Pryčynaj śmierci 22-hadovaha palitviaźnia Dźmitryja Šlethaŭera moh być suicyd
Pra śmierć palitviaźnia Dźmitryja Šlethaŭera stała viadoma na minułym tydni. 22-hadovy chłopiec adbyvaŭ pakarańnie ŭ PK-15 u Mahilovie. Pryčynu jaho śmierci pravaabaroncy nie ŭdakładniali. Znajomy siamji Šlethaŭera raskazaŭ «Lusterku», jakuju pryčynu miedyki ŭkazali ŭ paśviedčańni ab śmierci.
Pa słovach znajomaha siamji, jaki ciapier žyvie za miažoj, u paśviedčańni ab śmierci palitviaźnia ŭkazana pryčyna — «miechaničnaja aśfiksija». Taki zapis časta robiać pry samahubstvach.
— Kiraŭnictva kałonii nie paviedamiła rodnym Dźmitryja, što mienavita ź im adbyłosia, — kaža jon.
Pavodle jaho słoŭ, rodnyja palitviaźnia padtrymlivali ź im znosiny praź listy. Žonka Dźmitryja naviedvała jaho ŭ SIZA da i paśla sudu.
— Siamja ličyć, što Dźmitryj nie płanavaŭ zabić siabie. Pa słovach rodnych, jon byŭ vielmi zasmučany z-za taho, što ź im adbyłosia, ale nie nastolki, kab być hatovym da samahubstva.
Jašče ŭ SIZA jon pačaŭ staranna rychtavacca da pieravodu ŭ kałoniju — źbiraŭ cyharety, cukar, čaj i kavu, raźličvajučy, što heta budzie karysna ŭ łahiery (tak u turmach nazyvajuć kałonii), — raskazvaje znajomy Šlethaŭeraŭ.
Surazmoŭca taksama dadaŭ, što jašče ŭ śledčym izalatary ŭ Dźmitryja źjavilisia niekrytyčnyja prablemy sa zdaroŭjem:
— Pakul Dzima byŭ u SIZA, u jaho naradziŭsia syn, i jon vielmi pieražyvaŭ, što heta adbyłosia ŭ jaho adsutnaść. Vidavočna, jon mocna niervavaŭsia, z-za čaho ŭ jaho pačali vypadać vałasy, źjaviŭsia varykoz. Ale jon nie płanavaŭ suicyd. Naadvarot, jon źbiraŭsia pisać prašeńnie ab pamiłavańni i spadziavaŭsia jak maha chutčej vyjści na volu, pabačyć syna i žonku.
Pa słovach krynicy, Dźmitryj kazaŭ rodnym, što ŭ śledčym izalatary da jaho stavilisia dobra. Sukamierniki i administracyja nie stvarali prablem.
Ź SIZA ŭ mahiloŭskuju PK-15 chłopca pieraviali ŭ pačatku kastryčnika 2024 hoda. Znajomy siamji śćviardžaje, što Dźmitryja adrazu adpravili ŭ štrafny izalatar. Ab pryčynie takoha pakarańnia jon nie viedaje.
12 kastryčnika siamja Šlethaŭera atrymała ad administracyi kałonii paviedamleńnie ab trahiedyi. U paśviedčańni ab śmierci ŭkazana data — 11 kastryčnika 2024 hoda.
Dźmitryj Šlethaŭer — hramadzianin Rasii. Infarmacyja pra «tajemny» sud nad im źjaviłasia ŭ kancy žniŭnia. Paviedamlałasia, što mužčynu pryznali vinavatym u «spryjańni ekstremisckaj dziejnaści» (č. 1 art. 361−4 UK) i «špijanažy» (art. 358 UK). Jaho asudzili na 12 hadoŭ kałonii.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?58
Kamientary