Rak toŭstaj kiški siarod nasielnictva Biełarusi na pieršym miescy
Jaki najbolš dziejsny srodak jaho praduchileńnia i jakaja ŭvohule situacyja z ankałahičnymi zachvorvańniami ŭ Biełarusi?
Pa słovach dyrektara RNPC ankałohii i miedycynskaj radyjałohii Siarhieja Palakova, za apošnija 20 hadoŭ adznačajecca niaŭchilny rost ankałahičnych zachvorvańniaŭ. Źnižeńnie nazirałasia tolki ŭ pieryjad kavidu, što tłumačycca mienšaj vyjaŭlalnaściu ŭ toj čas.
Adpaviedna statystycy, jakuju Palakoŭ pryvioŭ padčas pres-kanfierencyi, u 2023 hodzie ŭ Biełarusi było vyjaŭlena krychu bolš za 57 tysiač vypadkaŭ zachvorvańnia na złajakasnyja novaŭtvareńni. U 2019 hodzie hety pakazčyk składaŭ amal 55 tysiač čałaviek. Pry hetym na 100 tysiač haradskoha nasielnictva prypadaje 617 vypadkaŭ zachvorvańnia, na sielskaje — amal 630.
U 2023 hodzie siarod mužčyn na pieršym miescy znachodzicca rak prastaty. Na jaho chvareŭ kožny čaćviorty (26,3%). Siarod najbolš raspaŭsiudžanych zachvorvańniaŭ byli rak lohkaha (14,4%), toŭstaj kiški (11,8%), nyrak (6,3%), straŭnika (5,9%), połaści rota i hłotki (5,5%).
U žančyn, pavodle infarmacyi za 2023 hod, na pieršym miescy (24,6%) znachodziŭsia rak małočnaj załozy. Da najbolš raspaŭsiudžanych taksama adnosilisia rak toŭstaj kiški (11,9%), matki (11,1%), ščytapadobnaj załozy (5,5%), nyrak (5,1%) i jaječnikaŭ (4,7%).
Jak zaŭvažyŭ Palakoŭ, kali skłaści pakazčyki, to na pieršaje miesca dla abodvuch pałoŭ vychodzić rak toŭstaj kiški.
Pa słovach śpiecyjalista, asnoŭnaj prafiłaktykaj raka toŭstaj kiški (ci kałarektalnaha raku) źjaŭlajecca vykanańnie kałonaskapii z vydaleńniem palipaŭ, jakija vyjaŭlajucca padčas hetaj pracedury.
«Heta dazvalaje praktyčna na 100% paźbiehnuć pieraradžeńnia hetych palipaŭ u złajakasnuju puchlinu», — padkreśliŭ Palakoŭ i patłumačyŭ, što ŭ vypadku vydaleńnia palipaŭ nastupnuju kałonaskapiju nieabchodna pravieści praz 2-3 hady. Kali ž ničoha nie znachodziać, to nastupny raz hetuju praceduru možna zrabić praz 10 hadoŭ.
Jak adznačaje vučony, niahledziačy na rost kolkaści zachvorvańniaŭ, pakazčyki śmiarotnaści na praciahu apošnich 20 hadoŭ zastajucca na adnym i tym ža ŭzroŭni — prykładna 193 vypadki na 100 tysiač čałaviek nasielnictva.
Kali havaryć pra 5-hadovuju vyžyvalnaść, to jana ŭ paraŭnańni z 2012 hodam vyrasła z 52,2% da 59%. Pry hetym siarod pacyjentaŭ, jakija atrymali lačeńnie pa radykalnaj prahramie, rost skłaŭ 10% (z 72,8% da 82,3%).
Pa słovach Palakova, siarod pacyjentaŭ, jakija atrymali lačeńnie pa radykalnaj prahramie, najbolšy pakazčyk 5-hadovaj vyžyvalnaści ŭ chvorych na rak prastaty (94,2%), małočnaj załozy (89,6%), matki (89,1%), abadočnaj kiški (71,5%), pramoj kiški (70,7%), straŭnika (63,4%) i lohkaha (54%).
Śpiecyjalist zaŭvažaje, što kožny dzień u krainie ŭ 2023 hodzie rabili 346 apieracyj. Za hod — zvyš 87 tysiač, što na 5% bolej u paraŭnańni z 2022 hodam.
Pa słovach Palakova, u minułym hodzie ŭ Biełarusi lačyłasia kala 2 tysiač ankachvorych z-za miažy. Da pačatku vajny Rasii va Ukrainie hety pakazčyk byŭ našmat bolšy.
«Prykładna 40% usich pacyjentaŭ, jakija pryjazdžali da nas, byli z Ukrainy», — adznačyŭ mužčyna i dadaŭ:
«Zastajecca dastatkova vialiki patok pacyjentaŭ z Rasijskaj Fiederacyi, z respublik Siaredniaj Azii. Jość pacyjenty z dalokaha zamiežža. Zachavalisia pacyjenty z Polščy, Litvy, Łatvii».
Siarod płanaŭ, jakimi padzialiŭsia Palakoŭ, — stvareńnie ŭ supracoŭnictvie z Rasatamam Centra jadziernaj miedycyny, dzie lačeńnie budzie adbyvacca z vykarystańniem izatopaŭ. U jaho budynku moh by raźmiaścicca novy cykłatron, jaki na siońnia ŭ krainie tolki adzin.
Pa słovach Palakova, u najbližejšaj budučyni ŭ biełaruskich ankacentrach źjavicca novaje abstalavańnie vytvorčaści Paŭdniovaj Karei i Kitaja, jakoje dazvolić udaskanalić małainvaziŭnuju chirurhiju.
Minskamu biznesmienu Saŭryckamu i jahonaj siamji pahražaje pa 12 hadoŭ za «raspalvańnie varožaści»2
Kamientary