Ad haładoŭki da haładoŭki

Za Łukašenkam jany stali nacyjanalnym sposabam adstojvać pravy

Data pieršaj haładoŭki epochi Łukašenki viadoma dakładna — 4 studzienia 1995 h. Dvuma dniami raniej Administracyja prezydenta zabaraniła «Biełaruskamu Domu druku» padaŭžać damovy na druk «Svabody», «Biełorusskoj diełovoj haziety», «Fiemidy», «Haziety Andrieja Klimova». 4 studzienia na Płošču Niezaležnaści ludzi vyjšli vykazać pratest. Akcyja była žorstka razahnana AMAPam (darečy, heta była pieršaja akcyja, razahnanaja pry Łukašenku), a sp.Savicki mocna źbity i ŭ toj ža dzień asudžany sudom Savieckaha rajonu stalicy na piać sutak administracyjnaha aryštu za chulihanstva. U pryjomniku-raźmierkavalniku prafesar abviaściŭ haładoŭku. Heta napałochała ŭłady — i Mienski haradzki sud pierahledzieŭ spravu navukoŭca. Vykładčyka vyzvalili.

Samaja viadomaja stałasia haładoŭka deputataŭ Viarchoŭnaha Savietu XII sklikańnia, abvieščanaja 11 krasavika 1995 h. Deputaty frakcyi BNF pratestavali suprać uchvalenaj astatnimi parlamentarami inicyjatyvy prezydenta pravieści referendum, dzie siarod inšaha prapanoŭvałasia źmianić symboliku krainy i nadać rasiejskaj movie status druhoj dziaržaŭnaj. Da deputataŭ źviarnuŭsia Zianon Paźniak. Jon skazaŭ: «Vyčarpaŭšy ŭsie mahčymaści, u znak pratestu suprać antyzakonnaści i zhubnaści vašych dziejańniaŭ my abjaŭlajem haładoŭku tut, u centry zali. Pačynajem jaje ciapier, z hetaje chviliny. My patrabujem vykanańnia Kanstytucyi, zakonaŭ Respubliki Biełarusi, svabody słova i likvidacyi cenzury, spynić rabavańnie narodu i baćkaŭščyny». Haładoŭku abviaścili Z.Paźniak, S.Antončyk, Ł.Barščeŭski, Ju.Bieleńki, I.Hiermiančuk, V.Hołubieŭ, B.Hiunter, Ł.Dziejka, U.Zabłocki, Ł.Zdanievič, M.Kryžanoŭski, M.Markievič, V.Małaška, S.Navumčyk, S.Papkoŭ, P.Sadoŭski, A.Trusaŭ, A.Šut.

Deputaty ŭładkavalisia prosta la trybuny ŭ Avalnaj zali. A druhoj nočy ŭ zalu ŭvarvalisia specnazaŭcy ŭ kamuflažy dy čornych maskach i žorstka źbili deputataŭ, vykinuŭšy ich z Domu ŭradu. Na nastupny dzień Vasil Bykaŭ zaznačyŭ: «Krainaj kiruje chunta». Deputackija zachady pakarać vinavatych u hetaj raspravie, zvaroty ŭ sud tak i zastalisia marnymi. Da taho ž Łukašenka koliś paabiacaŭ pakazać pa televizii kasetu, dzie zafiksavana źbićcio parlamentaroŭ. Abacianaha čakajem užo dziaviaty hod.

Poŭny varyjant artukułu čytajcie ŭ hazecie "Naša Niva"

Aleh Hardzijenka

• 0
• 0
• 0
• 0
• 0
• 0