Новы Maybach, патрыманы Lamborghini і Land Rover колеру матавага золата. Топ-7 самых дарагіх аўто, якія прадаюцца ў Беларусі
Паглядзелі, якія аўтамабілі прапануе беларускі рынак у цэнавым дыяпазоне ад 300 тысяч даляраў.
Maybach
Самы дарагі аўтамабіль, які толькі ёсць у продажы ў Беларусі, — Mercedes-Benz Maybach Z223. Аўтамабіль новы, без прабегу. Цана прадстаўнічага седана — 507 991$.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-041-lsxhv.png.webp)
Прадае шыкоўны аўтамабіль коштам больш за паўмільёна даляраў мультыбрэндавы салон, які спецыялізуецца на продажы аўто прэміяльных брэндаў.
Lamborghini Urus
Другі па дарагоўлі аўтамабіль у Беларусі, Lamborghini Urus, прадае прыватная асоба. За паркетнік 2019 года з прабегам 19 900 км уласнік просіць 410 000$.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-042-d2xdf.png.webp)
Прадавец адзначае, што трохлетні Lamborghini знаходзіцца ў стане новага аўтамабіля. З апісання вынікае, што даражэзны паркетнік прывезены да нас з Еўропы. Аўтар аб'явы пазначае, што аўтамабіль цалкам размытнены і стаіць на ўліку ў Беларусі. Пасрэднікаў, перакупаў і аўтасалоны просяць не турбаваць.
Амаль новы Range Rover
ТОП-3 самых дарагіх аўто замыкае «амаль новы» Land Rover Range Rover V. Хоць аўтамабіль і 2022 года выпуску, ён не новы. Уседарожнік мае прабег 2 642 км. Каштуе такі аўтамабіль 380 933$, у цане закладзены 20% ПДВ. Апроч інфармацыі пра ПДВ, у апісанні пазначана, што аўтамабіль — у стане «новага».
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-043-xy8iy.png.webp)
«Амаль новы» Land Rover выкананы ў колеры матавага золата. Камплектацыя ўседарожніка называецца FIRST EDITION.
Mercedes-Benz Gelendwagen
Усяго на тысячу даляраў танней прадаюць цалкам новы «Гелік». Цяпер Mercedes-Benz G 63 AMG ацэнены ў 379 956$.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-044-ybnkk.png.webp)
Прадавец адзначае, што аўтамабіль знаходзіцца ў Мінску і размытнены на РФ. Хутчэй за ўсё, інфармацыя пра тое, што машына размытнена на РФ, з'яўляецца не больш чым прыманкай для расійскіх пакупнікоў, бо ніякай асаблівай размытнёўкі на РФ не існуе. Беларусь і Расія проста знаходзяцца ў адной мытнай прасторы.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-045-qmnqo.png.webp)
Lamborghini з ЗША
Роўна за 360 тысяч даляраў у Мінску прадаюць яшчэ адзін Lamborghini Urus 2018 года выпуску, які да таго, як патрапіць у Беларусь, паспеў паездзіць у Штатах. Прабег аўтамабіля на дадзены момант складае 4 750 км. З часу продажу гэтага аўто ў ЗША летам мінулага года, Lambo праехала менш за 500 км.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-046-ywax9.png.webp)
«Аўтамабіль у ідэальным тэхнічным стане, кузаў цалкам абклеены празрыстай ахоўнай плёнкай, самая поўная камплектацыя», — пазначана ў апісанні.
Maybach з прабегам
У Магілёве на продаж выстаўлены яшчэ адзін Maybach 2022 года выпуску, але, у адрозненне ад самага дарагога выстаўленага на продаж аўто ў Беларусі, гэты Mercedes-Benz Maybach не новы, а з прабегам 10 000 км. За люксавы ўседарожнік з мінімальным прабегам просяць 320 000$.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-047-eihq5.png.webp)
Чырвоная Ferrari
За 300 000$ у Мінску прадаюць Ferrari 488GTB. Аўтамабіль 2019 года выпуску, заяўлены прабег — 30 000 км, траціну з якіх аўтамабіль праехаў па Беларусі. Ferrari замыкае спіс аўто коштам ад 300 000$. Да Беларусі аўтамабіль экплуатаваўся ў Штатах.
![](http://d3kcf2pe5t7rrb.cloudfront.net/img/w732d4webp1/photos/z_2022_11/2022-11-048-n0q7x.png.webp)
Разгон да сотні суперкар пераадольвае за 2,9 секунды, а максімальная хуткасць — 340 км/г. «Размытнены, абслужаны, прабег у Беларусі 10 000 км», — гаворыцца ў апісанні. Ferrari замыкае спіс аўто коштам ад 300 000$.
Каментары