U Minsku ad karanavirusa pamior 60-hadovy inžynier adnaho z sakretnych pradpryjemstvaŭ. U jaho nie było chraničnych zachvorvańniaŭ

Viečaram 3 krasavika, prykładna a 17:30, u Minsku pamior 60-hadovy Siarhiej Hovar. Jaho špitalizavali jašče 17 sakavika. Pra heta «NN» raskazała dačka niabožčyka Hanna.

«12 sakavika tata pryjšoŭ dadomu z pavyšanaj tempieraturaj. Jamu było kiepska, było kala 38 hradusaŭ. Na nastupny dzień jon nie pajšoŭ na pracu. 14 sakavika vyklikali chutkuju dapamohu, jany paraili źbivać tempieraturu paracetamołam. Niejki čas tempieratura padała, a potym znoŭ padniałasia. U treciuju balnicu tatu zabrali 17 sakavika, vyjavili prykaraniovuju pnieŭmaniju.

Rabili mazki na karanavirus, ale pieršy daŭ admoŭny vynik. Tamu tata lažaŭ u zvyčajnaj pulmanałohii, my jaho naviedvali. U paniadziełak, 23 sakavika, jaho pavinny byli pavieźci na renthien, ale jon nie dajšoŭ, stała kiepska, zabrali ŭ reanimacyju. Spačatku jon byŭ na kisłarodnaj padušcy, a potym pieraviali na štučnuju vientylacyju lohkich», — kaža Hanna.

Druhi mazok na karanavirus daŭ niešta siaredniaje miž karanavirusam i hrypam. I tolki treci mazok pakazaŭ stanoŭčy vynik, raskazvaje dačka. Vyniki hetaha mazka stali viadomyja 27 sakavika, a brali jaho za dva dni da hetaha. Paśla hetaha špitalizavali i svajakoŭ Hovara, u tym liku jahonuju dačku razam z chłopcam.

Taksama karanavirus byŭ vyjaŭleny ŭ starejšaj siastry Siarhieja Hovara, Volhi, jana ciapier u ciažkim stanie.

«Tata razam ź siastroj jeździli tolki na rynak «Ekspabieł» 7 sakavika. Kuplali padušku i koŭdru ŭ padarunak svajoj mamie. Jana žyvie z nami, joj 93 hady, vynik na karanavirus u jaje byŭ admoŭny. Chiba što tady mahli dzieści zarazicca. U taty nie było chraničnych zachvorvańniaŭ. Na pracy jon pastajanna prachodziŭ poŭny miedycynski ahlad, zdavaŭ analizy, rabiŭ pryščepki», — raskazvaje Hanna.

Siarhiej Hovar pracavaŭ inžynieram na adnym ź minskich sakretnych pradpryjemstvaŭ. Sam jon minčuk, vučyŭsia na fizfaku BDU.

Dačka kaža, što na pracu časam jeździŭ nie na mašynie, a na mietro. «Mahčyma, i tam moh padčapić. Jon pierachvareŭ u kancy studzienia, tamu arhanizm moh być asłableny. Za miažoj jon daŭno nie byŭ». U siamji była viersija, što zarazicca jon moh i ŭ balnicy, ale tady niezrazumieła, adkul karanavirus u siastry.

Apošnija dni było ŭžo zrazumieła, što Siarhiej Hovar u ciažkim stanie. «Paru dzion tamu adzin vielmi dobry doktar z reanimacyi skazaŭ, što ŭ taty stabilny puls, vielmi dobraja častata sercabićcia. I kali jon pratrymajecca jašče 3-5 dzion, to jość šaniec, što vyratujecca. Pra śmierć mnie paviedamiŭ toj samy doktar, jon šmat prasiŭ prabačeńnia, što nie zmahli vyratavać. Raniej hety

doktar kazaŭ, što ciapier ich na ŭsiu reanimacyju zastałosia try čałavieki, faktyčna, jany žyvuć tam», — raskazvaje dačka pamierłaha.

Što tyčycca samoj Hanny i jaje chłopca, to nastupny mazok na karanavirus u ich buduć brać 7 krasavika, a paśla vynikaŭ mohuć vypisać.

«Tatu kremirujuć. Heta naša siamiejnaja tradycyja. Spadziajomsia, my atrymajem urnu z pracham, kab mieć mahčymaść usioj siamjoj ź im raźvitacca», — kaža Hanna.

«Budziem hladzieć, što mienavita zapišuć u jakaści pryčyny śmierci. U nas ža lubiać pryhoža napisać, nibyta heta byŭ i nie karanavirus. Ja liču, što tut važnaja publičnaść i adkrytaść. Infarmacyi ad našych ŚMI ja daviaraju bolš, čym aficyjnaj», — zakančvaje dziaŭčyna.

• 0
• 0
• 0
• 0
• 0
• 0