. U Mahilovie milicejskaje viedamstva, padobna, upadabała dla takoj navučalnaj ustanovy budynak, jaki ciapier naležyć čyhuncy. U im raźmiaščajecca padraździaleńnie Darožnaha centra padrychtoŭki čyhunačnikaŭ, a taksama šviejny cech. Niadaŭna bryhada ŭ formie zavitała na niečakanyja ahledziny.
Kubrakovu prysiahaje padletak z Kaściukovič. Fota: pres-słužba MUS
«Zaniatki ŭ Centry padrychtoŭki nie pravodziacca»
Aficyjnaj infarmacyi pra zakryćcio ci rearhanizacyju Centra padrychtoŭki čyhunačnikaŭ nie było. Jaho kiraŭnictva zapeŭnivaje žurnalista, što jon funkcyjanuje na raniejšym adrasie, Bialinskaha, 5.
Ale supracoŭnik čyhunki, jaki pažadaŭ nie nazyvać svajho imia, kaža, što ciapier Centr pustuje. Zaniatki ŭ im nie pravodziacca.
«Čyhunka akazałasia ŭ niadobrym finansavym stanie i svaju navučalnuju ŭstanovu začyniaje. Budynak choča zabrać milicyja pad svoj licej», — adznačaje jon.
Kompleks budynkaŭ z mahiloŭskim Centram padrychtoŭki kadraŭ dla čyhunki. Fota: yandex.by
Šviejny cech, u jakim vyrablajuć vopratku dla čyhunačnikaŭ, pracuje. U jaho štacie blizu sotni čałaviek. Jon padparadkoŭvajecca mahiloŭskamu filijału pradpryjemstva «Biełčyhunkazab».
Pa słovach supracoŭnika čyhunki, švačak zaspakojvaje, što jany majuć vialiki zakaz na vyrab formy dla vajskoŭcaŭ. Raniej ža kiraŭnictva čyhunki strašyła ich skaračeńniem.
Čyhunačnik adznačaje, što kompleks budynkaŭ na Bialinskaha siłavoje viedamstva ŭpadabała, bo niepadalok instytut Ministerstva ŭnutranych spraŭ. Pobač z samim Centram — internat dla jaho navučencaŭ. Navučalny korpus złučany sa šviejnym cecham kalidoram.
«Pierapałochali švačak, daviali amal da nieprytomnaha stanu kiraŭnika i prybiralščyc»
Ahladać budynak, jaki farmalna zastajecca ŭłasnaściu čyhunačnikaŭ, pryjechała kamisija sa słužboŭcaŭ u milicejskaj formie biez supravadžeńnia haspadaroŭ 7 śniežnia.
Abyšoŭšy biaźludnyja aŭdytoryi vučelni, milicyjanty naviedalisia da švačak. Tyja, chto sutyknuŭsia ź siłavikami, adznačajuć, što pavodzili jany siabie nachabna i hruba. Biez papiaredžańnia zdymali rabotnic cecha na telefony. Zdymali taksama, jak vyhladajuć prybiralni.
«Pierapałochali švačak, daviali amal da nieprytomnaha stanu kiraŭnika i prybiralščyc. Ludzi pieražyli šok, bo dumali, što niekaha buduć aryštoŭvać, arhanizacyju začyniajuć, a ich vykinuć na vulicu. Kamisija ździŭlałasia, što pra jaje vizit nie papiaredzili», — pierakazvajuć atmaśfieru ŭ šviejnym cechu znajomyja ź situacyjaj.
Kažuć, u kamisii nie było kiraŭnika budučaj navučalnaj ustanovy i načalnika ciapierašniaha Centra.
Instytut MUS u Mahilovie. Fota: institutemvd.by
Inicyjavaŭ stvareńnie licejaŭ Kubrakoŭ
Stvaryć u kožnym abłasnym centry śpiecyjalizavanyja licei MUS prapanavaŭ sioleta 14 listapada kiraŭnik siłavoha viedamstva Ivan Kubrakoŭ. Ciapier isnuje tolki adna takaja navučalnaja ŭstanova ŭ Minsku. Druhuju źbirajucca adkryć u Mahilovie. Kali pačniecca ŭ licei navučalny hod, pakul nieviadoma.
Vajenna-patryjatyčny kłub «Zubr» u Kaściukovičach. Fota: golk.by
Pryjarytet u nabory navučencaŭ u takija licei, pavodle Kubrakova, budzie nadavacca tym, chto dobra siabie zarekamiendavaŭ u vajenna-patryjatyčnych kłubach, jakija paśla 2020 hoda masava stvarajucca pry vajskovych čaściach MUS. Tudy zapisanyja 2 tysiačy padletkaŭ. Adzin z takich kłubaŭ stvaryli ŭ Kaściukovičach, na małoj radzimie Kubrakova. U hetym addalenym rajcentry niama vajskovych čaściej, jon słavuty cementnym kambinatam.
Kamientary