Rasijski baksior i deputat Vałujeŭ pryjechaŭ u Žabinku i pabłytaŭ Biełaruś z Branskaj vobłaściu
Eks-čempijon śvietu pa boksie, a zaraz deputat i aktyŭny prapahandyst vajny suprać Ukrainy pahutaryŭ z vychavancami baksiorskaj škoły ŭ Žabincy.
Vałujeŭ pryjechaŭ u Žabinku ŭ bajcy z rasijskim ściaham i z nadpisami «Radzima» i «Vialikaja Śviataja Ruś» čamuści pa-anhlijsku.
Eks-čempijon śvietu raskazaŭ junym biełaruskim spartsmienam, jak pryjšoŭ u boks, parazvažaŭ, u čym sakret pośpiechu i sens žyćcia, a taksama pakazaŭ im niekalki pryjomaŭ. Paśla hutarki Vałujeŭ fatahrafavaŭsia ź dziećmi, niekatorym, akramia čyrvona-zialonych, dali rasijskija ściažki.
Cikava, što ŭ videa dla svaich sacsietak Vałujeŭ dapuściŭ ahavorku:
«Dziakuj vialiki ŭsim arhanizataram, škole boksa i, viadoma, fiederacyi boksa Branskaj… oj, prabačcie, Biełarusi za zaprašeńnie».
Na zakančeńnie staršynia miascovaha rajvykankama Andrej Kuźmič uručyŭ Vałujevu «simvaličny padarunak, jaki padkreślivaje siabroŭstva i adzinstva Biełarusi i Rasii».
Darečy, Vałujeŭ raniej zajaŭlaŭ, što «sajuz Biełarusi i Rasii nieparušny», a biełarusy i ruskija — «adzin narod, zmacavany ahulnaj historyjaj».
Vałujeŭ pabudavaŭ paśpiachovuju baksiorskuju karjeru, byŭ čempijonam śvietu ŭ ciažkaj vazie. Paśla taho, jak kinuŭ sport, jon byŭ akcioram, televiadučym, potym padaŭsia ŭ palityku. Vałujeŭ źjaŭlajecca deputatam Dziarždumy ad «Adzinaj Rasii» i aktyŭnym prychilnikam Uładzimira Pucina.
Za publičnuju padtrymku vajny suprać Ukrainy jon uniesieny ŭ sankcyjnyja śpisy Jeŭrasajuza i ZŠA.
Chtości stvaryŭ falšyvy sajt KDB i ciškom źbiraŭ danosy1
Kamientary