4 filmy, jakija sabrali najbolš simpatyj na kinafiestyvali «Paŭnočnaje źziańnie»

Samym papularnym filmam fiestyvalu staŭ narviežski dok «Pieśni Ziamli» (rež. Marhret Olin, Narviehija, 2023). Jon sabraŭ 761 prahlad na online-płatformie kinafestu.

U ramkach festu było taksama niekalki afłajn-pakazaŭ kino ŭ Vilniusie, Talinie i ŭ Varšavie. Ich naviedała bolš za 600 čałaviek.

Jakija ž filmy stali pieramožcami?

Biełaruski konkurs

Filmy Biełaruskaha konkursu ahladała mižnarodnaje žury, u skład jakoha sioleta ŭvajšli estonskaja kinapradziusarka Maryjane Ostrat, režysiorka, kinapradziusarka i dyrektarka kinafiestyvalu goEast Heleen Cherytsen i biełaruskaja režysiorka i žurnalistka Hanna Badziaka. Žury adnahałosna vyrašyła prysudzić uznaharodu za najlepšy film Biełaruskaha konkursu stužcy «Pad šerym niebam» režysiorki Mary Tamkovič. Jon natchniony losam źniavolenaj žurnalistki «Biełsata» Kaciaryny Andrejevaj i jaje muža Ihara Iljaša..

«Praz razumnyja i ŭpeŭnienyja mastackija vybary režysiorka daje nam prymierać boty śmiełaj biełaruskaj žurnalistki, aryštavanaj za viadzieńnie tranślacyi z žorstkaha padaŭleńnia mirnych pratestaŭ. My razumiejem i ŭchvalajem ekzistencyjny vybar hałoŭnaj hieraini i spačuvajem jaje mužu, pakul jana praciahvaje zmahacca ź dziaržavaj, jakaja razburaje ich raniejšaje siamiejnaje žyćcio», — patłumačyła vybar žury.

Śpiecyjalnymi zhadkami hetaksama adznačanyja dva filmy: «Niepažadanaje svajactva» Paŭła Mažara i «Pracesy» Andreja Kašpierskaha.

Mižnarodny konkurs debiutaŭ

Aceńvali filmy Mižnarodnaha konkursu debiutaŭ režysiorka Saša Kułak, pradziusarka i prodžekt-mieniedžarka B2B Doc Ilja Stenbierh i pradziusarka i dyrektarka HER Docs Marta Holba-Naŭman. Pieramoh film «H — Hatsunda ŭ 21 dziei» režysiora Łorana Baci.

«Pakidać miesca, jakoje vyznačyła ciabie jak asobu, nikoli nie prosta. Režysior apisvaje hetaje padarožža z hłybokaj emacyjnaściu, zaprašaje nas u inakš niedasiažny śviet, — rastłumačyła svoj vybar žury. — Jon rasšukvaje siabroŭ ź minuŭščyny, malujučy ich tak, jak mała chto zmoh b — z ščyraściu, jakaja pakazvaje, jak ich vybary vyznačaje składanaja sumieś emocyj i supadzieńniaŭ, — i vystaŭlaje braterstva va ŭsim jaho hołym charastvie i składanaści».

Śpiecyjalnaj zhadkaj byli adznačanyja dźvie stužki: «Balomania» (rež. Sisel Moreł Darhis) i «Pałajučy raj» (rež. Mika Hustaŭson).

Konkurs karotkaha mietra SHORTCUT

Hety konkurs sioleta prajšoŭ upieršyniu. Mižnarodnaje žury, u składzie jakoha ahientka pa prodažach i suzasnavalnica ShortsFit Lucyła Rydžya, režysior-dakumientalist Arciom Łobač i daradca mižnarodnaha adździeła arhanizacyi Finnish Film Foundation Ota Suuronien, uznaharodziła stužku «Łaźnievy dzień» (rež. Hanna Chints i Tušar Prakaš).

«U pary žyćcia raskryvajecca tonkaja i pryhožaja historyja pra mahčymaść lubovi i kłopatu miž mužčynami. Film pra nievymoŭnaje, elehantna źniaty ŭ haračaj saunie, sa zmročnymi cieniami na ścienach i pa-impresijaniscku potnymi bujnymi płanami halinak, što rytmična hojdajucca. Hledačy mohuć adčuć hłybokaje parazumieńnie i napružańnie ŭ hierojach i atačeńni filma. Sinierhija parnaha asiarodździa, hłybokich pačućciaŭ i asabistych historyj raskryvaje tonkaść i charastvo nievymoŭnaha», — kamientujuć svoj vybar žury.

Śpiecyjalnaj zhadkaj adznačany film «Umiašańnie» (rež. Hunur Marcinsdoŭcir Šlutar) i akciorskaja praca Jana Hunara Rojse («Narviežskaje patomstva»).

Hledačy taksama mahli abrać film-favaryt. Pa vynikach hałasavańnia pieramožcaj hladackich simpatyj stała stužka «Rab tanca» — siurrealistyčny skietč, u jakoj vusaty junak starajecca zajmacca spravaj, jakuju ščyra lubić.

• 1
• 0
• 0
• 0
• 0
• 0
• 0
• 0