Беластоцкія дэпутаты аднагалосна прагаласавалі за сквер Вольнай Беларусі
У Беластоку з'явіцца сквер Вольнай Беларусі. За гэта 29 мая аднагалосна прагаласавалі дэпутаты Беластоцкай гарадской рады, пра гэта паведаміў «Белсат».
Беларускае пытанне ў парадку дня рады стаяла першым і атрымала станоўчае рашэнне, ніхто не выступіў супраць.
Сквер, якому вырашылі даць такую назву, узнікне на вуліцы Электрычнай побач з консульствам Беларусі ў Беластоку.
Такім чынам мясцовыя ўлады выйшлі са складанай сітуацыі, да якой прывяло рашэнне, прынятае на гарадской радзе ў верасні 2022 года. Тады частцы вуліцы Электрычнай, дзе каля 20 гадоў месціцца консульства Рэспублікі Беларусь, ад вуліцы Варшаўскай да вуліцы Яна Клеменса Браніцкага, далі назву вуліцы Вольнай Беларусі. Але жыхары вуліцы выступілі супраць і пачалі збіраць подпісы за вяртанне ранейшай назвы. Урэшце Ваяводскі адміністратыўны суд у пачатку сакавіка 2023 года прызнаў рашэнне гарадской рады неправамоцным.
Кіраўніцтва Беластока абяцала выйсці з гэтай сітуацыі, і закладанне скверу аказалася вельмі дарэчным, бо на гэта не трэба атрымліваць згоды жыхароў.
«Гэта найлепшае выйсце ў гэтай сітуацыі, якое і так, безумоўна, будзе раздражняць рэжым Лукашэнкі», — напісаў з гэтай нагоды ў сваіх сацыяльных сетках намеснік прэзідэнта Беластока Рафал Рудніцкі.
Чытайце таксама:
«Гэта зробіць нас толькі мацнейшымі». Беларускія выдаўцы прадавалі кнігі на кірмашы ў Беластоку
«Я павінен пазваніць нашаму куратару». Як завозілі мігрантаў у Беларусь — цікавыя дэталі з перахопленых тэлефонных размоў4
Каментары