Bosa-nova ŭ Miensku

U čaćvier, 2 žniŭnia, u klubie «Hrafici» projdzie kancert Viesny Kaseres — vykanaŭcy brazylska-kubinska-słavianskaj muzyki.

***

Viesna Kaseres — śpiavačka, akardeanistka i kampazytar charvacka‑česka‑słavienska‑hišpanskaha pachodžańnia. Šmatetničnaja i jaje muzyka, dzie spałučajucca tradycyi bałkanskaha mełasu, łacinskich rytmaŭ, uschodnich vakalnych technik i eŭrapiejskaj klasyčnaj muzyki. Naradziłasia ŭ Charvatyi, ad 1990 hodu žyvie ŭ Prazie.

Viesna vystupaje na kancertach i festyvalach u Čechii dy inšych krainach z svajoj hrupaj, jakaja hraje pieravažna brazylskuju i kubinskuju muzyku. Adnak hetym jaje muzyčny dyjapazon nie abmiažoŭvajecca — jana śpiavaje śvinh, piša muzyku dla teatru, a apošnim časam pačała vystupać z solnymi kancertami ŭ supravadžeńni akardeonu.

«U tym, što ja vykonvaju padčas žyvych vystupaŭ, jość i džaz, i etna, i rok, troški popu, zastajecca miesca i dla impravizacyi — niechta nazavie heta džazam, niechta skaža, što heta zanadta papsova dla džazu. Zvyčajna ja imknusia paźbiahać krajnaściaŭ i šukać svoj šlach, svaju iskru», — kaža Viesna.

Viesna Kaseres była pieršaj u Prazie śpiavačkaj, jakaja pačała śpiavać aŭtentyčnuju brazylskuju muzyku — u 1995 hodzie razam z meksykanskim hitarystam Pabłam Artyzam jana zakłała hurt «Anima», u asnovu repertuaru jakoha lehli pieśni vialikich brazylskich paetaŭ‑kampazytaraŭ ­ Kaetanu Vełozu, Šyku Buarki, Žoržy bena, Miłtana Nasimentu (jahonaja pieśnia Anima dała nazvu hurtu).

U svaim paźniejšym, bolš «džazavym» peryjadzie tvorčaści Viesna začaravała słuchačoŭ svajoj interpretacyjaj bosa‑novy i samby. Bahatyja harmonii, charakterny rytmičny ŭzor akustyčnaj hitary, pryjemnaść i piaščotnaść Vieśninaha hołasu i šarm partuhalskaj movy ŭ jaje brazylskim varyjancie pieranosiać słuchačoŭ na biesturbotnyja plažy Ryjo‑de‑Žanejra. Darečy, sioleta ŭ studzieni Viesna ŭdzielničała ŭ Ryjo‑de‑Žanejra ŭ kancertach, pryśviečanych 80‑hodździu «baćki bosa‑novy» Antoniju Karłuša Žabima.

Ad 2003 hodu Viesna vystupaje i sama — jak śpiavačka i akardeanistka. Jaje repertuar ułučaje ŭ siabie jak svaje ŭłasnyja kampazycyi, hetak i pieśni roznych narodaŭ — charvackija, hišpanskija, meksykanskija, brazylskija dy inšyja. U ich spałučajucca vyraznyja melodyi, uzbahačanyja žyvymi rytmami, vakalnyja eksperymenty i aryhinalnyja akardeonnyja aranžyroŭki.

Miž inšaha varta zaŭvažyć, što Viesna — žonka hienijalnaha biełaruskaha pierakładčyka Siarhieja Šupy.

Adziny kancert Viesny Kaseres u Miensku adbudziecca 2 žniŭnia ŭ klubie «Hrafici» (zavułak Kalinina, 16), jaki hetkim čynam na adzin dzień prypynić svaje letnija vakacyi.

Pačatak a 20‑j.

• 0
• 0
• 0
• 0
• 0
• 0
• 0
• 0