Samy bahaty čałaviek u śviecie i adzin z zasnavalnikaŭ amierykanskich kaśmičnych prajektaŭ z kanca 2022 hoda maje rehularnyja kantakty z prezidentam Rasii Uładzimiram Pucinym, piša The Wall Street Journal.
The Wall Street Journal, spasyłajučysia na infarmacyju niekalkich dziejnych i byłych amierykanskich, jeŭrapiejskich i rasijskich čynoŭnikaŭ, śćviardžaje, što Iłan Mask maje rehularnyja kantakty z prezidentam Rasii Uładzimiram Pucinym. Hutarki zakranajuć asabistyja temy, biznes i hieapalityčnuju napružanaść.
U toj ža čas, niekalki čynoŭnikaŭ Biełaha doma zajavili, što nie viedajuć pra takija kantakty. Hetaja tema vielmi dalikatnaja, uličvajučy rost udziełu Maska ŭ kampanii Trampa i nadychodziačyja prezidenckija vybary ŭ ZŠA.
Adzin čałaviek, znajomy ź situacyjaj, skazaŭ vydańniu, što ŭrad sutykajecca z dylemaj, pakolki jon mocna zaležyć ad technałohij miljardera. SpaceX vyvodzić na arbitu žyćciova važnyja dla nacyjanalnaj biaśpieki spadarožniki i źjaŭlajecca kampanijaj, na jakuju NASA spadziajecca pry dastaŭcy astranaŭtaŭ na Mižnarodnuju kaśmičnuju stancyju i ich viartańni.
Pa słovach pres-sakratara Kramla Dźmitryja Piaskova, ni Pucin, ni kramloŭskija čynoŭniki nie viaduć rehularnych hutarak z Maskam.
U kastryčniku 2022 hoda sam miljarder publična zajaviŭ, što razmaŭlaŭ z Pucinym tolki adzin raz. Na płatformie X jon adznačyŭ, što razmova była pra kosmas i adbyłasia prykładna ŭ krasaviku 2021 hoda.
Vydańnie śćviardžaje, što zatym, jak u 2022, tak i sioleta, u miljardera było bolš razmoŭ, uklučajučy dyjałohi ź inšymi vysokapastaŭlenymi rasijskimi čynoŭnikami. Pa słovach dvuch surazmoŭcaŭ, adnym ź ich byŭ pieršy namieśnik kiraŭnika administracyi Pucina Siarhiej Kiryjenka. Pra što jany havaryli, niezrazumieła.
Vydańnie źviartaje ŭvahu na źmienu pazicyi Maska ŭ padtrymcy Ukrainy. Pieršapačatkova miljarder adkryta padtrymlivaŭ Ukrainu, pieradaŭ joj niekalki sotniaŭ terminałaŭ Starlink dla suviazi. Adnak u vieraśni 2022 hoda miljarder abmiežavaŭ dostup da Starlink dla ŭkrainskich vajskoŭcaŭ, admoviŭšy im u vykarystańni sistemy dla atak na rasijskuju vajenna-marskuju bazu ŭ Krymie. Mask tady zajaviŭ, što Starlink pryznačany dla cyvilnaha vykarystańnia i što ataka na Krym moža pryvieści da jadziernaj eskałacyi.
Pavodle infarmacyi adnoj z krynic vydańnia, u toj čas Mask rehularna mieŭ znosiny z «vysokapastaŭlenymi ruskimi», i Kreml akazvaŭ cisk na biznes miljardera i «niajaŭna pahražaŭ jamu».
U kastryčniku 2022 hoda Mask paprasiŭ dziasiatki miljonaŭ svaich padpisčykaŭ na X prahałasavać za šlach da miru, jaki adlustroŭvaŭ niekatoryja aśpiekty tahačasnaj prapanovy Kramla Ukrainie.
Vosieńniu 2022 hoda palitołah Jan Bremier, zasnavalnik ńju-jorkskaj kansałtynhavaj firmy Eurasia Group, napisaŭ u Twitter, što Mask skazaŭ jamu, što havaryŭ z Pucinym i kramloŭskimi čynoŭnikami pra Ukrainu. «Jon taksama raskazaŭ mnie, jakija ŭ Kramla čyrvonyja linii», — napisaŭ jon.
U infarmacyjnym biuleteni dla padpisčykaŭ Bremier napisaŭ, što Mask pieradaŭ jamu paviedamleńnie ad Pucina ab hatoŭnaści Rasii ŭtrymać Krym i dabicca niejtralnaha statusu Ukrainy «luboj canoj», i što jana adkaža na ŭkrainskaje ŭvarvańnie ŭ Krym jadziernym udaram. Palitołah pryvioŭ słovy miljardera ab tym, što «treba zrabić usio, kab paźbiehnuć takoha zychodu». Sam Mask publična admaŭlaŭ, što kazaŭ štości z hetaha Bremieru.
Pa słovach byłoha supracoŭnika rasijskaj raźviedki, u kancy minułaha hoda Kreml upieršyniu źviarnuŭsia da Maska z prośbaj nie aktyvavać Starlink nad Tajvaniem, u jakaści akazańnia pasłuhi Kitaju, ad jakoha Rasija ŭsio bolš zaležyć u handli i abychodzie sankcyj.
Pa słovach adnoj ciapierašniaj i adnoj byłoj krynicy ŭ raźviedcy, Mask i Pucin praciahvali padtrymlivać suviaź i ŭ hetym hodzie, kali miljarder pačaŭ uzmacniać svaju krytyku vajennaj dapamohi ZŠA Ukrainie i ŭklučyŭsia ŭ pieradvybarčuju kampaniju Trampa.
U apošni hod intaresy Maska i Rasii ŭsio čaściej pierasiakajucca. Akramia taho, što Rasija vykarystoŭvaje X dla dezinfarmacyi, a sam miljarder adkryta vystupaje suprać dapamohi Kijevu, u pačatku hetaha hoda ŭkrainskija čynoŭniki zajavili, što rasijskija vojski pačali vykarystoŭvać Starlink dla zabieśpiačeńnia biaśpiečnaj suviazi i pavieličeńnia dalnaści palotu bieśpiłotnikaŭ, što padarvała adnu ź niamnohich pieravah Ukrainy na poli boju.
Mask nie adkazaŭ na prośby ab kamientaryjach pa hetaj temie. Raniej miljarder nazvaŭ krytyku z boku niekatorych kołaŭ taho, što jon staŭ apałahietam Pucina, «absurdnaj» i zajaviŭ, što jaho kampanii «zrabili bolš dla padryvu Rasii, čym lubyja inšyja srodki ci namahańni».
Kamientary