Чыноўнікі выправілі гандлёвы цэнтр «Сталіца» — як «падземка» ператварылася ў запаведнік беларускага
«Мы выправілі, зрабілі «Сталіцу» лепшай», — адрапартавала ў дзяржаўных СМІ намесніца старшыні Мінгарвыканкама Надзея Лазарэвіч напярэдадні візіту туды Аляксандра Лукашэнкі. «Сталіцу» канчаткова перафарматавалі ў шоўрум айчынных брэндаў з цвёрдай упэўненасцю, што гэта верне гандлёваму цэнтру былую славу. Мы паглядзелі, што прапаноўваюць там пакупнікам пасля «рэбрэндынгу».
Для свайго часу «Сталіца» стала прарывам
Пасля некалькіх год складаных падземных прац пад кіраўніцтвам генпадрадніка «Мінскпрамстрой» «Сталіца» канчаткова адчыніла свае дзверы ў 2007 годзе. Для свайго часу гэта быў прарыў — першы вялікі гандлёвы цэнтр эпохі незалежнасці, яшчэ і падземны, таму і трафік там быў шалёным. «Сталіца» была ўлюбёным месцам для шопінгу як у мясцовых жыхароў, так і турыстаў, там прызначалі спатканні і бізнэс-сустрэчы, арганізоўвалі сумесныя паходы ў кіно. На першым паверсе кампаніямі заўсёды збіралася моладзь і студэнты блізкіх ВНУ.
Менавіта там многія пазнаёміліся з моднымі брэндамі Quick Style, Mango, Mexx, Jack&Jones і зведалі, што такое танны сімпатычны мас-маркет у крамах Calliope і Terranova.
Дарэчы, перад тым як у «Сталіцы» ў 2009 годзе адкрыўся першы магазін Mango, яго прадстаўнікам паказвалі гандлёвыя плошчы пад зямлёй і яны іспанцам вельмі не спадабаліся: «Няма ні канцэпцыі, ні плыні пакупнікоў, ні вітрын патрэбнага фармату». Але выбару тады ўсё роўна не было — менавіта гэтым можна патлумачыць, чаму і іншыя сусветныя брэнды на той момант «асядалі» ў «Сталіцы».
Праўда, залатыя гады цягнуліся нядоўга — роўна да таго моманту, пакуль у Мінску не пачалі з’яўляцца новыя, больш прасунутыя гандлёвыя цэнтры, якім можна было супрацьпаставіць толькі знаходжанне ў самым цэнтры каля метро. Тым больш, у «Сталіцы» спачатку закрыўся кінатэатр, а паўнавартаснага фудкорта так і не з’явілася. Наведвальнасць пачала імкліва падаць, і паступова адтуль сыходзілі асноўныя брэнды-магніты: Mexx, Vero Moda, Jack & Jones, Mango, Sister’s, Savage, Tally Weijl, DeFacto, Terranova, Women’s Secret.
І хоць у 2018 годзе спецыялісты галоўнага кіравання спажывецкага рынку Мінгарвыканкама заяўлялі, што бізнэс-запаўняльнасць для ГЦ «Сталіца» склала 91 %, тое, што яны ў хуткасці пайшлі на зніжэнне ставак арэнды ў сярэднім на 30%, не казала на карысць гэтаму факту.
Каранавірус жа ў 2020-м дадаткова ўдарыў па шопінгу ў «падземцы» — у 2021-м там пуставала 4432 арэндныя квадратныя метры. А трафік наведнікаў знізіўся амаль на 70%.
«Сышлі ад нас — сыходзьце! Мы будзем прадаваць сваё»
Тады ж, год таму, у «Сталіцу» быў празначаны новы кіраўнік — Ірына Дмухоўская, якая адразу падзялілася грандыёзнымі планамі, каб удыхнуць у ГЦ новае жыццё (да «Сталіцы» Дмухоўская кіравала «Мінатэлем», у структуру якога сярод іншага ўваходзяць чатыры гасцініцы Мінгарвыканкама):
«Абнавіць дызайн: скажам, усталяваць панарамныя акварыумы ці зрабіць панарамную падлогу са шкла, пад якім будзе каласіцца залатое беларускае жыта».
