«Скажыце, а змагар — гэта хто?» Пра што пішуць у чаце ахвотных перасяліцца ў Беларусь
Беларусь губляе дзясяткі тысяч грамадзян, якія эмігруюць у іншыя краіны, але некаторыя замежнікі, наадварот, збіраюць чамаданы ў Беларусь. «Наша Ніва» вывучыла чат, створаны, каб матываваць жыхароў Латвіі перасяляцца ў нашу краіну.
Суполка, пра якую ідзе гаворка, мае назву «На ПМЖ в Беларусь. Chat». На сёння ў ёй 1547 падпісантаў. У апісанні чата пазначана: «Разбіраюцца пытанні афармлення дакументаў, міжнароднага пераезду, рэгістрацыі на новым месцы, куплі нерухомасці, сацыяльныя пытанні і гэтак далей». Гледзячы з тэматыкі паведамленняў, большасць удзельнікаў суполкі, калі не ўсе — гэта жыхары Латвіі.
Шмат удзельнікаў гэтай тэлеграм-суполкі хаваюцца за псеўданімамі. Але па тых, хто падпісвае акаўнт імем і прозвішчам, выглядае, што этнічных латышоў сярод будучых эмігрантаў у Беларусь няшмат: у спісе запар усходнеславянскія імёны. Удзельнікі чата пішуць пра легалізацыю на падставе беларускіх каранёў.
Вядома, перасяленцаў хвалююць звычайныя эмігранцкія пытанні: як зрабіць дакументы і разабрацца ў тонкасцях беларускіх дазволаў на пражыванне, як перавезці рэчы ў нашу краіну і набыць у ёй нерухомасць. Але ёсць і больш арыгінальныя паведамленні.
Адна з апошніх дыскусій у чаце — пра тое, з якіх прычын з’язджаць з Латвіі ў Беларусь і ці варта гэта рабіць. Перасяленцы прызнаюць, што заробкі ў нашай краіне ніжэйшыя, чым у Латвіі, але зважаюць, што ў Латвіі — усё па-латышску, а ў Беларусі можна застацца рускамоўным.
Так, у нашых школах выкладаюць беларускую мову, але эмігранты заўважаюць, што па-беларуску не выкладаюцца складаныя прадметы накшталт матэматыкі ці фізікі і выражаюць гатоўнасць вывучыць беларускую. А каб даказаць, што гэта не так складана, цытуюць пачатак купалаўскага «Кургана».
Багата абмеркаванняў у чаце даюць падставу лічыць, што сярод перасяленцаў шмат сталых людзей, а то і пенсіянераў:
«Я 32 гады стажу маю ў Латвіі, пенсія, калі паглядзець у vssa, у мяне будзе 350 еўра».
«Муж ужо пенсіянер, яму цяжка прывыкаць да кіравання ў буйным горадзе».
«А калі задэклараваўся ў Беларусі, то што, пенсію не плацяць?»
«Мне ў 70 гадоў трэба запытваць даведку аб несудзімасці і здаваць аналізы на ВІЧ і СНІД».
Некаторыя падыходзяць да эміграцыі ў Беларусь вельмі эмацыйна. Хвалююць і абставіны жыцця ў сваёй першапачатковай краіне, і бюракратычныя складанасці пераезду:
«А ў мяне сын пойдзе ў садочак налета — як уяўлю, што яму ні слова не перакладуць на рускую, дык яшчэ і будуць здзекавацца, тыркаць носам — дык мне проста блага. Таму будзем ратаваць дзяцей, так».
«Я пакуль усе даведкі збіраю, я не ем нармальна, не сплю, пакуль усё вывучаю. Гэта адымае і грошы, і сілы. Прадугледзець усе нюансы… Гэта тытанічная праца для простага чалавека. А тут яшчэ раптоўнае закрыццё межаў прарочаць… Наглуха закрыць. Я калі да АГіМа даеду, я там і ўпаду».
Таксама ўдзельнікаў чата хвалюе магчымасць таго, што краіны ЕС закрыюць мяжу з Беларуссю. Як тады трапіць у нашу краіну? Некаторыя кажуць пра магчымасць паехаць праз Турцыю, іншыя лічаць, што больш падыдзе Расія.
