Адказ шортам прэм'еркі Фінляндыі — сабралі нефармальныя лукі беларускіх чыноўнікаў
Прэм'ер-міністр Фінляндыі Сана Марын скарыла інтэрнэт-карыстальнікаў сваімі шортамі і касухай, у якіх наведала рок-фестываль Ruisrock. Беларускіх чыноўнікаў пры Лукашэнку сустрэць на рок-канцэртах нерэальна, але мы вырашылі паглядзець, якім рэчам яны аддаюць перавагу, калі гаворка ідзе пра нефармальныя выхады ў свет і можна вылезці з касцюмаў-коканаў.
Прэм’ер-міністра Рамана Галоўчанку складана пабачыць на шырокай публіцы без строгіх касцюмаў з гальштукамі. Такое можа здарыцца толькі на рэспубліканскім суботніку, напрыклад, ці калі гэты самы касцюм схаваны пад верхнім адзеннем.
Старшыня Савета Рэспублікі Наталля Качанава таксама заўсёды ў пратакольным — нават калі гаворка ідзе пра наведванне канцэртаў на малой радзіме ў Полацку. Свабодны стыль на публіцы мільгае на тых жа суботніках ці лыжных спаборніцтвах.
Не так даўно міністр замежных спраў Уладзімір Макей пахваліўся, што пачаў разводзіць курэй. Для вядзення сельскай гаспадаркі, як можна зрабіць высновы з яго сацсетак, ён звычайна выбірае патрыятычнае спартыўнае адзенне.
Але на прыродзе, на шпацырах з сям'ёй ці нават на раздачы бургераў ад Цімаці міністра можна заўважыць і ў больш непрыкметнай колеравай гаме.
Па-за афіцыёзам і ў перыяд адпачынку ад хакейнай формы Аляксандр Лукашэнка праяўляе вялікае захапленне галаўнымі ўборамі. У яго гардэробе, відаць, існуе асобная паліца для кепак, шапак і асобна — для адмысловых убораў пад сельскагаспадарчыя працы.
Правая рука Лукашэнкі, прэс-сакратарка Наталля Эйсмант для прыборкі кавуноў, бульбы, паездак на ровары і аўтапрабегаў «За бацьку» часта выбірае брэнд Nike.
Спартыўнае брэндавае адзенне яна, меркавана, выбірала і для цёмных спраў пад прыкрыццём ночы: так, лічыцца, што менавіта Эйсмант была адной з той брыгады, якая ездзіла па мінскіх дварах і зразала бел-чырвона-белыя стужкі. Пасля адной з такіх «вылазак» у ходзе канфлікту быў забіты Раман Бандарэнка.
Рэдкае фота міністра аховы здароўя Дзмітрыя Піневіча ў СМІ без касцюма — на рэспубліканскім суботніку. Куртка Аdidas, кепка «Беларусь», джынсы і чорныя туфлі.
Міністр інфармацыі Уладзімір Пярцоў змяніў касцюм на джынсы і кеды для працы на Барысаўшчыне ў дзень рэспубліканскага суботніка.
З суботнікамі зразумела, а ў чым беларускія чыноўнікі з’яўляюцца на канцэртах? Тут, на жаль, нічога новага: касцюмы. Час ад часу толькі кашулі могуць быць замененыя на цішоткі.
Нягледзячы на тое, што Вольга Чамаданава ужо не прэс-сакратарка МУС, яна дагэтуль шчыльна асацыюецца з формай, хоць і змяніла яе на касцюмы ідэолага Мінгарвыканкама.
У нефармальнай абстаноўцы Вольга аддае перавагу камуфляжным касцюмам, што можа сведчыць пра тое, што ў яе крыві дагэтуль грае прафесійнае мінулае.
Праманіторыўшы здымкі некаторых старшынь райвыканкамаў, мы заўважылі, што яны ў нефармальнай абстаноўцы аддаюць перавагу стылю casual. Праўда, цішоткі — нярэдка з красамоўным прынтом. Напрыклад, старшыні Слуцкага раёна Уладзіміру Гогу важна, відаць, нагадваць, што ён народжаны ў СССР.
Хаця самы распаўсюджаны прынт у максімальна блізкага атачэння Лукашэнкі — з яго цытатамі: трэба ж разгружаць склады з мерчам ад «Пула першага».
А вось сённяшні старшыня Шклоўскага райвыканкама Андрэй Камко — за цішоткі. Для любімых жа хобі — палявання і рыбалкі — ён мае асобны касцюм.
Чытайце таксама:
Як за два гады змяніліся прадстаўнікі апазіцыі і рэжыму? ФОТЫ
Гісторыя беларусаў, якія ў дзевяностыя засталіся без бізнэсу і эмігравалі ў ЗША. «Жылі ў адной кватэры з Пазняком»
Тур па Расіі і ўзнагароды ад міліцыі. Што адбываецца ў жыцці праўладных беларускіх зорак?
У Беларусі перад выбарамі могуць блакаваць інтэрнэт — як да гэтага падрыхтавацца, каб быць на сувязі1
Каментары