Vybuch na «Pinskdrevie»: hałoŭny abvinavačany schavaŭsia ad śledstva

10 studzienia ŭ Pinsku paśla dvuchtydniovaha pierapynku praciahnuŭsia razhlad kryminalnaj spravy pa vybuchu na STAA «Pinskdreŭ-DSP».

Nahadajem, trahiedyja zdaryłasia 25 kastryčnika 2010 kala 13.00. Vybuch adbyŭsia na ŭčastku pa vytvorčaści draŭnianych paliŭnych hranuł. Paciarpieŭ 21 pracaŭnik pradpryjemstva: 2 čałavieki zahinuli na miescy, jašče 12 pamierli ŭ balnicach Pinska, Bresta i Minska. Piaciora paciarpiełych zastalisia invalidami. Škoda skłała amal 4 miljardy rubloŭ.

U dzień trahiedyi prakuratura Pinska raspačała kryminalnuju spravu pa častcy 2 artykuła 302 KK RB («Parušeńnie praviłaŭ biaśpieki na vybuchovaniebiaśpiečnym pradpryjemstvie što paciahnuła pa nieaściarožnaści śmierć čałavieka z pryčynieńniem škody ŭ asabliva bujnym pamiery»). Krychu paźniej hetaja kryminalnaja sprava była pryniataja da vytvorčaści i kančatkova rasśledavanaja Hienieralnaj prakuraturaj. Jana naličvaje 56 tamoŭ.

Sudovy praces pačaŭsia 13 śniežnia 2011. Sprava słuchajecca Bresckim abłasnym sudom, pierad jakim u jakaści abvinavačanych paŭstali były hałoŭny inžynier ZAT «Chołdynhavaja kampanija «Pinskdreŭ» Uładzimir Šastakoŭ, były dyrektar STAA «Pinskdreŭ-DSP» Leanid Łohvin i były hałoŭny inžynier hetaha ž pradpryjemstva Ihar Łohvin. Leanid Łohvin abvinavačvajecca pa častcy 2 artykuła 428 («Słužbovaja chałatnaść», sankcyja — da 5 hadoŭ pazbaŭleńnia voli), dvum inšym inkryminavałasia častka 3 artykuła 304 («Parušeńnie praviłaŭ pažarnaj biaśpieki», da siami hadoŭ pazbaŭleńnia voli).

Charakterna, što padčas pieršapačatkovych śledčych dziejańniaŭ była ŭstalavanaja datyčnaść da trahiedyi jašče adnaho kiraŭnika STAA «Pinskdreŭ-DSP», pa zahadzie jakoha ŭ hetym vytvorčym padraździaleńni «prykładna za tydzień da padziej byŭ adklučany naścienny vientylatar». Adnak hety čałaviek i sam staŭ achviaraj pažaru, pamior u špitali 1 listapada.

Pavodle źviestak Naviny.by, Uładzimir Šastakoŭ viny nie pryznaŭ, a Leanid Łohvin i Ihar Łohvin pryznali vinu častkova.

Hałoŭnym ža fihurantam hetaj hučnaj spravy pavinien byŭ stać były hiendyrektar ZAT «CHK «Pinskdreŭ» Łaran Arynič.

Da ciapierašniaha času ŭ sudzie zasłuchanyja pakazańni abvinavačanych i paciarpiełych. Ciapier iduć dopyty śviedak, jakich u spravie bolš za 80 čałaviek.

Sudu ŭ hetaj dramatyčnaj historyi, supastaŭnaj pa kolkaści achviar z teraktam u minskim mietro, treba budzie nie tolki vyznačyć stupień viny abvinavačanych, ale i nazvać pryčyny vytvorčaj trahiedyi. Dakładniej, paćvierdzić abo abvierhnuć raniej zroblenyja vysnovy šmatlikich praviaralnikaŭ, jakija, jak u nas vodzicca, dziejničajuć žorstka tolki postfaktum.

