Praź miesiac paśla dziŭnaha samahubstva biełarusa Vitala Šyšova pryčyna śmierci ŭsio jašče nie ŭstanoŭlenaja.
Naviny.by pahavaryli z advakatam, a taksama z hałoŭnym śviedkam pa spravie pra samahubstva ŭ Kijevie biełarusa Vitala Šyšova. Jość ryzyka, što śledstva raściahniecca na hady, jak heta zdaryłasia z rasśledavańniem zabojstva žurnalista Hieorhija Hanhadze.
Krychu bolš za miesiac tamu biełaruska, palityčnaja emihrantka Bažena Žołudź paviedamiła ŭ kijeŭskuju palicyju ab źniknieńni svajho hramadzianskaha muža 26-hadovaha Vitala Šyšova. Jana raspaviała, što ranicaj 2 žniŭnia mužčyna vyjšaŭ na prabiežku ŭ Śviatošynski lesapark pobač z domam i da taho času nie źjaviŭsia.
Ranicaj nastupnaha dnia Vitala znajšli ŭ tym ža parku paviešanym.
Śledstva, jakoje viadzie Departamient stratehičnych rasśledavańniaŭ Nacyjanalnaj palicyi Ukrainy pad nahladam Hienprakuratury, razhladaje dźvie viersii zdareńnia: samahubstva i naŭmysnaje zabojstva ź imitacyjaj samahubstva.
Siarod matyvaŭ zabojstva hučać try viersii: kryminał, kanflikt z apałčencami z ATA, zakaznoje zabojstva ahientami biełaruskich śpiecsłužbaŭ.
Palityčny aktyvist Vital Šyšoŭ vosieńniu 2020 hoda źbieh u Kijeŭ ad pieraśledaŭ u Biełarusi, u apošnija miesiacy kaardynavaŭ dziejnaść častki biełaruskaj dyjaspary va Ukrainie, byŭ kiraŭnikom Biełaruskaha doma va Ukrainie.
Kijeŭski advakat Alena Haŭryluk 8 vieraśnia paviedamiła Naviny.by, što skončyła aznajamleńnie z materyjałami spravy pa fakcie śmierci Vitala Šyšova, dostup da jakich jana atrymała krychu bolš za tydzień tamu. Haŭryluk źjaŭlajecca pradstaŭnikom paciarpiełaha boku: 27 žniŭnia śledstva paćvierdziła, što dziadźka Vitala Šyšova maje status paciarpiełaha.
Zaraz blizkija i siabry Šyšova skancentravany na dvuch hałoŭnych pytańniach — pa-pieršaje, treba pa-čałaviečy pachavać Vitala, adnak morh biez dazvołu prakuratury cieła nie vydaje.
Pa słovach advakata, «cieła dla pachavańnia nam nichto nie vydaść, pakul nie budzie skončana sudova-miedycynskaja ekśpiertyza na pradmiet ŭstanaŭleńnia pryčyny śmierci i charaktaru cialesnych paškodžańniaŭ».
Voś hetaja ekśpiertyza i jość pa-druhoje. Ci pravodziłasia jana naohuł — jašče adno vialikaje pytańnie.
Jak paviedamiła advakat, u materyjałach spravy ekśpiertyzy niama. Z prakuratury jana atrymała adkaz, što «pa stanie na 3 vieraśnia sudmiedekśpiertyza nie pastupała ŭ Kijeŭskuju haradskuju prakuraturu i śledčyja orhany».
Tamu dazvołu na vydaču cieła aformić nie mohuć.
Alena Haŭryluk rychtuje zvarot da ministra ŭnutranych spraŭ Ukrainy.
«My chočam viedać asnoŭnaje: ci mohuć traŭmy, vyjaŭlenyja na ciele, śviedčyć ab hvałtoŭnaj śmierci, ci heta ślady ad pieršaj niaŭdałaj sproby paviešańnia. Śpiecyjalist, jaki pavinien pravieści ekśpiertyzu, taksama daje charaktarystyku inšym cialesnym paškodžańniam», — kaža advakat.
