Va Ukrainie ŭ padpolnaj drukarni znajšli piačatku Ministerstva abarony Biełarusi
Tam drukavalisia padroblenyja daviedki i inšyja dakumienty dla ŭchileńnia ad mabilizacyi.
Supracoŭniki Słužby biaśpieki Ukrainy likvidavali ŭ Kijevie padpolnuju drukarniu, jakaja drukavała padroblenyja daviedki dla ŭchileńnia mužčyn ad mabilizacyi.
Umielcy rabili lipavyja daviedki koštam ad 8 da 12 tysiač dalaraŭ. Pa spravie było zatrymana 14 čałaviek, siarod ich jość vajskoŭcy, zaŭvažyli «Mocnyja naviny».
Siłaviki vyjšli na niepasrednaha vytvorcu padroblenych dakumientaŭ, jaho zatrymali ŭ Pałtavie ŭ vyniku śpiecapieracyi niekalki dzion tamu. Fihuranta ŭziali z dokazami złačynstva padčas apieratyŭnaha ekśpierymientu.
SBU adpraviła da jaho padstaŭnoha klijenta, jakomu nibyta patrebna była daviedka, kab nie patrapić pad mabilizacyju. Pałtaviec abiacaŭ vyrašyć jaho prablemu za 2 tysiačy dalaraŭ: dla klijenta padrychtavali padroblenyja dakumienty ab tym, što jon źjaŭlajecca aśpirantam univiersiteta, a tamu maje čatyrochhadovuju adterminoŭku ad pryzyvu. Aryštavali fihuranta padčas pieradačy zamovy.
U chodzie pieratrusu ŭ žychara Pałtavy znajšli dziasiatki błankaŭ i kopij dypłomaŭ, roznych daviedak, a taksama štampy, kruhłyja i hierbavyja piačatki roznych dziaržstruktur, u tym liku miedustanoŭ i vajskovych častak, a taksama noŭtbuki, kampjutary i pryntary.
Samaj niečakanaj znachodkaj u hetaj kalekcyi akazałasia piačatka z hraviroŭkaj «Ministerstva abarony — Biełaruś — Centralny archiŭ Respubliki Biełaruś». Ekśpierty buduć aceńvać sapraŭdnaść piačatak.
Abvinavačany — invalid druhoj hrupy — niadrenna zarabiŭ na niezakonnym biznesie. Sud aryštavaŭ jaho elektramabil Tesla Model 3 koštam blizu 30 tysiač dalaraŭ i znojdzienyja 112 tysiač dalaraŭ, nie ličačy dziasiatkaŭ tysiač hryŭniaŭ. Fihurantu abrali mieru strymańnia ŭ vyhladzie zakładu z našeńniem elektronnaha branzaleta. Jamu pahražaje ad 5 da 10 hadoŭ pazbaŭleńnia voli.
Minčanka pakinuła stanoŭčy vodhuk na sumku — i raptam vykryła zdradu čužoha muža20
Kamientary