Не хавайце на фота твар — гэта бяссэнсоўна.
Эксперыментальны алгарытм лабараторыі штучнага інтэлекту Facebook навучыўся пазнаваць людзей на фота па ўскосных прыкметах, распавядае New Scientist.
Facebook сёння можа паспяхова пазнаць вас па твары. Новы алгарытм пазнае вас і са спіны — аналізуюцца прычоска, адзенне, форма цела, пастава…
«Ёсць многа прыкмет, што мы выкарыстоўваем. Людзі маюць характэрныя рысы, нават калі вы глядзіце на іх ззаду, — кажа Ян ЛеКун, начальнік лабараторыі штучнага інтэлекту Facebook. — Напрыклад, вы лёгка пазнаеце Марка Цукерберга, бо ён заўсёды носіць шэрую цішотку».
Такі алгарытм можа парушыць вашую прыватнасць — людзі могуць пабачыць вас на сваіх фота ў тых месцах і пры тых абставінах, калі вы не хочаце, каб вас пабачылі. А можа і дапамагчы пазбегнуць парушэння прыватнасці. ЛеКун сцвярджае, што алгарытм можна выкарыстаць, каб чалавек даведаўся, калі фота з ім з’яўляецца ў інтэрнэце.
Праблема прыватнасці людзей на фота нядаўна прывяла да часовай забароны ў Еўропе новай праграмы Facebook — Moments, што служыць для абмену фатаздымкамі. Яна ўмее пазнаваць людзей на фота, але на сёння не мае такой опцыі, каб людзі маглі адмовіцца ад распазнавання сябе.
Каментары