«Яна важыць 45 кілаграмаў, і гэта пры яе росце ў 175». Сястра Марыі Калеснікавай падзялілася апошнімі звесткамі пра яе
Па словах сястры палітзняволенай Марыі Калеснікавай Таццяны Хоміч, інфармацыя пра сястру да сям’і даходзіць «літаральна па драбочку», у асноўным ад вязняў, якія вызваліліся. Пра гэта Таццяна Хоміч расказала ў інтэрв'ю «Настоящему времени», піша «Радыё Свабода».
Таццяна Хоміч нагадала, што Марыя Калеснікава больш за паўтара года знаходзіцца ў памяшканні камернага тыпу (ПКТ). Але, паводле звестак Таццяны, з ПКТ сястру перыядычна змяшчаюць яшчэ і ў ШІЗА, а там дзейнічаюць абмежаванні на набыццё тавараў і на перадачы.
Між тым Марыі Калеснікавай, якая перанесла аперацыю на страўніку з-за прабадной язвы, патрэбнае адмысловае харчаванне, кажа сястра зняволенай Таццяна. Паводле яе інфармацыі, у ШІЗА набыць гэтую ежу сястра не можа. Таксама, паводле Таццяны Хоміч, для нармальнага харчавання Марыі не хапае грошай, якія дазваляюць патраціць у ПКТ.
«Турэмную ежу яна не можа есці, гэта вельмі грубая для яе ежа. Умовы ў ПКТ прадугледжваюць, што можна патраціць 35—70 рублёў на месяц, гэта каля 10—20 еўра на месяц. Але ўявіце, што на гэтыя грошы можна набыць у Беларусі? У лепшым выпадку гарбату, печыва. Але ж ёй яшчэ патрэбныя пракладкі, сродкі гігіены, якія ў перадачах да яе не трапляюць. Таму ўвесь гэты час Маша недаядае, фактычна яна галадае», — расказала Таццяна Хоміч пра сястру.
Таксама Таццяна пракаментавала тое, што цяпер адбываецца ў зняволенні з яе сястрой.
«Ад гэтага, скажу шчыра, я шакаваная. Мы пачулі, што яна важыць 45 кілаграмаў, і гэта пры яе росце ў 175 — уявіце!» — кажа Таццяна Хоміч.
Напярэдадні выданне «Новы час» са спасылкай на сваю крыніцу паведаміла, што з кастрычніка 2023 года Марыі Калеснікавай не перадаюць лістоў: іх рвуць у яе на вачах. На думку Тацяны Хоміч, яе сястры стварылі такую ізаляцыю, «каб яна думала, што пра яе ўсе забыліся».
«А яшчэ — каб не магла пра сябе перадаць нейкія звесткі, паколькі лічаць, што нават цяпер Маша — той чалавек, які вельмі моцна натхняе людзей. Але чаму да ўсяго гэтага дадаецца яшчэ і галадаванне?
Гэтыя ўмовы, якія ёй ствараюць, — вось гэта мне незразумела! Я лічу, што гэта немагчыма — у XXI стагоддзі, у цэнтры Еўропы мець такія цяжкія і нечалавечыя ўмовы. І я баюся, што ў нейкі момант можа паўтарыцца сітуацыя, як з Аляксеем Навальным, якую мы назіралі паўгода таму», — выказала асцярогу Таццяна Хоміч.
«Калі ты не ў гэтым спісе, то будзеш у другім». Як у Беларусі збіраюць подпісы за Лукашэнку17
Каментары
Ні слова не сказалі пра рэпрэсіі 2010 года, калі ўсіх кандыдатаў кінулі ў турмы. Ні слова не сказалі пра выбух у метро. Ні слова не сказалі ў падтрымку раней за іх затрыманага Сяргея Ціханоўскага. Ні слова не сказалі пра падрыхтоўку рэжыма да разгону паслявыбарчых пратэстаў. Каб людзі хоць падрыхтаваліся хаця б маральна да таго, што пасля закрыцця ўчасткаў будзе пабоішча.