Ну, і адна з галоўных мэт новай кіраўніцы была — прасоўваць беларускае.
З апошнім акурат склалася — «Сталіца» запоўнілася амаль выключна айчыннымі брэндамі. Цяпер там працуе 116 аб’ектаў. Каля 70% плошчы занята нехарчовымі крамамі. Сярод іх — «Камволь», Аршанскі льнокамбінат, «Элема», «Алеся», «Нёман», Mark Formelle. Харчовая ж прамысловасць прадстаўлена «Камунаркай», «Спартаком», «Слодычам», «Чырвоным харчавіком», «Чырвоным мазыранінам» і іншымі вытворцамі. Тут адкрылі таксама краму з мерчам Лукашэнкі.
З былых замежных брэндаў, што захавалі свае пазіцыі, напрыклад, турэцкі Colin's і расійскі «Тваё». У астатнім сённяшняя «Сталіца» мала адрозніваецца ад «гумаў-цумаў».
«Нарэшце зрабілі беларускі ГЦ — гэта ўжо добра. Сышлі ад нас — сыходзьце! Мы будзем прадаваць сваё», — ухваліў Лукашэнка, даўшы паралельна параду старшыні «Беллегпрама» Таццяне Лугіной наконт таго, як правільна трэба замяшчаць імпартнае: «Убачыла нешта імпартнае — прынесла на прадпрыемства — рабіце. Вось так пакрысе павінны рабіць сваё».
Што тычыцца забаў, то ў «Сталіцы» працуюць «Тыкток-парк» і «Неон-парк». Побач са знаёмымі ўсім кафэ «Маэстра» і KFC з Hotfix адкрылася сямейнае кафэ ад камбіната школьнага харчавання і свае кропкі «Мінскхлебпрама». Выглядаюць яны наступным чынам:
Каб прыцягваць моладзь, «Сталіцу» плануюць аддаваць пад выступы і творчасць студэнтаў Універсітэта культуры і Акадэміі мастацтваў.
Праўда, на думку кіраўнікоў, у ГЦ усё добра і так: падчас візіту Лукашэнкі яму даклалі пра «98,5% загрузкі» і 12 тысяч наведнікаў у дзень. Натхніўшыся справаздачай са «Сталіцы», Лукашэнка даручыў зрабіць такі ж беларускаарыентаваны аб'ект-двайнік і на месцы даўгабуда «Магніт Мінска», што знаходзіцца на скрыжаванні праспекта Незалежнасці і вуліцы Каліноўскага. Насупраць доўгабуда — ГЦ «Дана Мол».
Чытайце таксама:
З 2023 года ІП пазбаўляюць ільгот па выплатах у ФСАН. Каго закрануць змены і што яшчэ зменіцца для прадпрымальнікаў?
Пачварны будынак на месцы музея ВАВ на Кастрычніцкай плошчы ўжо распрадаюць. Прычым Dana Holdings вызвалілі ад ПДВ
«А што ў вас за праблемы? Далёка да Мінска ці няма каму падвезці?» Публічная пікіроўка Лукашэнкі і Пашыняна13
Каментары
ды ну?) гэта была ўсяго толькі чарговая калька з Масквы. на прадмет "что рабіць з гэтай плошчай?" праводзіўся конкурс. былі розныя праекты. я на кароткі час апынулася тады ў майстэрні, якой дасталася права распрацоўкі праекта. там праводзіўся міні-конкурс свой. зноў былі розныя ідэі. але "перамагала" гэта "магіла". урэзаліся ў памяць словы архітэктаркі (сталай жанчыны), якая спрачалася, баронячы свой варыят: "да никто в вашу яму не пойдет!"
вось прайшлі гады... і яна аказалася права
звучит как-то зловеще... в реалиях нового времени