У Мінску налічваецца амаль 6 тысяч кватэр, якія не аснашчаныя індывідуальнымі прыборамі ўліку (ІПУ) вады і ў якіх адсутнічаюць зарэгістраваныя грамадзяне. На сённяшні дзень плата за ваду ў такіх «пустых» кватэрах не бярэцца, паведамілі ва УП «Мінскводаканал».
На прадпрыемстве нагадалі, што з 1 кастрычніка бягучага года ўступаюць у сілу змяненні ў Палажэнне аб парадку разлікаў і ўнясення платы за жыллёва-камунальныя паслугі і платы за карыстанне жылымі памяшканнямі дзяржаўнага жыллёвага фонду, зацверджанае пастановай Савета Міністраў нумар 571 у 2014 годзе. Прадугледжваецца прымяненне наступнага разліку: колькасць зрасходаванай вады будзе вызначацца зыходзячы з норм спажывання, устаноўленых мясцовымі выканаўчымі і распарадчымі органамі, і ўмоўнай колькасці грамадзян (агульная плошча жылога памяшкання дзеліцца на 20 кв.м з улікам акруглення ў меншы бок да цэлага чысла). Такім чынам, для кватэры плошчай 72 кв.м без лічыльнікаў і без зарэгістраваных у ёй жыльцоў плата за ваду будзе брацца па тарыфах, якія забяспечваюць поўнае пакрыццё эканамічна абгрунтаваных затрат (Br1,1405 за куб.м), што складзе Br26,69 у месяц.
Выключэнне складаюць жылыя памяшканні, што прадастаўляюцца кіраўнікам і супрацоўнікам прадстаўніцтваў і органаў міжнародных арганізацый, міждзяржаўных утварэнняў, жылыя памяшканні, прынятыя ў складзе спадчыны, але не больш як сем месяцаў з дня адкрыцця спадчыны, жылыя памяшканні, якія выкарыстоўваюцца для ажыццяўлення прадпрымальніцкай дзейнасці, звязанай з прадастаўленнем месц для кароткатэрміновага пражывання.
Каб пазбегнуць платы вялікіх сум за паслугі водазабеспячэння і водаадвядзення, існуюць тры варыянты. Першы: у жылым памяшканні ўстанаўліваецца ІПУ, рэгістрацыя грамадзян не праводзіцца (налічэнне ажыццяўляецца на аснове паказанняў лічыльнікаў і па тарыфах, што забяспечваюць поўнае пакрыццё эканамічна абгрунтаваных затрат). Другі: у жылым памяшканні рэгіструецца грамадзянін, ІПУ не ўстанаўліваецца (колькасць зрасходаванай вады на кожнага чалавека будзе вызначацца зыходзячы з норм спажывання, устаноўленых мясцовымі выканаўчымі і распарадчымі органамі, налічэнне па тарыфах, што забяспечваюць поўнае пакрыццё эканамічна абгрунтаваных затрат). Трэці: у жылым памяшканні рэгіструецца грамадзянін і ўстанаўліваецца ІПУ (налічэнне ажыццяўляецца па дзеючых на гэты момант правілах).
Такім чынам, улічваючы змяненні, што ўступаюць у сілу, для аплаты толькі за фактычна спажыты аб'ём вады ўласнікам жылых памяшканняў рэкамендуецца ўстанавіць ІПУ і заключыць дагавор на водазабеспячэнне і водаадвядзенне кватэры з УП «Мінскводаканал».
Ва УП «Мінскводаканал» удакладнілі, што прадпрыемства не праводзіць першасны мантаж ІПУ. Прыборы ўліку вады ўстанаўліваюць цэнтралізавана пры новым будаўніцтве і капітальным рамонце або індывідуальна за ўласныя сродкі спажыўцоў. Паслугі насельніцтву па ўстаноўцы лічыльнікаў аказваюць ЖЭСы горада, прыватныя арганізацыі або індывідуальныя прадпрымальнікі, якія выконваюць гэты від работ. Пасля ўстаноўкі лічыльнікаў неабходна звярнуцца ў ЦРС «Вадазбыт» і ўзгадніць час прыходу кантралёра для апламбоўкі вадамернага вузла і заключэння дагавора на аказанне паслуг водазабеспячэння і водаадвядзення.
У Мінску налічваецца каля 770 тыс. жылых памяшканняў, з іх у 6 тыс. адсутнічаюць пражываючыя (зарэгістраваныя па месцы жыхарства) грамадзяне і не ўстаноўлены ІПУ. Паміж жыхарамі горада і УП «Мінскводаканал» заключана амаль 733 тыс. дагавораў. Устаноўлена больш як 1,6 млн лічыльнікаў (у сярэднім па 2,25 лічыльніка на кватэру, паколькі можа быць як па некалькі лічыльнікаў на кватэру (пры розных стаяках у ванне і на кухні), так і па адным лічыльніку ў кватэры (калі ў доме ўстаноўлена газавая калонка або дом размешчаны ў прыватным сектары).
Каментары