Užo praz tydzień paśla vybuchu Hienprakuratura prainfarmavała kiraŭnika ŭrada, što abjomny vybuch na pradpryjemstvie adbyŭsia «z pryčyny dapuščanych parušeńniaŭ vytvorča-techničnaj dyscypliny, pravił biaśpieki na vybuchovaniebiaśpiečnym pradpryjemstvie». Prakurorskaja pravierka vyjaviła aburalnyja fakty, jakija papiaredničali trahiedyi: «Na dadzienym pradpryjemstvie nieadnarazova (u studzieni, lutym, sakaviku, traŭni, červieni i lipieni 2010) adznačalisia ŭzharańni i iskreńni na adnym z młynoŭ učastka pa vytvorčaści draŭniana-paliŭnych hranuł, uvieś čas naziraŭsia pavyšany ŭzrovień pyłu». Pavodle źviestak Hienprakuratury, «patrabavańni pa abstalavańni pamiaškańniaŭ ustanoŭkami aŭtamatyčnaha pažaratušeńnia i aŭtamatyčnaj pažarnaj sihnalizacyi» nie vykonvalisia z… 2000 hoda. Akramia taho, «u STAA „Pinskdreŭ-DSP“ samavolna, biez adpaviednych uzhadnieńniaŭ z sanitarnaj słužbaj, pažarnym nahladam, była ŭstalavanaja druhaja linija pa vytvorčaści draŭniana-paliŭnych hranuł».

Bolš žorstkija vysnovy ŭtrymlivajucca ŭ dakładnoj zapiscy Savieta biaśpieki № 21–05/116 ad 9 listapada 2010, vytrymki ź jakoj apublikavała hazieta «Viačerni Brest».

Pa sutnaści, praca mižviedamasnaj hrupy ŭ składzie kiraŭnikoŭ i śpiecyjalistaŭ Savieta biaśpieki, Hienieralnaj prakuratury, KDB, MNS, MUS, Ministerstva pracy i sacyjalnaj abarony pa vyśviatleńni pryčyn i ŭmovaŭ uźniknieńnia vybuchu ŭ STAA «Pinskdreŭ-DSP» źviałasia da kanstatacyi viadomych na «Pinskdrevie» faktaŭ, jakija kiraŭnictva chołdynhu za prachadnuju «nie vypuskała». I, jak vyjaviłasia, da trahiedyi šmatlikim praviaralnikam paprostu nie dazvalali pravodzić pravierki na terytoryi zavoda. U dakładnoj zapiscy Savieta biaśpieki havorycca:

«Ł. S. Arynič u asiarodździ svaich kalehaŭ i padnačalenych charaktaryzujecca jak aŭtarytarny kiraŭnik. Nizki ŭzrovień zarabotnaj płaty, pryciahnieńnie rabotnikaŭ bieź ich zhody da pracy ŭ niepracoŭny čas, u vychadnyja i śviatočnyja dni sfarmavała niehatyŭnaje staŭleńnie rabočych da kiraŭnictva ZAT „CHK“ Pinskdreŭ». Tak, siaredniaja zarabotnaja płata na ZAT «CHK «Pinskdreŭ» za 9 miesiacaŭ 2010 h. skłała 1038 tys. rubloŭ, hienieralnaha dyrektara Aryniča Ł. S. — 18 854 tys. rubloŭ, jaho namieśnikaŭ — 6 954 tys. rubloŭ.

Ihnaravańnie kiraŭnictvam ZAT «Chołdynhavaja kampanija „Pinskdreŭ“ pradpisańniaŭ dziaržaŭnych kantralavalnych orhanaŭ, u pieršuju čarhu dziaržaŭnaha pažarnaha nahladu, u značnaj miery abumoŭlenaje asabistaj pierakananaściu ŭ biespakaranaści ŭ suviazi z najaŭnaściu upłyvovych suviaziaŭ u roznych dziaržaŭnych orhanach jak miascovaha, tak i respublikanskaha značeńnia. Ł. S. Arynič ni razu nie prysutničaŭ na pasiedžańniach Pinskaha harvykankama, dzie razhladalisia pytańni stanu achovy pracy i pažarnaj biaśpieki na pradpryjemstvach kiravanaha im akcyjaniernaha tavarystva».

Paciarpiełyja i svajaki zahinułych ličać, što Aryniču nievypadkova ŭdałosia schavacca ad śledstva i suda.

• 0
• 0
• 0
• 0
• 0
• 0