«Дзеці гулялі, а змяя плавала ў лужыне». У раёне Барысава нашэсце гадзюк — камунальнікі не рэагуюць
Атрутных змей знаходзяць на дзіцячых пляцоўках, каля пад'ездаў жылых дамоў, у смеццевых баках і проста на тратуарах. Пры гэтым гарадскія службы аператыўна не рэагуюць.
![](http://d3kcf2pe5t7rrb.cloudfront.net/img/w840d4webp1/photos/z_2024_07/768d8e6fb2d43530a1f8d854ac389bd0-pkalo.jpg.webp)
Нашэсце гадзюк перажываюць жыхары раёна Лядзішча. Мясцовыя жыхары звязваюць актывізацыю змей з недагледжанасцю раёна.
У прыватнасці, тут рэдка косяць траву. У некаторых месцах яна дасягае росту чалавека — у гэтым асяроддзі змеі адчуваюць сябе камфортна і размнажаюцца, піша Onliner.
«Лядзішча — былы вайсковы гарадок. І цяпер гэты раён, можна сказаць, у заняпадзе: дарогі разбітыя, смеццевыя бакі іржавыя, трава някошаная. Не дзіўна, што ў нас завяліся змеі», — расказвае мясцовая жыхарка.
![](http://d3kcf2pe5t7rrb.cloudfront.net/img/w732d4webp1/photos/z_2024_07/0faa52daedf4e9d251d2440223612ada-ajxlc.jpg.webp)
Першую змяю знайшлі 12 ліпеня. Дзеці гулялі побач з лужынай, у якой плавала гадзюка.
«Наш сусед злавіў яе, паклаў у слоік і адвёз у лес. На наступную раніцу хлапчукі знялі відэа з яшчэ адной змяёй. Потым суседка наткнулася на вялікую, не менш за метр, асобіну проста на пешаходнай дарожцы. У суме не менш за пяць змей за апошні тыдзень», — кажа барысаўчанка.
Шмат скаргаў на змей і ў пабліках раёна. Людзі расказваюць, што рэгулярна натыкаюцца на гадзюк падчас шпацыраў з сабакамі. Дасведчаныя людзі ўпэўнена кажуць, што гэта менавіта гадзюкі — гэта значыць атрутныя змеі.
![](http://d3kcf2pe5t7rrb.cloudfront.net/img/w732d4webp1/photos/z_2024_07/b2b275858cd6af5573a82c63e0daaeae-91vur.jpg.webp)
Жыхары раёна звярталіся па дапамогу ва ўсе інстанцыі: тэлефанавалі ў 115, у МНС, ЖЭУ. Аператыўна адрэагаваць ніхто не змог, і таму людзі сталі вырашаць пытанне сваімі сіламі.
«Мы самі знайшлі ў інтэрнэце касца і скінуліся на яго аплату. І толькі пасля таго, як нам нарэшце выкасілі ўвесь двор, ужо раніцай ЖЭУ даслала свайго спецыяліста. У іх усяго адзін касец на ўвесь раён, і ў таго то часу няма, то бензіну — увогуле, спрабуем неяк спраўляцца самі хіба што», — дзеліцца барысаўчанка.
Супрацоўнік НАН, кандыдат біялагічных навук Сяргей Драбянкоў пацвярджае — на фота сапраўды гадзюкі. І гэта небяспечна для мясцовых жыхароў.
«Тут усё залежыць ад размяшчэння раёна і экалагічнай сітуацыі. Калі гэта перыферыя і побач ёсць лес, а ў раёне для змей створаныя спрыяльныя ўмовы (у прыватнасці, тая ж высокая трава), то яны будуць працягваць прыпаўзаць», — адзначыў навуковец.
Драбянкоў лічыць, што неабходна прыводзіць у парадак інфраструктуру і заказваць адлоў на прылеглых тэрыторыях.
Каментары