Akcior Anatol Kacianioŭ pra rolu Jelcyna ŭ sieryjale «Karona»: Za hanarar pahasiŭ ipateku za kvateru ŭ Maskvie

Kali ŭ kancy 2021 hoda ahient akciora paviedamiła jamu: «Ty nie pavieryš, ale tabie prapanujuć na Jelcyna pasprabavacca» — Kacianioŭ uspryniaŭ heta bieź lišnich emocyj.

«Zdymali probu sami, pakolki heta mižnarodny prajekt. Mnie dasłali scenar adnaho epizodu. Ja pačytaŭ i vyrašyŭ, što heta niejki kamiedyjny sieryjał. I ŭklučyŭ takuju parodyju na Jelcyna. Źniali, dobra praviali čas, paśmiajalisia. Moj ahient adpraviła probu ahientu mižnarodnaha kastynhu. I adnojčy razdajecca zvanok: «U vas u taki čas videakanfierencyja nakont kastynhu na rolu Jelcyna», — raskazvaje akcior.

Režysioram hetaha epizodu «Karony» byŭ kinarežysior ź Miunchiena Kryścijan Švochaŭ.

— Jon znachodziŭsia ŭ Łondanie, jak i naš pierakładčyk Micia, darečy, biełarus, jaki taksama žyvie ŭ Łondanie i vučycca na akciorskich kursach. Režysior paprasiŭ nie paradziravać Jelcyna, a być samim saboj, — kaža akcior. — My zrabili try dubli. Paśla čaho mnie patelefanavała ahient mižnarodnaha kastynhu i paviedamiła, što režysior joj skazaŭ: «Usio, Jelcyna bolš nie šukajem, Jelcyn u nas jość».

10 studzienia 2022 hoda Kacianioŭ vylecieŭ u Łondan.

— Usio było niejak niečakana lohka, budzionna i prosta. Nas — ja kažu pra siabie i akciora Maskoŭskaha teatra imia Majakoŭskaha Alaksieja Dziakina, jaki syhraŭ Mikałaja II, — zasialili ŭ hatel, uručyli bankaŭskuju kartku, na jakuju štotydzień 170 funtaŭ sterlinhaŭ kamandzirovačnych pieraličvali. Plus śniadanak, abied i viačeru. I, zrazumieła, hanarar. Ja prabyŭ tam 48 dzion, choć u mianie było ŭsiaho siem zdymačnych dzion. Jany vykupili ŭvieś moj čas. Ja admoviŭsia ad śpiektaklaŭ, a zdymak u hety čas u mianie ŭ Maskvie nie było.

Akcior pryznaŭsia, što da zaprašeńnia na zdymki ŭ Łondan nie bačyŭ nivodnaj sieryi «Karony».

— Kali lacieŭ u Łondan zdymacca, navat nie ŭjaŭlaŭ, što heta za sieryjał. Dumaŭ, heta niejkaja kamiedyja budzie, tamu što ja zrabiŭ na probach parodyju na Jelcyna i mianie raptam zaćvierdzili. Užo ŭ Łondanie ja staŭ hladzieć hety sieryjał i zrazumieŭ, što ŭsio surjozna, a nie niejki tam kapuśnik. Pieršy raz ja heta zrazumieŭ u aeraporcie, kali pamiežnik uziaŭ maje dakumienty i ŭbačyŭ łahatyp sieryjała na zaprašeńni. Jon tak natchniŭsia!

Pavialičyć

Atmaśfiera na zdymačnaj placoŭcy, pa słovach akciora, była padobnaja da śviata kožny dzień.

— Jany pracujuć tak, jak byccam siońnia śviata. Kožny dzień było adčuvańnie, što voś zaraz skončym pracu i budziem adznačać Novy hod. Jany čumavyja ŭ hetym płanie. Sustrakajuć ciabie tak, jak byccam čakali ciabie ŭsio žyćcio, i voś ty narešcie pryjechaŭ. Ja hladzieŭ na ich u pieršyja dni zdymak, jak na ekzotyku, i jany na mianie hetak ža hladzieli. Ale vielmi chutka pryjšło adčuvańnie, što my ź imi ŭžo sto hadoŭ razam pracujem. Mocna nie adroźnivałasia ad taho, jak my ŭ Rasii zdymajem. Ale niuansy byli. Technika krutaja. I jany vielmi mocna zatočanyja na pracy, pracujuć biaskonca. Kali ŭ ich uźnikaje paŭza, jany chucieńka chapajuć svaich dziaciej, siabroŭ abo lubimych i niasucca pa muziejach usio pahladzieć.

«Mianie praktyčna nie hrymiravali»

Rolu Lizaviety II u piatym siezonie «Karony» vykanała Imielda Stontan, viadomaja pa roli Dałores Ambrydž u filmach pra Hary Potera.

