«Treba było prybrać parazitaŭ z akružeńnia Cichanoŭskaj». Biahun zajaviŭ, što Karač finansuje kanał z kampramatam na Stryžaka i Viačorku
U telehramie doŭhi čas isnuje pamyjny kanał «Štab Anoški», stvaralniki jakoha metanakiravana bjuć pa akružeńni Śviatłany Cichanoŭskaj. Bolš za ŭsio dastajecca Andreju Stryžaku i Franaku Viačorku. Asobnyja ŭdary dalatajuć redaktarcy Kyky.org Nastaśsi Rahatko i Alaksandry Źvieravaj, dziaŭčynie palitviaźnia Eduarda Babaryki. U kanale źmiaščalisia skrynšoty z unutranaj kamunikacyi rabotnikaŭ štaba i ź ich pryvatnaj pierapiski. Hetaja infarmacyja aktyŭna vykarystoŭvałasia dziaržaŭnaj prapahandaj, kab dyskredytavać Cichanoŭskuju. Jaje štab šukaŭ, adkul adbyvajucca ŭciečki, ale publična nie adkazvaŭ apanientam.
U efiry ANT było abvieščana, što hety kanał viała rabotnica fondu «Kraina dla žyćcia» Kaciaryna Kanaplova. Nieŭzabavie fond adchryściŭsia ad jaje i zajaviŭ, što spyniaje supracu ź joj.
Ale chto takaja Kanaplova, šarahovaja aktyvistka nie samaha papularnaha fondu, kab atrymać dostup da ŭnutranaj pierapiski akružeńnia Cichanoŭskaj?
Pra matyvy i asablivaści dziejnaści «Štaba Anoški» raskazaŭ jaje były žanich Illa Biahun, jašče adzin ćmiany piersanaž.
Jon byŭ aktyvistam inicyjatyŭnaj hrupy Valeryja Capkały, paśla vybaraŭ uciok u Vilniu, pabyŭ niekalki miesiacaŭ u kamandzie fondaŭ salidarnaści, pakul nie viarnuŭsia ŭ Biełaruś u studzieni 2021 hoda. Ciapier jon staŭ paplečnikam Juryja Vaskrasienskaha. Rytoryka Vaskrasienskaha i Biehuna padobnaja — jany z hatoŭnaściu dajuć intervju dziaržaŭnym prapahandystam u vobrazie tych, chto raskajaŭsia ŭ svajoj supraćzakonnaj dziejnaści, i vylivajuć pamyi na apanientaŭ Alaksandra Łukašenki.
Čytajcie taksama. Chto taki Illa Biahun, jaki na dziaržaŭnym TB vylivaje brud na fondy salidarnaści i štab Cichanoŭskaj?
Dniami Biahun daŭ intervju žurnalistcy BT Ksienija Lebiedzievaj. U kancy razmovy havorka zajšła pra «Štab Anoški» i Kaciarynu Kanaplovu.
Biahun kaža, što paznajomiŭsia z Kanaplovaj u kastryčniku. Za nastupnyja dva miesiacy jon paśpieŭ zrabić joj prapanovu (reakcyja niaviesty nie paviedamlajecca), a ŭ studzieni ŭ adzinočku viarnucca ŭ Biełaruś.
— [Maja tahačasnaja niaviesta] — heta Kaciaryna Kanaplova, jakoj Ihar Tur (televiadučy ANT — «NN») prypisaŭ kiravańnie kanała «Štab Anoški».
— Tak jano i jość?
— U Ihara Tura ž taksama nie ŭsia infarmacyja. A ja z Kaciaj razam žyŭ, viedaju troški bolš.
«Štab Anoški» — heta kalektyŭny zborny vobraz, heta nie adzin čałaviek. Byli ludzi, jakija pisali teksty, chto nadavaŭ tekstam styl, chto rabiŭ vizualnaje supravadžeńnie. Heta prosta kalektyŭ ludziej, jakija byli akumulavanyja pad brendam «Štab Anoški». Tamu šukać niejkaha viarchoŭnaha žraca biessensoŭna. Ciapier tam, darečy, jość taki viarchoŭny žrec — Volha Karač, jakaja finansuje ŭsiu hetu dziejnaść i zakazvaje bal.
Na čym byŭ zasnavy hety kanał? Heta časovaja źjava, zasnavanaja tolki na źlivach z akružeńnia Cichanoŭskaj i «Bajsoł». Usio. I toje, ja kazaŭ ludziam: «Nie treba iści va-bank, nie treba vykładać videa ź dziaŭčynkaj, jakaja rabiła hetyja źlivy, budučy piersanalnym asistentam Stryžaka». Nu nie treba! Vy pajšli va-bank, dumali, što adbudziecca niejki ŭnutrany blickryh…
— Asistent Stryžaka — heta…
— Śvieta Hałuza. Jana była asabistym asistentam Andreja. U jaje byŭ dostup. Tamu ja śpiecyjalna pieraroblivaŭ skrynšoty, kab zabłytać, ad kaho hety skryn. Kab było niezrazumieła, źliŭ jaho toj, z kim pierapisvaŭsia Andrej [Stryžak], ci sam Andrej. Tamu mnohija krytykujuć: «Voś, vidać, što skryny — fejki». Tak, amal usie skryny — fejki! Heta rabiłasia dla taho, kab pieramiaścić paviedamleńnie na inšy bok [razmovy]. Ale nie treba było rabić idealna. Treba było dolu sumnievu pasiejać, kab u hramadstvie sumniavalisia. A ŭ samim štabie «Bajsoła» viedali b, što heta praŭda. Takaja lohkaja psichałahičnaja hulnia była (śmiajecca).
Vakoł Śviatłany Cichanoŭskaj sabralisia ludzi, jakija zusim užo nachabna karystalisia situacyjaj z punktu hledžańnia finansaŭ. Kali ŭžo vy chacieli niejkuju palityku rabić, to treba było rabić z narmalnymi ludźmi ŭ akružeńni. Asnoŭnaja stratehija «Štaba Anoški» była prybrać parazitaŭ z akružeńnia Cichanoŭskaj.
Čytajcie taksama. Chto takaja Volha Karač, jakaja choča padsiadzieć Cichanoŭskuju?
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary