Pačaŭsia sud nad hrodzienskim błohieram Vadimati, jon admoviŭsia davać pakazańni
Razhlad kryminalnaj spravy palitźniavolenaha Vadzima Jermašuka prachodzić u Ščučynskim rajonnym sudzie.
Vadzima Jermašuka, viadomaha jak błohier Vadimati, abvinavačvajuć u abrazie Łukašenki (artykuł 368, pahražaje da 4 hadoŭ kałonii) i ŭ abrazie dziaržaŭnaha ściaha (artykuł 370, pahražaje da 3 hadoŭ kałonii), piša «Radyjo Svaboda».
Padstavaj dla zaviadzieńnia spraŭ pasłužyli dva vykazvańni błohiera.
Jak raskazała «Svabodzie» žančyna, jakaja prysutničała na sudzie nad błohieram, pavodle materyjałaŭ spravy, Vadzim Jermašuk letaś u žniŭni i vieraśni nibyta publikavaŭ dopisy ŭ sacyjalnych sietkach, u jakich abraziŭ Łukašenku, naprykład, podpisam pad fota «nielehitymny prezident». Jaho vinavaciać pavodle 368 artykuła Kryminalnaha kodeksa Biełarusi.
Druhi artykuł, pavodle jakoha Jermašuku vystavili abvinavačańnie: «Abraza dziaržaŭnych simvałaŭ Biełarusi» (artykuł 370). Pavodle materyjałaŭ spravy, 16 žniŭnia 2021 hoda Vadzim Jermašuk na aŭtazapraŭcy ŭ Skidzieli ŭziaŭ u ruki maleńki dziaržaŭny ściažok, jaki pradavaŭsia ŭ kramie, i nazvaŭ jaho «anučkaj» dadaŭšy, što «nadta doraha kaštuje kavałačak anučki».
Na sudzie Vadzim Jermašuk admoviŭsia davać pakazańni. Na pytańni sudździ nie adkazvaŭ. Svaju vinu nie pryznaŭ ni pa adnym z artykułaŭ.
Sa słovaŭ vidavočcy, Vadzim trymajecca badziora. Taksama na sudzie vystupili dva supracoŭniki Ščučynskaha RAUS u jakaści śviedkaŭ pa spravie. Ź ich słovaŭ, jany daviedalisia, što ŭ toj dzień ŭ Ščučyn jedzie błohier, jaki krytykuje biełaruskuju ŭładu.
Vadzimaci adznačyŭ padčas suda, što nikoli nie dzialiŭ biełarusaŭ pavodle prychilnaści da ściahoŭ: dziaržaŭnaha abo nacyjanalnaha. 17 śniežnia pa spravie Vadzima Jermašuka adbuducca sprečki ŭ sudzie Ščučynskaha rajona.
Vadzima zatrymali 16 žniŭnia padčas pajezdki ŭ Ščučyn, dzie jon źbiraŭsia pahladzieć placoŭku dla roleraŭ i skiejtaraŭ. Praź niekatory čas jaho asudzili za «arhanizacyju masavaha mierapryjemstva» i «chulihanskija dziejańni».
Paśla zatrymańnia na jaho zaviali dźvie kryminalnyja spravy — za «ździek ź dziaržaŭnych simvałaŭ» i «abrazu prezidenta».
Kamientary