У чацьвер, 2 жніўня, у клюбе «Графіці» пройдзе канцэрт Весны Касэрэс — выканаўцы бразыльска-кубінска-славянскай музыкі.
***
Весна Касэрэс — сьпявачка, акардэаністка і кампазытар харвацка‑чэска‑славенска‑гішпанскага паходжаньня. Шматэтнічная і яе музыка, дзе спалучаюцца традыцыі балканскага мэласу, лацінскіх рытмаў, усходніх вакальных тэхнік і эўрапейскай клясычнай музыкі. Нарадзілася ў Харватыі, ад 1990 году жыве ў Празе.
 |
Весна выступае на канцэртах і фэстывалях у Чэхіі ды іншых краінах з сваёй групай, якая грае пераважна бразыльскую і кубінскую музыку. Аднак гэтым яе музычны дыяпазон не абмяжоўваецца — яна сьпявае свінг, піша музыку для тэатру, а апошнім часам пачала выступаць з сольнымі канцэртамі ў суправаджэньні акардэону.
«У тым, што я выконваю падчас жывых выступаў, ёсьць і джаз, і этна, і рок, трошкі попу, застаецца месца і для імправізацыі — нехта назаве гэта джазам, нехта скажа, што гэта занадта папсова для джазу. Звычайна я імкнуся пазьбягаць крайнасьцяў і шукаць свой шлях, сваю іскру», — кажа Весна.
Весна Касэрэс была першай у Празе сьпявачкай, якая пачала сьпяваць аўтэнтычную бразыльскую музыку — у 1995 годзе разам з мэксыканскім гітарыстам Паблам Артызам яна заклала гурт «Anima», у аснову рэпэртуару якога леглі песьні вялікіх бразыльскіх паэтаў‑кампазытараў Каэтану Вэлозу, Шыку Буаркі, Жоржы бэна, Мілтана Насімэнту (ягоная песьня Anima дала назву гурту).
У сваім пазьнейшым, больш «джазавым» пэрыядзе творчасьці Весна зачаравала слухачоў сваёй інтэрпрэтацыяй боса‑новы і самбы. Багатыя гармоніі, характэрны рытмічны ўзор акустычнай гітары, прыемнасьць і пяшчотнасьць Весьнінага голасу і шарм партугальскай мовы ў яе бразыльскім варыянце пераносяць слухачоў на бестурботныя пляжы Рыё‑дэ‑Жанэйра. Дарэчы, сёлета ў студзені Весна ўдзельнічала ў Рыё‑дэ‑Жанэйра ў канцэртах, прысьвечаных 80‑годзьдзю «бацькі боса‑новы» Антонію Карлуша Жабіма.
Ад 2003 году Весна выступае і сама — як сьпявачка і акардэаністка. Яе рэпэртуар улучае ў сябе як свае ўласныя кампазыцыі, гэтак і песьні розных народаў — харвацкія, гішпанскія, мэксыканскія, бразыльскія ды іншыя. У іх спалучаюцца выразныя мэлёдыі, узбагачаныя жывымі рытмамі, вакальныя экспэрымэнты і арыгінальныя акардэонныя аранжыроўкі.
Між іншага варта заўважыць, што Весна — жонка геніяльнага беларускага перакладчыка Сяргея Шупы.
Адзіны канцэрт Весны Касэрэс у Менску адбудзецца 2 жніўня ў клюбе «Графіці» (завулак Калініна, 16), які гэткім чынам на адзін дзень прыпыніць свае летнія вакацыі.
Пачатак а 20‑й.
Каментары