— Jana vyhladaje na ekranie takoj davoli mocnaj, kruhłatvaraj, a na samaj spravie jana dalikatnaja maleńkaja žančyna, vielmi abajalnaja i kranalnaja. My całavali adno adnamu ruki, kali rasstavalisia paśla zdymak. Jana vielmi udziačny partnior.

Rola Jelcyna, kaža Kacianioŭ, abaviazvała być «na ŭzroŭni».

— Usio ž taki za plačyma majho piersanaža była ŭsia Rasija. Nie budziem kazać pra jaho hady kiravańnia, ale maštabnaść hetaha čałavieka adčuvałasia. Darečy, dla stvaralnikaŭ sieryjała było niepryncypova partretnaje padabienstva, heta ž nie šou dvajnikoŭ. Tak što mianie praktyčna nie hrymiravali — nijakich nalepak, nakładak, humoza (miakki płastyk dla abjomnych detalaŭ na skury). Byŭ tolki ton i pudra, kab pakazać, što piersanaž razharačany, jamu horača, ci naadvarot — źlohku bledny, naprykład, na pryjomie Lizaviety ŭ Hieorhijeŭskaj zale.

U sieryjale Lizavieta II hladzić pa TB naviny, na ekranie — kadry putču ŭ Maskvie ŭ 1991 hodzie. Jany, jak vyśvietliłasia, taksama byli źniatyja ŭ Łondanie.

— Jany ŭsio abharadzili ekranami chramakieja. I potym na kampjutarach stvaryli maskoŭskija vulicy. Prablema była tolki z połymiem Viečnaha ahniu. Ahoń byŭ realny, nie kampjutarny, śpiecyjalny čałaviek harełku ŭ patrebny momant padpalvaŭ. A ja vučyŭ hanarovuju vartu pravilna padymać nahu. Jany vielmi piedantyčnyja ŭ dačynieńni da detalaŭ. Viedaju, što dziaŭčynka śpiecyjalna jeździła z Łondana ŭ Maskvu, kuplała adzieńnie dla carkoŭnasłužycielaŭ i formu dla vajennych hanarovaj varty. Dva tanki T-54 jany pryhnali — dziela niekalkich siekund na ekranie.

Hanarar dazvoliŭ pahasić ipateku za trochpakajovuju kvateru ŭ Maskvie

Apošni zdymačny dzień u Anatola Kacianiova byŭ pryznačany na 23 lutaha. Na nastupny dzień jon pavinien byŭ vylecieć u Maskvu. Ale zdaryŭsia fors-mažor — režysior padchapiŭ kavid i paprasiŭ akciora zatrymacca, a 24 lutaha pačaŭsia napad na Ukrainu, rejsy z Łondana ŭ Maskvu byli admienienyja.

— Mnie dvojčy mianiali kvitki. Śpiarša byŭ varyjant lacieć praz Chielsinki, ale ŭžo ŭ aeraporcie vyśvietliłasia, što adtul ja taksama nie palaču ŭ Maskvu. U vyniku mianie adpravili praz Katar. 10 hadzin lacieŭ na niejkim niezvyčajnym samalocie, jak byccam u kupejnym ciahniku, tolki biez stoli. Adzin u kupe. Spačatku z Łondana ŭ Dochu, potym z Dochi ŭ Maskvu. Biez rečaŭ, ich nie paśpieli pierahruzić z samalota na samalot. Na nastupny dzień da dźviarej prynieśli moj bahaž z vybačeńniami. Pryznacca, ja pieražyvaŭ za jaho, tamu tam byli padarunački dla dački — cacki, sukienački. U śniežni joj budzie 4 hadki. Vielmi zasumavaŭ pa joj i jana pa mnie. Usio-taki 48 dzion tatu nie bačyła.

Praca ŭ sieryjale, pryznajecca akcior, dobra padtrymała jaho ŭ finansavym płanie — hanarar dazvoliŭ pahasić ipateku za trochpakajovuju kvateru ŭ Maskvie, jakuju jon kupiŭ dla svajoj novaj siamji — aktrysy Aleny Karpovič i dački Sofji.

— Biez hetaha hanararu ja b jašče nie adzin hod spraŭlaŭsia, a tak zastałosia zusim krychu. Usio nažytaje za 60 hadoŭ zastałosia ŭ Biełarusi, u inšym žyćci. Ipateku pryjšłosia brać, u maim uzroście heta niaprosta, — kaža 64-hadovy Anatol Kacianioŭ. — Ale ničoha, žyćcio praciahvajecca, tolki b zdaroŭje nie padvodziła.

Čytajcie taksama:

Biełarusy źnialisia ŭ topavym sieryjale ad Netflix. Adzin ź ich — u roli Jelcyna

• 5
• 0
• 1
• 1
• 0
• 2
• 3
• 0