Supiersučasnyja narviežskija F-35 prylacieli ŭzmacnić abaronu chaba NATA na miažy z Ukrainaj
Źniščalniki F-35 i sistemy supraćpavietranaj abarony NASAMS buduć abaraniać aeradrom u polskim Žešuvie.
Ministerstva abarony Narviehii zajaviła, što kraina ŭzmacniaje padtrymku Ukrainy, zabiaśpiečvajučy supraćpavietranuju abaronu krytyčna važnaha dla jaje łahistyčnaha centra ŭ Polščy.
Pačynajučy sa śniežnia 2024 hoda narviežskija vojski buduć abaraniać pavietranuju prastoru nad aeradromam u Žešuvie — klučavym tranzitnym punktam dla cyvilnych i vajskovych hruzaŭ, pryznačanych dla Ukrainy.
Apieracyja budzie pravodzicca ŭ ramkach kompleksnaj supraćpavietranaj i supraćrakietnaj abarony NATA. Narviehija nakiruje ŭ Polšču 100 svaich vajskoŭcaŭ, čatyry źniščalniki F-35, a taksama sistemy supraćpavietranaj abarony NASAMS. Misija budzie dziejničać sa śniežnia pa Vialikdzień i nakiravanaja na harantavańnie biaśpiečnaj dastaŭki dapamohi Ukrainie va ŭmovach kanfliktu.
F-35 — adzin z samych sučasnych źniščalnikaŭ u śviecie. Dziakujučy sučasnaj technałohii «stełs» i vialikaj kolkaści datčykaŭ samalot zdolny paźbiahać vyjaŭleńnia ŭ pavietranaj prastory praciŭnika. Źniščalnik moža być abstalavany roznymi typami bombaŭ i kiravanymi rakietami z dakładnym naviadzieńniem i vydatna padychodzić dla ataki celaŭ jak u pavietry, tak i na ziamli ci na vadzie.
Asablivaściu F-35 źjaŭlajecca avijonika, jakaja abjadnana z cełym šeraham datčykaŭ i kampjuternych sistem i stvaraje «ličbavaje pole boju», dazvalajučy kaardynavać dziejańni ź inšymi vidami techniki, u tym liku tankami, samalotami i radarami. Heta daje pieravahu ŭ płanavańni i vykanańni apieracyj na vialikich dystancyjach.
Sistema SPA NASAMS źjaŭlajecca narviežskaj raspracoŭkaj i adnosicca da ŭstanovak małoj i siaredniaj dalnaści. Jana pryznačana dla abarony ad pavietranych pahroz vajennych i hramadzianskich abjektaŭ. ZŠA abrali hetuju sistemu dla abarony nieba nad Vašynhtonam.
U zaležnaści ad rakiet, jakija vykarystoŭvajucca, dalnaść hetaha mabilnaha kompleksu moža składać ad 15 da 50 kiłamietraŭ, vyšynia da 21 kiłamietra.
Jak zajaviŭ ministr abarony Narviehii Bjorn Aryld Hram, nakiroŭvajučy svaju vajskovuju misiju ŭ Polšču, kraina sadziejničaje tamu, kab dapamoha Ukrainie dasiahała svajoj mety, dazvalajučy joj praciahnuć zmahańnie za svabodu.
Kamientary