Lidary italjanskich i brytanskich nieanacystaŭ naviedali Biełaruś, ich supravadžali Dziermant i Špakoŭski

Nadzvyčaj nieardynarnyja asoby ź Jeŭropy zavitali ŭ Biełaruś u pačatku krasavika. Adzin ź ich uvohule adkryta nazyvaje siabie fašystam. Z paviedamleńniaŭ u sacsietkach kiraŭnikoŭ prajektaŭ «Cytadel» i «Nomas» vynikaje, što ŭ našaj krainie znachodziacca lidar italjanskaj partyi Forza Nuova («Novaja siła») Raberta Fjore i staršynia Brytanskaj nacyjanalnaj partyi Nik Hryfin.

Pavialičyć

Sam spadar Hryfin źmiaščaje ŭ svaim tvitary zdymak z pomnikam Stalina. A Fjore vykłaŭ fota ź niejkaha restarana, dzie, aproč jaho, prysutničali fiłosaf Alaksiej Dziermant, palityčny ahladalnik Alaksandr Špakoŭski, ekanamist Alaksandr Sinkievič, palitołah Juryj Šaŭcoŭ. Usie jany — pastajannyja ekśpierty na dziaržaŭnym TB Biełarusi.

Taksama Fjore mieŭ sustreču z pradstaŭnikami Libieralna-demakratyčnaj partyi Biełarusi, jakoj kiruje Siarhiej Hajdukievič.

Jašče niekalkimi zdymkami pobytu Hryfina i Fjore ŭ Minsku padzialilisia ŭdzielnik prajekta «Cytadel» Alaksiej Dziermant i kiraŭnik kansiervatyŭnaha centra «Nomas» Piatro Piatroŭski. U kamientarach u fejsbuku Dziermant adznačaje, što nijakaj infarmacyi dla presy ab pryjeździe haściej nie budzie.

Chto ž takija hetyja Fjore i Hryfin? Heta krajnie pravyja, marhinalnyja palityki Italii i Vialikabrytanii.

Raberta Fjore pačynaŭ svoj šlach u palityku pry kancy 1970-ch z arhanizacyjaj «Treciaja pazicyja», što prytrymlivałasia nieafašysckaj ideałohii. Abvinavačvaŭsia ŭ terarystyčnaj dziejnaści ŭ 1970-ja. Uciakajučy ad imaviernaha aryštu, Fijore pierajechaŭ u Vialikabrytaniju. Prapahandyst idej Juliusa Evoła, ideołaha nieafašyzmu.

U 1999 hodzie Fjore viarnuŭsia ŭ Italiju, dzie pa siońnia ŭznačalvaje «Novuju siłu». Doŭhi čas byŭ u kaalicyi ź jašče adnoj ultrapravj partyjaj Italii «Sacyjalnaje dziejańnie», jakuju ŭznačalvała ŭnučka Bienita Musalini Alesandra.

Hetaja palityčnaja siła simpatyzuje Uładzimiru Pucinu. Fjore rašuča padtrymaŭ dałučeńnia Kryma da Rasii, a taksama rasijskuju pazicyju pa Ukrainie. Letaś italjaniec byŭ udzielnikam «Mižnarodnaha ruskaha kansiervatyŭnaha forumu», jaki sabraŭ u Sankt-Pieciarburzie nieafašystaŭ z usioj Jeŭropy.

«Ja nie liču, što nazyvacca fašystam haniebna, ale zajavy ab tym, što nacyst, ja liču paklopam i sprobaj dyskredytacyi», — kazaŭ Fjore ŭ 2015 hodzie ŭ Rasii.

Voś tak vyhladajuć mitynhi Forza Nuova ŭ Italii. Nacysckija ŭskidvańni ruk, nieanacysckija simvały kštałtu kielckaha kryža na takich mierapryjemstvach źjaŭlajucca zvyčajnaj spravaj.

Pavialičyć

Pavialičyć

Nik Hryfin na siońnia jašče mienš paśpiachovy palityk za svajho italjanskaha kalehu i siabra. Chacia Hryfin źjaŭlaŭsia kiraŭnikom Brytanskaj nacyjanalnaj partyi, a taksama byŭ deputatam Jeŭraparłamienta.

Kali Hryfin byŭ redaktaram časopisa The Rune, to demanstratyŭna ŭ svaich publikacyjach admaŭlaŭ isnavańnie Chałakosta. Jon pierakonvaŭ, što brytanskija ŚMI całkam kantralujucca habrejami, jakija pramyvajuć biełym brytancami mazhi, kab tyja prymali ideju multykulturalizmu.

Pavialičyć

U 1998 hodzie Hryfin navat byŭ pryznany vinavatym u raspaŭsiudzie materyjałaŭ, što raspalvajuć nacyjanalnuju varažnieču. Jon byŭ prysudžany da 9 miesiacaŭ źniavoleńnia z adterminoŭkaj na dva hady. Jašče raz jon aryštoŭvaŭsia ŭ 2004 hodzie. U 2009-m Hryfin zaklikaŭ tapić karabli z afrykanskimi nielehałami.

Ciapier rytoryka Hryfina i jaho partyi stała bolš pamiarkoŭnaj. U 2014 hodzie sud Uelsa pryznaŭ Hryfina bankrutam. U toj ža hod Hryfin byŭ vyklučany z šerahaŭ BNP za «sprobu destabilizacyi palityčnaha ruchu i ckavańnia siabraŭ arhanizacyi».

Hryfin taksama padtrymlivaje Uładzimira Pucina i Rasiju. «Maśmiedyja nazyvajuć nas fašystami. Ale my nie fašysty. Fašysty tyja, chto, naprykład, zabivaje ruskich va Ukrainie», — kazaŭ Hryfin.

Voś takich palitykaŭ pryvoziać u Biełaruś. «Pryŭkrasnyja intelektuały, jeŭrapiejskija patryjoty, kansiervatary ź vialikaj litary», — napisaŭ pra hetych ludziej Piatro Piatroŭski.

U svaim tvitary Fjore napisaŭ, što sustrakaŭsia taksama ź sienataram Marzalukom. Nam pakul nie ŭdałosia datelefanavacca da sp.Marzaluka, kab daviedacca pra źmiest hutarki.

• 0
• 0
• 0
• 0
• 0
• 0