Але абмяркоўваюць часам і праблемы ў краіне:
«З працай у РБ складана. Асабліва тым, хто прыязджае нанова»
«Хто ў курсе, пры поўнай мабілізацыі ці будуць прызываць мужчын з ПМЖ, ці толькі грамадзян?»
Яшчэ адзін штрых да партрэта гэтых эмігрантаў у Беларусь — тое, як часта яны выкарыстоўваюць праўладную лексіку:
«Недапрацоўка. У Беларусі з гэтым строга. Бацька з кожнага запытае».
«Гэта не беларус, гэта змагар. Змагары — гэта антыбеларусы».
«Скажыце, а змагар — гэта хто?»
«Беларусы таксама розныя. Я тут ведаю аднаго беларуса, дык ён па-руску адмаўляецца гаварыць, толькі на мове. На аватарцы ў яго БЧБ-сцяг, ён увесь такі за Ціханоўскую. Не камунікую з ім у выніку».
У суполцы адзіны адкрыты адміністратар, і гэта чалавек пад нікам Аляксандрс Лемяшонакс. Праўда, часам адміністратар у паведамленнях ад імя чата піша пра сябе з жаночымі канчаткамі, але можам выказаць здагадку, што акаўнтам Аляксандра карыстаецца яго жонка Дар’я Лемяшонак — тым больш што спасылка на чат пазначаная ў яе акаўнце ў фэйсбуку.
Аляксандр родам з Рыгі, вучыўся ў школе ў буйным мястэчку Скрыверы, што знаходзіцца за 84 кіламетры ад Рыгі. Цяпер мужчына жыве з жонкай у Наваполацку.
Жонка Аляксандра Дар’я родам з Наваполацка, яна скончыла каледж у Полацку і мясцовы дзяржуніверсітэт імя апякункі горада Еўфрасінні. Жанчына працуе выкладчыцай англійскай мовы ў анлайн-школе Skyeng. Таксама ў сваёй старонцы на фэйсбуку яна называе сябе «працаўніцай святла», «пасвячонай вядзьмаркай» і «майстаркай [японскай нетрадыцыйнай медыцыны] рэйкі, масажу».
У сваім фэйсбуку Дар’я публікуе шмат прарасійскіх пастоў і нярэдка даходзіць да знявагі Украіны, не любіць і заходнія краіны. Вось некалькі цытат:
«Ахрэсары, тут новая версія падкаціла пра тое, хто ж насамрэч выкапаў Чорнае мора:))»
«Цяпер зразумела, адкуль бяруцца ваенныя прагнозы ўкраінскіх «экспертаў»:)) — гадаюць на чабурэках».
«Бамжы, бруд, галеча, няма дарог. І гэта пра Мілан! Цікавы шпацыр па вуліцах сталіцы моды:)»
«Чытаю каментары пад пастом Уладзіславы пра смачныя беларускія шакаладкі. Панабеглі хахлы з чумой у галаве».
Часам пра рэсурс расказвае блогер Раман Самуль. Гэта латвіец, які пераехаў у Беларусь, як сцвярджаецца, праз палітычны пераслед у Латвіі. Мужчына вядзе свой ютуб-канал пад назвай «Правда ТВ», на які падпісана амаль 23 тысячы чалавек. Вось некалькі загалоўкаў яго апошніх ролікаў, каб вы разумелі іх тэматыку:
«Беларусь — гэта Швейцарыя ў Еўропе», «Вадзім Ава: Са старых у Латвіі здзекуюцца і ўсяляк спрабуюць іх знішчыць», «Андрэй Мамыкін: У Латвіі за меркаванне здзекуюцца і цкуюць», «Таццяна Манцян: З Трыябалтыкі даўно час валіць!».
«Наша Нiва» — бастыён беларушчыны
ПАДТРЫМАЦЬСейм Латвіі ўхваліў забарону рускай мовы ў грамадскіх СМІ
У Латвіі хочуць забараніць аўтамабілі з беларускімі нумарамі
Хто тая жанчына, якую Марзалюк у эфіры БТ абазваў «шваллю з Гродна», і што яна піша ў чатах? Расказваем пра доктарку Стэфановіч24
Каментары