Кухар на $2000 «здаў» васьмі людзям кватэру ў Салігорску, прайграў грошы і здаўся міліцыі
32-гадовы кухар з Салігорска падманваў патэнцыйных арандатараў: знаходзіў у інтэрнэце кліентаў і браў у іх перадаплату, але з абавязковай умовай — засяліцца ў кватэру можна будзе толькі праз месяц, паведамляе міліцыя.
![](http://d3kcf2pe5t7rrb.cloudfront.net/img/w732d4webp1/photos/authors/groshi_daliar_1_ia_nn-yiv1q.jpg.webp)
Пацярпелыя верылі ў гісторыю арэндадаўца пра хуткі ад'езд за мяжу і ў магчымасць зняць жыллё на працяглы тэрмін. Для большай пераканаўчасці падчас здзелкі падазраваны перадаваў кліентам загадзя вырабленыя дублікаты ключоў ад кватэры.
Аднак беларус не збіраўся ехаць за мяжу і здаваць нерухомасць. Пазней высветлілася, што ён родам са Слуцка і сам жыў у арэндным жыллі.
У выніку кліенты не засяліліся ў абяцаны тэрмін і запатрабавалі вярнуць грошы. Аддаваць доўг было няма чым, таму мужчына з'явіўся з павіннай у праваахоўныя органы.
Сышчыкі знайшлі 8 пацярпелых. Ім нанесены ўрон на агульную суму звыш 2 тысяч даляраў. Усе грошы падазраваны змарнаваў у гульнявых клубах.
Каментары