У Лондане вынеслі прысуд падлетку, што выбег на поле ў фінале Лігі чэмпіёнаў па патрабанні беларускага блогера Mellstroy
Дарэчы, Mellstroy грошы так і не заплаціў.
16-гадовы падлетак прызнаўся, што выбег на поле 1 чэрвеня перад фіналам Лігі чэмпіёнаў «Рэал» Мадрыд — «Барусія» Дортмунд (2:0) на стадыёне «Уэмблі» ў Лондане за абяцаныя беларускім блогерам 300 000 фунтаў стэрлінгаў (386 500 даляраў), піша Бі-бі-сі.
У судзе па справах непаўналетніх стала вядома, што да выхаду на поле яго падштурхнуў беларускі трэш-блогер па імені Mellstroy Андрэй Бурым.
Падлетка прысудзілі да ўмоўнага тэрміну на шэсць месяцаў і абавязалі выплаціць унёсак на пакрыццё судовых выдаткаў.
Суду стала вядома, што хлопчык, імя якога не называецца, ніколі раней не наведваў футбольныя матчы і не цікавіцца гэтым відам спорту.
Звяртаючыся да суда, ён сказаў: «Я проста вырашыў зладзіць такі жарт, і я сапраўды шкадую пра гэта, і я шкадую пра гэта».
Эмілі Макнелі, якая прадстаўляла інтарэсы хлопчыка, сказала, што містэр Бурым, як вядома, «эксплуатаваў і выхоўваў» сваіх паслядоўнікаў і «падбухторваў людзей» да «прасоўвання свайго асабістага брэнда».
Перад футбольным матчам на хлопчыку была футболка з лагатыпам Mellstroy, і ён бачыў іншых людзей у такіх футболках на «Уэмблі».
Міс Макнэлі сказала, што ў падлетка «не было намеру» дакранацца да каго-небудзь з гульцоў.
Грошай, дарэчы, хлопчык ад блогера не атрымаў.
Выносячы прысуд падлетку, суддзя Ларэйн Макдонах сказала: «Я сапраўды заўважаю, што многія маладыя людзі знаходзяцца пад уплывам такіх уплывовых асоб з сацыяльных сетак. Я спадзяюся, што вы атрымалі каштоўны ўрок са свайго ўдзелу ў гэтым».
***
Скандальную вядомасць Mellstroy атрымаў у 2020 годзе, калі падчас аднаго са сваіх стрымаў збіў дзяўчыну. Пасля гэтага на Бурыма завялі крымінальную справу. У выніку яму прызначылі паўгода выпраўленчых работ і штраф.
Mellstroy і цяпер рэгулярна трапляе ў скандальныя навіны, раздаючы сваім гледачам вар'яцкія заданні і абяцаючы за іх шчодра заплаціць. Пасля, праўда, гэтыя абяцанкі не заўсёды стрымлівае.
Так, літоўскі хлопчык, які дасціпна папрасіў прэзідэнта сваёй краіны Гітанаса Наўседу перадаць прывітанне Mellstroy, з двух мільёнаў даляраў, якія за гэта паабяцаныя, зможа атрымаць добра калі «толькі» 100 тысяч. Іншаму чалавеку было адмоўлена ў выплаце мільярда расійскіх рублёў (каля 11 мільёнаў даляраў) за размяшчэнне ніка Mellstroy на Месяцы.
Каментары