Jak paviedamlajuć pradstaŭniki śledstva, na ciele Šyšova jość traŭmy na nahach i rukach, pachodžańnie jakich treba rastłumačyć.
Pa ahulnaj praktycy na praviadzieńnie sudmiedekśpiertyzy advodzicca miesiac. Tamu Alena Haŭryluk čakała znajści jaje vyniki ŭ materyjałach spravy, jakija naličvajuć užo dzieviać tamoŭ. Adnak tam ich, nahadajem, nie akazałasia.
«U asnoŭnym spravu składajuć pratakoły apytańniaŭ śviedak. Adnak samaha važnaha na siońnia dakumienta ŭ materyjałach niama», — paviedamiła advakat.
Adsutnaść ekśpiertyzy, a taksama ŭmovy zachoŭvańnia cieła vyklikajuć u blizkich Vitala aściarohi: dokazy, jakija havorać na karyść viersii naŭmysnaha zabojstva, mohuć być praihnaravanyja, niedastatkova vyvučany abo źniščany naturalnym šlacham.
Pa słovach Baženy Žołudź, z momantu vyjaŭleńnia «cieła zachoŭvajecca ŭ morhu pry tempieratury 5-7 hradusaŭ ciapła».
«Heta my daviedalisia ad rabotnikaŭ morha. Pry hetym standart zachoŭvańnia cieła ŭ Ukrainie — +2 hradusy. A dla kryminalnych vypadkaŭ zvyčajna vykarystoŭvajecca bolš nizkaja tempieratura, kab zachavać ślady paškodžańniaŭ na ciele. Ale dla nizkich tempieratur, jak skazali mnie ŭ morhu, treba śpiecyjalnaje rasparadžeńnie śledčych orhanaŭ, jakoha ŭ rabotnikaŭ morha nie było i niama. Ja adpraviła zapyt u prakuraturu, kab jany rastłumačyli, z čym źviazanaja takaja chałatnaść, ale jany spuścili moj zvarot śledstvu», — raspaviała Bažena Žołudź karespandentu Naviny.by.
Žołudź nie viedaje, u jakim stanie zaraz znachodzicca cieła jaje hramadzianskaha muža. Maładaja žančyna kaža, što «cieła nie pakazali, ale pry takich umovach zachoŭvańnia praź miesiac tam užo niama na što hladzieć ni mnie, ni ekśpiertam. Havorka pra pachavańnie ŭ adkrytaj trunie ŭžo nie idzie».
1 vieraśnia advakat Alena Haŭryluk zrabiła zapyt u Kijeŭskuju haradskuju prakuraturu ab vydačy cieła Vitala Šyšova z morha, u advarotnym vypadku advakat čakaje arhumientavany adkaz ab pryčynach niavydačy cieła.
Taksama ŭ prakuraturu advakatam byŭ nakiravany zapyt ab aznajamleńni z vynikami ekśpiertyzy dla ŭstanaŭleńnia pryčyn śmierci Šyšova, kali takaja ekśpiertyza pravodziłasia.
«Va Ukrainie, zhodna z praviłami Ministerstva achovy zdaroŭja, kali na praciahu miesiaca ekśpiert nie zrabiŭ ekśpiertyzu, to jon pavinien davać piśmovaje tłumačeńnie abo ŭ prakuraturu, abo śledčamu, a taksama vusnaje tłumačeńnie svajmu vyšejstajačamu kiraŭnictvu», — adznačyła advakat.
Bažena taksama paviedamiła, što ŭ siaredzinie žniŭnia ŭ Kijeŭ ź Litvy dla praviadzieńnia ekśpiertyz prybyli zaprošanyja na dziaržaŭnym uzroŭni śpiecyjalisty.
Hetuju infarmacyju paćvierdziła i advakat. Pavodle jaje słoŭ, dla Ukrainy heta zvyčajnaja praktyka dla takich hučnych spraŭ, jak śmierć palityčnaha aktyvista. Adnak, pa źviestkach pradstaŭnikoŭ zahinułaha, mižnarodnyja ekśpierty pakul nie atrymali dostup da cieła, tak jak adpaviednyja dazvolnyja dakumienty jašče nie aformleny śledstvam.
Kamientary