Гэты від раку з'яўляецца самым распаўсюджаным у свеце. Вось галоўныя міфы пра яго

Доктар Уннаці Дэсаі з Nuffield Health (найбуйнейшай дабрачыннай арганізацыі аховы здароўя ў Злучаным Каралеўстве) расказвае ў матэрыяле The Sun пра восем найбольш распаўсюджаных міфаў і раскрывае, чаму яны насамрэч не адпавядаюць рэчаіснасці.

1. Нашэнне бюстгальтара на костачках павялічвае рызыку

Сцверджанні аб тым, што бюстгальтары на костачках здушваюць лімфатычную сістэму грудзей, выклікаючы тым самым назапашванне таксінаў і павялічваючы рызыку раку малочнай залозы, не пацвярджаюцца навукай.

Тып бюстгальтара, які вы носіце, цеснасць або ваша адзенне не маюць ніякага дачынення да рызыкі развіцця раку грудзей.

2. Карыстанне антыперспірантам павялічвае рызыку

Ёсць сцвярджэнні, што парабены, якія выкарыстоўваюцца ў якасці кансервантаў у некаторых антыперспірантах, могуць спрыяць развіццю раку грудзей. Аднак ніякай прычынна-выніковай сувязі паміж парабенамі і ракам малочнай залозы знойдзена не было.

3. Чым менш вашыя грудзі, тым ніжэй рызыка

Рызыка ўзнікнення рака малочнай залозы не залежыць ад памеру грудзей. Аднак памер можа паўплываць на выяўленне. Чым большыя або шчыльнейшыя грудзі, тым больш уважліва трэба праводзіць самаабследаванне, каб пераканацца, што прамацваюцца ўсе глыбокія тканіны.

У меншых грудзях або пры меншай шчыльнасці тканін малочнай залозы змены могуць быць больш прыкметнымі. Важна рэгулярна правяраць грудзі, незалежна ад памеру і шчыльнасці, каб хутчэй заўважыць любыя змены.

4. Кафеін можа выклікаць рак грудзей

Не выяўлена ніякай прычыннай сувязі паміж ужываннем кафеіну і захворваннем на рак малочнай залозы. Пакуль што незразумела, ці можа хвароба грудзей быць звязана з кафеінам.

5. Людзі з фіброзна-кістознымі зменамі грудзей падвяргаюцца большай рызыцы

У мінулым лічылася, што людзі з грудкаватымі, шчыльнымі грудзьмі падвяргаюцца большай рызыцы захварэць. Аднак з тых часоў навука прыйшла да высновы, што ніякай сувязі ўрэшце рэшт няма.

Калі ў вас ёсць такі тып грудзей, можа быць складаней адрозніць нармальную тканку ад ракавай, таму важна, каб вы паведамлялі пра любыя змены вашаму доктару.

6. Рак грудзей заўсёды выяўляецца ў выглядзе шышкі

Многія жанчыны, якія абследуюць свае грудзі, памылкова лічаць, што яны павінны шукаць выключна ўшчыльненні ці шышкі.

Ёсць і іншыя змены ў грудзях, на якія варта звярнуць увагу, напрыклад:

• ушчыльненне або прыпухласць у грудзях, верхняй частцы грудзей або падпахах;
• змены на скуры, такія як зморшчыны або ямачкі;
• змена колеру грудзей — ці не выглядаюць яны чырвонымі або запалёнымі;
• змяненне саска — ці не выглядае ён вывернутым;
• сып або скарыначкі вакол саска;
• незвычайныя выдзяленні з саска;
• змена памеру або формы грудзей.

Калі вы заўважылі якія-небудзь змены ў тканінах грудзей, важна звярнуцца да тэрапеўта для поўнага абследавання.

7. Мамаграмы падвяргаюць вас такой колькасці радыяцыі, што павялічваюць рызыку рака

Хоць і праўда, што радыяцыя выкарыстоўваецца ў мамаграфіі, яе колькасць настолькі малая, што звязаныя з гэтым рызыкі мізэрныя ў параўнанні з велізарнымі прафілактычнымі перавагамі, атрыманымі ад тэсту.

Мамограф можа выявіць ушчыльненні задоўга да таго, як іх можна будзе прамацаць ці заўважыць іншым чынам, і чым раней гэтыя шышкі будуць выяўленыя, тым больш шанцаў на станоўчы вынік.

Тэсты не рэкамендуюцца маладым людзям, паколькі ў іх звычайна больш шчыльная тканіна малочнай залозы, што абцяжарвае выяўленне анамалій. У гэтым выпадку доза апраменьвання не можа быць апраўдана выкарыстаннем мамаграфіі для звычайнага скрынінга

8. Усе ўшчыльненні ракавыя

Шышка не абавязкова з'яўляецца прыкметай таго, што ў вас рак грудзей. Прыкладна 80% шышак у грудзях выкліканыя дабраякаснымі (неракавымі) зменамі, кістамі або іншымі захворваннямі.

Аднак, калі вы ўсё ж такі выявілі шышку, вельмі важна, каб вы праверылі яе ў тэрапеўта, каб быць упэўненай.

Як праверыць грудзі

Існуе пяць этапаў самаабследавання, якія вы можаце правесці дома, каб праверыць наяўнасць змяненняў.

• Крок першы: пачніце з таго, што станеце насупраць люстэрка, паклаўшы рукі на сцёгны і расправіўшы плечы. Вы павінны шукаць любыя ямачкі, зморшчыны, выпукласці скуры, пачырваненне, сып або змены на сасках.
• Крок другі: усё яшчэ гледзячы ў люстэрка, падніміце абедзве рукі над галавой і праверце тыя ж змены.
• Крок трэці: трымаючы рукі над галавой, праверце, ці не вылучаецца вадкасць з саскоў. Гэта можа быць малочная, жоўтая або вадзяністая вадкасць або кроў.
• Крок чацвёрты: лежачы, выкарыстоўваючы супрацьлеглую руку, праверце кожную з грудзей. Некалькімі пальцамі, трымаючы іх роўна і разам, зрабіце невялікія кругавыя рухі вакол грудзей. Пераканайцеся, што вы прамацалі ўсе грудзі, рухаючыся зверху ўніз па гэтых маленькіх колах. Гэта дапамагае распрацаваць сістэму або шаблон, каб пераканацца, што кожны сантыметр ахоплены. Лёгка націскайце, каб прамацаць тканіны зверху; сярэдне націскайце, каб даследаваць тканіны усярэдзіне грудзей; і моцна націскайце, каб намацаць глыбокія тканіны, бліжэй да грудной клеткі.
• Крок пяты: абмацайце грудзі стоячы або седзячы, выкарыстоўваючы тыя ж невялікія кругавыя рухі.

Калі справа даходзіць да праверкі грудзей, строга кажучы, няма правільнага і няправільнага спосабу. Самае галоўнае, што вы робіце гэта рэгулярна, у ідэале раз у месяц. Толькі даведаўшыся, як вашыя грудзі выглядаюць і адчуваюцца «ў норме», вы зможаце вызначыць, ці ёсць змены. Такім чынам, правяраеце вы іх у ложку, у душы або ў распранальні трэнажорнай залы — не мае значэння.

• 41
• 0
• 3
• 2
• 1
• 3
• 5
• 0